Thlaraua hringna
8
1 Chuongchun, tuhin chu tisa dan hraw loa thlarau dan hraw lemtu,a Krista Isua umhai ta ding chun thiemnaw inchangtirna hrim a um ta nawh. 2 Krista Isua hringna Thlarau dan chun suolna le thina dana inthok chun a mi san suok ta si a. 3 Tisa hrat nawna leia Danin a thaw thei dĕr naw chu Pathienin a hung thaw tah a; suol kai mihriem taksa ang putin, suol intlanna dingin a Naupa ngei chu a hung tir a, tisaa suol um chu thiemnaw a’n changtir ta a; 4 tisa dâna um ta loa thlarau dân hraw tah lemtu einiah hin Danin a phŭt chu a hlen theina ding a nih. 5 Tisa dàna umhai chun tisa tieng thilhai an dit hlak. Thlarau dàna umhai ruok chun thlarau tieng thilhai an dit bok. 6 Tisa tieng thil dit chu thina a na; Thlarau tieng thil dit ruok chu hringna le thlamuongna a nih. Sam 44:22 7 Tisa ditzawng ngaituona chun Pathien a do a, Pathien dan a zawm naw a, zawm khom a zawm thei bok nawh. 8 Chuleiin, tisa dit zawnga umhai chun Pathien an suklawm thei nawh.9 Pathien Thlarau nangniah a chêng chun tisa mi ni ta loin Thlarau mi in ni ta lem. Tu khom Krista Thlarau nei lo chu ama mi a ni nawh. 10 Krista chu nangniah a um si chun, in taksa chu suol leia thi ni sien khom thiem inchangtir in ni tăk leiin in thlarau ruok chu a hring a nih. 11 Mithi laia inthoka Isu keithotu Thlarau kha nangniah a um chun, mithi laia inthoka Krista Isu keithotu chun nangnia um Thlarau zarah, in taksa thi thei chu sukhring bok a tih.
Pathien nau nina
12 Chuleiin unauhai, bat ei nei a, chu chu tisa nuomzawnga tisâ taka khawsa ding tǐna ruok chu a ni nawh. 13 Tisa dit zawnga in um chun thi ngei in tih; sienkhom tisa nuom zawng in thaw hlakhai chu Thlaraua in sukhlum ruok chun hring in tih. 14 Pathien Thlarau thruoia umhai po chu Pathien nauhai an ni si a. 15 Tritna bawia intâng nawk dingin bawi nǐna thlarau pek in ni naw a; nau nîna Thlarau in chang lem a nih; chu Thlarau zar chun, “Abba, Pa!” tiin ei insĕk hlak a nih. 16 Chu Thlarau ngei chun eini thlarauah Pathien nauhai ei nizie a mi’n hriettir hlak. 17 Pathien nauhai ei ni chun rohluotu, Pathien rohluotu, Krista ro hluopuituhai ei nih; Krista tuorna ei intrăwmpui si chun a ropuina khom intrâwmpui vê ngei ei tih.
Ropuina la um ding
18 Tuta ei tuornahai hi ei ta dinga ropuina suklanga la um ding le chun hrilkhi thamah ka ngai nawh. 19 Pathienin a nauhai a suklang hun ding chu thilsiem po poin nghakhla takin an thlìr a nih. 20 Thilsiemhai chu anni ditthlangna ni loa a Siemtu thu leia iengma lo la ni vong dinga ti an nih. Amiruokchu, beisei ding a la um: 21 thilsiem po pohai chu hmon theina bawia inthoka insuoa umin, Pathien nauhai zalenna ropuia chun an la lŭt ding a nih ti beiseina chu. 22 Thilsiem po pohai chu tu chen hin nauha se tuor inrûm angin an inrŭm tawl ti ei hriet si a. 23 Chu chauh khom chu ni loin, eini Thlarau ra hmasa dongtuhai ngei khom hin nau nina ei hluo hun ding le ei taksa intlan ni ding chu nghakhlâ takin, lungrilin ei inrŭm takmeu si a. 24 Chu beiseina lei chun sandam ei ni a; nisienlakhom, hmu ta zing beiseina chu beiseina a ni nawh. Hmu ta zing chu tuin am a la beisei rop ding? 25 Ei la hmu naw ei beisei chun ei nghak fan fan hlak a nih.
26 Chuong ang bokin, Thlarau chun ei hrat nawnaah a mi thrangpui hlak a; trongtrai dan ding ei hriet naw lai khomin Thlarau chun hril ruol loa inrûmin a mi trongtraipek lem hlak a nih. 27 Lungril enfietu Pathien chun Thlarau ditzawng chu ieng am a nih ti a hriet a; Thlarau chun Pathien ditzawng ang peiin mi thienghlimhai ta dingin a mi trongtraipek hlak.
28 Pathien hmangaituhai, Aman a ruot anga a kohai ta ding chun iengkimah an thratna dingin a thawpek hlak ti ei hriet; 29 A hriet lawkhai chu a Naupa ang taka um dingin a ruot lawk si a, a Naupa chu unau tam tak laia nau lutir a hung ni theina dingin. 30 Chun, a ruot lawkhai chu a ko a; a kohai chu thiem a’n changtir a; thiem a’n changtirhai chu a chawimawi bok a nih.
Pathien hmangaina
31 Chuong thua chun ieng am hril tang ei ta? Pathien eini tieng a thrang chun tuin am mi khing ngam a ta? 32 Ama Naupa ngei khom hlà loa ei rênga ta dinga petu chun thil dang khom a thlawnin a mi pĕk sa naw dim a nih? 33 Pathien mi thlanghai chu tuin am hêk ngam an ta? Thiem inchangtirtu chu Pathien a ni si a. 34 Tuin am thiem naw inchangtir a ta? Krista Isu chu ei ta dinga thi le mithi laia inthoka tho nawk chauh khom ni lo a, Pathien chang tieng inthrung a, eini mi hrilpuitu a ni si a.
35 Krista hmangainaa inthok chun iengin am mi thrè thei a ta? Rinumna dam, harsatna dam, suknomnatna dam, trămna dam, saruokna dam, tritna dam, kawlhnâm damin maw a mi thrè thei ding? 36 Nangma leiin ni tin elin,
Thina ko tlângah kan ngǐr a;
That ding beram ang hiela ngai
Kan lo ni tawl vong ta si a, Sam 44:22
ti ziek ang khan.
37 Thrè thei teu lo e! Chuong po poa chun a mi hmangaitu zarin hnetuhai chunga lêng ei nih. 38 Thil ieng khomin, thina hai, hringna hai, vantirko hai, boruoka thuneitu hai, thil tlung zing le la tlung ding hai, thilthawtheina hai, 39 thil insang le inthûk hai, thilsiem dang hrim hrim khomin ei Lalpa Krista Isua um Pathien hmangainaa inthok chun mi thrè naw nih ti chieng takin ka hriet.