2
1 In trahai chu ‘Ammi’ tiin,In farhai chu “Ruhuma’ ti ro.a
Israel hremna le tungdingna
2 I nu hal la, hal mol rawh,
Ka nuhmei a ni ta naw a,
A pasal ka ni ta bok nawh.
A nawchizor mitmei hi peiin,
A trânga uiretna hi băn raw se.
3 Chuong naw chun a pieng ni a,
Saruoka a um ang khan,
Saruok dêrin siem ka tih.
Thlalĕr angin siem ka ta,
Ram trâwlin inchang a ta,
Dangchârin sukhlum ka tih.
4 A nauhai lainat naw ning,
Nawchizor nau an ni si a.
5 An nu a ringum naw a,
Muolpho taka a pai an nih.
“Fâk le dawn le sil le bil,
Sahriek le uoiin mi petu,
Ka ngaizawnghai hnot ka tih”
Tiin ama chun a hril a.
6 Chuleiin, a lampuiah,
Hling bon inzămtir ka ta,
Lampui a hmu nawna di’n,
Dai sakin hnaw ping ka tih.
7 A ngaizawnghai hnot a ta,
Sienkhom hnot phak nei naw nih;
Anni chu zong ruoi a ta,
Sienkhom tu khom hmu naw nih.
“Ka pasal hmasa kuomah,
Fe kîr nawk phot el ka tih,
Tuta nêk chun kha hmaa,
Ka ngirhmun kha a thra lem”
Tiin ama chun hril a tih.
8 Baal bieknaa an hmang,
Bu le uoiin le hriekhai chu,
Keima pêk a nizie dam,
Tangkaruo le rangkachaka
Vurtu ka ni ziehai khom,
A hriet nuom ta hrim hrim nawh.
9 “Chuleiin bu sîk hunah,
Ka buhai lăkpêk ka ta,
Uoiin thar a săwr hunah,
Keiman lakpek vong ka ta,
A saruok inkhumna ding,
Ka sahmul le pathai chu,
Keiman lakîr vong ka tih.
10 A ngaizawnghai mithmuah,
Saruokin kei phar ka ta,
Ka kuta inthok tu khomin,
San suok thei hrim hrim naw nih.
11 Insukhlimna a nei po po,
Thla thar lawm le chawlni hai,
Kût a hmang hlak po po chu,
Keiman suktawp vong ka tih.
12 A grep le theichang kŭnghai,
A ngaizawng laka a hlaw suok,
Ni dinga a hril hlakhai chu,
A rêngin sukram ka ta,
Thrŭlbukah inchangtir ka ta,
Ramsahaiin tlàn an tih.
13 Baal hmaa rimtui raw a,
Ni a hmang sung zat po chu,
Ama hremnan hmang ka tih.
Kutsebi le belmawi tinrêng,
Inbelin ngaizawng a hnot a,
Kei ruok chu a mi theinghil si”
Ti hi LALPA thu suok a nih.
LALPAN a mihai a hmangai
14 “Ama chu zawr nawk ka ta,
Thlaler hmunah thruoi ka ta,
Biethu inhlăn nawk ka tih.
15 A grêp huon pekîr ka ta,
Buoina hmun Akorb ruom khom,
Beiseina kot inchang a tih.
A tleirawl lai nihai angin,
Aigupta a suoksan ni angin,
Innui hieuin mi don a tih.
16 Chu ni a hung tlung pha chun,
“Ka lalpa’ mi ti ta loin,
‘Ka pasal’ mi ti tang a tih,
Ti hi LALPA thu suok a nih.
17 A hmûr a’nthokin Baal hming,
Ka lâk hmangpek ding a na,
Săm khom sâm ta ngai naw nih.
18 Ramsa le chungleng vahai,
Hnuoia hring tinrênghai leh,
Inremna siempek ka ta,
Thalngul, kawlhnâm le indohai,
A ramah sukbo ka ta,
Him takin chêng tlâng an tih.
19 Kumtluonga nuhmei dingin,
Inhuolpui ka ti che a,
Felna le rorelna indik,
Hmangaina le lungsietnain,
Ka ta din huol ka ti che.
20 Ringumna’n huol ka che a,
LALPA ka ni hre ta’ng i tih.
21 LALPA chun hieng hin a tih:
“Chu ni chun inhong ka ta,
Vàn lakah inhong ka ta,
Hnuoi lakah inhong an tih;
22 Bu le uoiin le hriek ta dingin,
Leihnuoi khom inhong a ta,
Bu le uoiin le hriek hai khom,
Jezreelc ta din inhong an tih.
23 Jezreel chu ka ta dingin,
A rama chun phun ka ta,
Ka hmangai hlaw ngai lo chungah,
Ka hmangaina suklang ka ta,
‘Ka mihai’ ti hlaw ngai lo chun,
‘Ka mihai’ ti hlaw ta’ng an ta,
‘Kan Pathien’ mi ti veng an tih.