LALPA hmangruo Asuria
8
1 LALPA chun ka kuomah, “Thil ziekna ding lekha phek lien tak hung chawi la, chu taka chun kawlom naranin a chungah, ‘Maher-Salal-Has-Baz’a tiin ziek rawh; 2 chun, ka ta dinga hrepuitu ringum dingin thiempu Uria le Jaberekia naupa Zekaria hai chu ko ka tih” a ta. 3 Chu hnungah ka nuhmei zawlneinu chu ka umpui a, nau a hung pai a, naupa a nei a. LALPA chun ka kuomah, “A hmingah Maher-Salal-Has-Baz i sak ding a nih. 4 Hi nau hin ‘Pâ, Nû’ a ti thei hmain Damaska hausakna po po le Samaria râl lâk sumhai po po chu Asuria lalin tol hmang vong a tih” a ta. 5 Chun, LALPAN a mi biek nawk a, 6 “Hi mihai hin Siloa tui luong dam diei chu hnawlin, Rezin le Remalia naupa Peka hai chu an hlimpui lem a. 7 Chuleiin, LALPA chun Eufretis vadungpui khauh tak le tam tak el, Asuria lal le a ropuina po po chu, a kuong le a kam liem zuoi zuoiin an chungah hung inlèttir a tih. 8 Judai ram chenin luong lut hum hum a ta, rîng chena insangin chîm a tih. A thla zar chun aw Immanuel, i ram dung le khang a’n khum vong ding a ni si a. 9 Asuria-hai chun, “Aw hnam tinhai, indo dingin tlâng insam ro, hang nuoi hmât kan ti cheu. Ram hlaa mihai khomin lo ngaithla un la, indo dingin inpuocha ro, hang nuoi hmât tak tak kan ti cheu. 10 Thrang khaw dan ding phan inla khom, ieng bar ni chuong naw ti niu. Thaw dan ding rêl inla khom, puitling hliek chuong naw ti niu, Pathien kan kuomah a um si a” tiin vaukhawng an tih.Pathien tri rawh
11 LALPA chun hieng mihai lampui hi ka zui ve nawna dingin khau takin thu a mi pek a:
12 “Hienghai thu phiernaa hin,
Nang chu thrang ve dĕr naw rawh;
An trǐhai hi trǐ ve naw la,
An pangzat pangzat naw rawh.
13 Iengkim LALPA chauh a nih,
Thienghlima i ngai ding chuh.
Ama chu a nih trǐ ding,
Ama chu a nih pangzat ding.
14 Ama chu i himna ding a nih;
Israel sung hni ta ding ruok chun,
Tlûkna le dălna lungpui,
Jerusalema chênghai dingin,
An bil le châng ni lem a tih.
15 Tam tak insui thlung an ta,
Tluin koi dar phung an ta,
Awkin man tawl bok a tih” tiin.
16 A thu inhriettirhai chu,
Ziek thlain kol diem ka ta,
An inhlan sawng pei dingin,
Ka thruoihruoihai lungrilah,
Inhlànin tŭ nghet ka tih.
17 Jakob sungkuohai laka,
A hmai thuptu LALPA chu,
Kei ruok chun nghâk zing ka ta,
Amaah innghat tlat ka tih.
18 En ta, LALPA mi pek ka nauhai hi, Zion tlanga chêng, Iengkim LALPAN Israel rama inchikna thil maka a hmanghai chu kan nih.b 19 Dawi hla thûm bul bula insam hlak aienthiem le rau ko thiemhai rawn dinga mihaiin an hril pha cheu chun, “Mihaiin Pathien an rawn lem ding a ni naw am a ni? Dam lai nêkin mithi hnung an rawn lem hlak am a ni?” tiin don hlak ro. 20 Dan Thu le Inhriettirna Thu chu zawm lem ding a nih. Hi thu anga an hril a ni naw chun an ta dingin khawfing chat ngai naw nih. 21 Beidong le phingtrâmin ram tinah invâk kuol an ta, an tramsawl pha leh lungsen em emin chung tieng en an ta, an lal le an Pathien chu trongsie inphur an tih. 22 Chu zoah hnuoi tieng en an ta, beidongna le thim, thimpui trium chauh hmung an ta, thim sa mupah hnaw hmangin um an tih.