4 Thlarau Thienghlim tir suokin Selukia khuoah an fe thla a, chu taka inthok chun longin Kupra thlierkarah an fe a. 5 Salami khuo an tlung chun Judahai sunagog-ah Pathien thu an hril a, Johan khom anni thrangpuitu dingin an thruoi bok a. 6 Chu thlierkar chu an fang suok vong hnungin Pafos-ah an hung tlung a, chu taka chun Juda mi dawithiem le zawlnei tehlĕm, a hming Bar-Isu an ti chu an hmu a. 7 Chu pa chu a ram optu^b Sergia Paula meitehêma thrang a na. Ram optu mi var tak a na, Pathien thu ngaithlâk a nuom leiin Barnaba le Saula chu hung lêng dingin a fiel a. 8 Dawithiem Elima (chu chu a hming umzie tak chu a nih) chun Ram optu chu ringna thu inawitir naw tumin, Barnaba le Saula chu a lo kal a. 9 Saula, Paula an ti bok chu Thlarau Thienghlimin a sip a, Elima chu a hmaiah inchang taka enin, 10 “Nang hlêmna tinrêng le dawhaa sip, Diebol naupa, thil indik taphot hmêlma pa, Lalpa lampui indika inthoka mi thruoi suol i ma naw ding maw? 11 Hre rawh, tu hin Lalpa kut i tuor ding a ni hih, i mit indel a ta, khaw var hrim hmu ta ngai naw ti nih” a ta. Chu phing leh sûm le thimin a hung baw a, a keitu ding zongin an mai vĕl ta ruoi a. 12 Ram optuin chu chu a hmu chun a ring tah a, Lalpa thu an inchuktir chun a lungril a tâwk hle a.

13 Paula le a ruolhai chu Pafos-a inthokin longin an suok a, Pamfulia ram Perga khuo an tlung a, Johanin anni chu a maksan a, Jerusalem tieng a kir nawk a. 14 Pergaa inthokin Pisidi rama Antiokei khuoah an fe pei a. Sabat ni chun sunagog inkhawmah an fe a, an inthrung a. 15 Dan bu le Zawlnei Lekhabu an tiem zoin sunagog hotuhai chun mi an tir a, “Unauhai, infuina ding thu iemani dam in nei chun hril ro” an va ti a.

16 Chuongchun, Paula chu a ngîr a, kutin a zâp a, a hril tah a. “Nangni Israel mihai le Pathien betu Jentelhai, lo ngaithla ro. 17 Israelhai Pathien khan ei thlatuhai kha a thlang a, an mikhuolna Aigupta ramah an um sung khan hnam ropui takin an ngìr a, chu taka inthok chun thilthawtheina ropui tak hmangin a thruoi suok a. 18 Kum sawmli sung lai thlalĕrah dawthei taka enkolin a thruoi a. 19 Kanan ramah hnam sari a suktlawm hnungin an ram chu a’n hluotir a. 20 Chu chun kum zali le sawmnga lai a aw a. Chu zoah rorêltuhai a pêk hlak a, zawlnei Samuel chen khan. 21 Chu hnunga chun lal an hni a, Pathienin Benjamin chia mi, Kisa naupa Saula chu kum sawmli sunga dingin a pêk nawk a. 22 A lalna a suktawp hnungah Pathienin Davida a’n laltir a, ‘Ka lungril ang put mi Davida, Jesai naupa ka hmu suok tah, ama chun ka ditzawng taphot chu thawng a tih’ a ta. 23 Chu thlaa inthok chun, Pathienin thu a tiem angin, Israelhai kuomah Sandamtu Isu a hung pĕk a. 24 Isun rong a bawl tran hmain Johanin simna baptisma chang ding a ni thu Israel mihai po po kuomah a hung hril hmasa a. 25 Johan chun a rongbawlna a hlen ding lai khan, ‘Nangnin tu am ni dingin in mi ruot? Ama chu ka ni nawh. Ngai ta u, ka hnungah a hung mĕk a nih, a pheikhok hrui sŭt tlăk khom ka ni nawh’ a ta.

