THILTHAWHAI
Thuhma
Van tieng Isu a’n lawi tawma a thu incha angin zirtirhai le ringtu danghai chun Thlamuongtu Thlarau Thienghlim hung tlung dinga tiem chu Jerusalemah an nghak a. A hung tlung a, Thlarauin an hringna a hang mût chok zet chun kha hmaa thla invai le tri dor dora umhai kha chappui kăng vanglai ang elin an hung tral ta phut el a, Chanchin Thra an khĕkpui a, a hung indar ta chum chum el a. Thilthawhai hi Jerusalema inthoka intrana kum 30 vêl sunga Kristien sakhuo a hung indar dan le kohran an hung phun dan chanchin suina a na, Baibul pumpuia a bu 44-na, bung 28 le chang 1007-a sei a nih. Dr. Luka bokin a lekhabu ziek hmasak (Chanchin Thra Luka) sunzomna dinga a ziek a nih. A ziek hun hi Jerusalem siet hma, Paula la dam lai, A.D 60 vel ni dinga mi tam takin an ring laiin, threnkhat ruok chun A.D 80-82 vela ziek ni dingin an ring bok. Rom khuoa Paula lung in intang laiin a chanchin hi a tawp lei hin Paula dam lai ngeia ziek a ni ring a um.
A ziektu hin Kristienhai hi pawlitiks pawl, Rom sorkar suksea thuneina inchu tum an ni nawzie, sakhaw thil lieu lieu, Judahai sakhuo sukfamkimna a nizie a hril uor hle a. Chanchin Thra indar dan chu sawng thumin a hril: (1) Vana Isu a lawn hnunga Jerusalema Kristien Kohran an hung indin thu; (2) Palestina rama a hung indar pei dan; (3) Europe ram, Rom khuo chena a hung indar dan.
Kristien kohran hung intran dan trobul sui nuomtuhai le kohran indin le enkol sina inhmanghai ta ding chun hi lekhabu hi tiem makmaw lekhabu a nih.
A sung thu tlangpui
Thuhretu dinga inbuotsaina (1:1-26)
Isu thupek le thutiem (1:1-15)
Juda Iskariot aiawtu an thlang (1:15-26)
Jerusalema thuhril (2:1-8:3)
Judai ram le Samari rama thuhril (8:4-12:25)
Paula rongbawl dan chanchin (13:1-28:31)
Inzin voi khatna (13:1-14:28)
Jerusalem inkhawmpui (15:1-35)
Inzin voi hnina (15:36-18:22)
Inzin voi thumna (18:23-21:16)
Paula intàng thu (21:17-28:31)