Paulan a chipuihai a’n voizie
10
1 Unauhai, ka chipui Israelhai chu sandamin um hai sien ti hi ka duthusam le Pathien kuoma ka hnî rop chu a nih. 2 Pathien ta dinga thrahnem an ngaizie ka hriet a, sienkhom an hriet dan a mumal si nawh. 3 Pathienin thiem mi a’n changtir dan an hriet thiem naw a, anni lampui an hraw tlat a, Pathienin thiem a’n changtir dan hnuoia chun an tlu lŭt nuom nawh. 4 Ama ringtu taphotin thiem an chang theina dinga Dan sukfamkimtua chu Krista a nih.Ringna leia thiemchangna
5 Dan zawm leia thiemchang dan thu chu Mosien hieng ang hin a lo ziek a, “Dan zawmtu chu danin hring a tih” tiin. 6 Ringna leia thiemchang dan thua ruok chun, “Tu’m vanah lawn a ta?” (Vana inthokin tuin am Krista hung thruoi thlang a ta?) amanih, 7 “Tu’m khurpuiah zu trum a ta?” (Mithi khuoa inthokin tuin am Krista zu thruoi suok a ta?) amanih in lungrilin ti naw ro” tiin a hril bâkah,
8 “Thu chun a hnai che,
I bau le i lungrilah a um”
a ti lem a ni kha. Chu thu chu ringna thu kan hril hlak hi a nih. Deut 30:14
9 I bauin Isu chu Lalpa a nih ti i tran a, mithi laia inthokin Pathienin a keitho ti i lungrila i ring chun sandamin um i tih. 10 Lungrila ringtuhai chu thiem inchangtirin an um a, baua trantuhai chu sandamin an um bok. 11 Pathien Lekha thuin, “Tu khom ama ring taphot chu muolpho ngai hrim hrim naw nih” ti a nih. 12 Juda mi le Grik mi ieng khom a danglam chuong nawh. Lalpa pakhat chu an rênga Lalpa a ni a; ama kotuhai chungah a hausakna a vûr hlak. 13 “Tu khom Lalpa hming lam taphot chu sandamin um an tih” a ti a nih. 14 Anleh, an ring naw chu ieng tin am ko an ta? Thu an hriet naw chu ieng tin am ring thei an ta? Thuhriltu um loin iengtin am hrieng an ta? 15 Tir an ni si naw chun ieng tin am thu hril an ta? “Thil thra chanchin lawmum intluntuhai ke chu a va mawi de!” ti ziek a ni kha. 16 Sienkhom, Chanchin Thra chu an rêngin an ring vong chuong nawh. Isai bokin, “Lalpa kan thu hril tuin am a ring a?” a ti si a. 17 Chuongchun, ringna chu thu an ngaithlăka inthoka hung um a na, thu hrila um chu Isu Krista thu a nih. 18 Anleh, thu chu an nain an hriet ngai naw’m a nih? Hre ngai e a!
“Sienkhom an rawlin hnuoi a fang suok a,
An thuin kawl kil a dĕng suok” Sam 19:4
ti a ni kha.
19 Anleh, hang ti nawk ta pei inla,
Israel mihaiin an hriet naw am a ni ding maw?
“Hnama hril khop lohai chu inthîktir ka ti chêu a,
Hnam invĕthai chu hmangin,
Suklungsen ka ti chêu” Deut 32:21
tiin Mosien a hril hmasa tak a.
20 Isai chun huoi takin,
“A mi zong nawtuhai chun,
An mi hmu a;
A mi ko nawtuhai kuomah,
Keima ka’n hriettir a” Isa 65:1
a ti nawk a.
21 Amiruokchu, Israelhai chungchang thua ruok chun,
“Mi kawmaw le helhmang ta dingin,
Sunnithlâkin bân ka phar hlak” Isa 65:2
a ti kha.