HOSEA
1
1 Juda lal Uzia hai, Jotham hai, Ahaz hai le Hezekia hai inlal lai le Israel lal Jeroboam, Jehoas naupa inlal laia Beri naupa Hosea kuoma LALPA thu hung tlung chu:
Hosea nuhmei le nauhai
2 LALPAN Hosea hmanga Israelhai kuoma thu a hril tran lai khan, LALPA chun Hosea kuomah, “A ramin LALPA nghatsana, suol taka a uirĕtsan angin, nang khom fe la, nuhmeiah nawchizor va nei la, nawchizor le chun nau nei ro” a ta. 3 Chuongchun a fe a, Diblaim naunu Gomer chu nuhmeiah a nei a, nâu a pâi a, naupa a hringpĕk a. 4 LALPA chun Hosea kuomah, “A hmingah Jezreel sak rawh; sawt riel loin Jezreel phuba chu Juhu sungkuo chungah ka lâk ding a ni si a; Israel lalram khom suktawp bok ka tih. 5 Chu ni chun Israel thalngul chu Jezreel Ruomah ul tliek ka tih” a ta.
6 Chun, Gomer chun nau a pâi nawk a, naunu a hring a. LALPA chun Hosea kuomah, “Israel sungkuo chu laina zingin ka ngaidam el ta naw ding a ni leiin, a hmingah ‘Lo-Ruhama’a sak rawh. 7 Juda sungkuo ruok chu laina zing ka ta, thalngul amanih, kawlhnâm amanih, sakor le sakor chungchuong mi amanih hmang loin, LALPA an Pathien chun sandam ka tih” a ta.
8 Lo-Ruhama-in nene a nghei hnung chun Gomer-in nau a pai nawk a, naupa a hring a. 9 LALPA chun, “Ka mihai in ni naw a, in Pathien ka ni ta bok naw leiin a hmingah Lo-Ammib sak rawh” a ta.
Israel tungding nawk ding thu
10 Amiruokchu, Israel nauhai chu tuifinriet kama phaiphin anga tam, tiem seng ruol lo la ning an ta, “Ka mihai in ni nawh” lo ti tah lang khom “Pathien hring nauhai in nih” tiin la ko ka tih. 11 Juda mihai le Israel mihai chu insuikhawm nawk an ta, thruoitu pakhat ruot an ta, chu rama inthok chun hung suok an ta, Jezreel nic chu a la ropui ding a nih.