26 “Ka unau, Abraham thlahai le nangni Pathien tri mi Jentelhai, chu sandamna thu chu ei rênga kuomah a hung tlung tah a nih. 27 Jerusalema umhai le an rorĕltuhaiin ama chu an hriet naw a, thiemnaw an inchangtirna chun Sabat ni taphota an tiem hlak zawlneihai thu hril chu an intlung kimtir tah a nih. 28 Thina khop meu a chungah ieng khom an hmu naw sa khomin sukhlum dingin Pilat kuomah an ngĕn a. 29 A chungthu zieka um po po a tlung kim zoin kraws-a inthokin an lăk thlăk a, thlănah an vûi a. 30 Nisienlakhom, Pathienin ama chu mithi laia inthokin a keitho nawk tah a nih. 31 Jerusalema ama ruola hang fe vehai kuomah ni sawt tak sung a’n lâr hlak a; chuong mihai chu tuhin Israel mihai laia a thu hrepuituhai chu an nih. 32 Chu Chanchin Thra, Pathienin ei thlatuhai kuoma a lo tiem chu hril ding cheuin kan hung a nih. 33 Chu chu eini an thlahai kuomah Isu keithoa a um khan a hung hlen tah a nih. Sam nambar pahninaa,

36 “Davida ruok chu a dam sŭnga Pathien ditzawng a thaw zo hnungin a in innghil a, a thlatuhai bulah an phŭm a, a hmon hmang vong tah. 37 Pathienin a keitho ruok kha chu a hmon hmang ve nawh. 38 Chuleiin unauhai, hre ro, ama Isu lei chun suol ngaidamna thu in kuomah ka hung hril a ni hi. 39 Mosie Dana thiem in chang thei nawna po poa khan Isu ringtu taphot thiem inchangtir an ni tah. 40 Chuleiin, fimkhur ro, chuong naw chun zawlneihai lekhabua a hril kha in chungah hung tlung hlauh rawi a tih:

42 Inkhawm trìn an suok lai chun Sabat nawk phaa chuong thuhai chu hril nawk dingin mihai chun an ngĕn a. 43 Mipui an trin vong hnung chun Juda tam tak le Juda saphun, Pathien ngaisak mi tam takin Paula le Barnaba chu an zui a, an titipui a, Pathien lunginsietnaa chêng zing dingin an infŭi a.

44 Sabat nawk chun Lalpa thu chu ngaithla nawk dingin a khaw nâwt deuthawin an hung inkhawm a. 45 Nisienlakhom, Judahaiin mipui an hmu chun an thǐk ta ĕm êm a. Paula thu hril taphot chu an sĕlkal a, an hrilsiet bor bor a. 46 Paula le Barnaba chun huoisen takin an don a, “Pathien thu hi nangni kuoma hril hmasak ding a ni hrim a; nisienlakhom in hnăwl a, chatuon hringna nei tlak loa in inngai a ni ruok chun, hre ro aw, Jentelhai tieng ngha ta’ng kan tih. 47 Chuonga thaw dingin Lalpan thu a mi pĕk a nih:

48 Jentelhaiin chu thu an hriet chun an lawm a, Lalpa thu chu an chawimawi a; chatuon hringna nei dinga ruot taphot chun an ring tah a.

49 Lalpa thu chu chu ram puma chun a’n dar ta pei a. 50 Nisienlakhom, Judahai chun mi lien nuhmei ruol, Pathien tri mi leh a khuoa mi challang deuhai chu an infui por a, Paula le Barnaba chu soisa dingin mi an cho phawk a, a biela inthok chun an hnot suok tah a. 51 An thilthaw chu demin tirkohai chun an kea pilvut kai chu an thin thlăk a, Ikoniam khuoah an fe tah a. 52 Zirtirhai chu Thlarau Thienghlimin an sip a, an hlim ĕm êm a.