HABAKUK
Habakuk nuor thusim
1
1 Zawlnei Habakuk thu dong chu.2 Ieng chen hiel am Aw LALPA,
Thrangpui ngĕna ka kona hi,
Ngaithla loin i um ding a na?
“Inpawngnêkna!” ti’n ka khêk a,
Mi san suok di’n i hung si nawh.
3 Ieng leiin am thil indik lo,
I mi’n hmutir zing am a na?
Ieng leia thil poi i ngai thei am?
Sietna le inpawngnêknahai,
Ka hmaah ka hmu zing a,
Innghirnghona le inkhakna a tam.
4 Dànin kong ro a suk ta naw a,
Indiknan hmun a chang ta nawh.
Mi suolin mi fel an inhuol a,
Indikna a lûtinlè zo tah.
LALPA donna
5 “Hnamhai hi enin thlîr la,
Nasa takin makti rawh:
I dam lai ngei thawng ka ta,
Chu chu mi’n an hril pha che,
Awi khom awi nuom naw ti nih.
6 Hnam tawrot le dawn tawi tak,
Mi chêngna hmunhai rûn a,
Hnuoi khang dapa phit faitu,
Babulonhai ka chok tho mek.
7 Mi trîsim le pangzat kai an na,
An thaw dán dàn chu dàn a na,
An trànghmá chauh an ngaituo.
8 An sakorhai hang hratzie chu,
Keitê nĕkin an truonrang a,
Thimbuta satene nek khomin,
An trium lem dai a nih.
An sakor chungchuonghai chu,
Ram hla taka inthokin,
Hrât takin an hung tlàn a,
Ar la ding mu ang elin,
Dîng takin an hung inbir thla.
9 Mi rûn dinga hung an nih.
Thlalĕr thli ang an hung hrăng a,
Trieu anga tam sal an man.
10 Lalhai chu an deusaw a,
Rorêltuhai an nuizatbŭr a,
Kul khuo iengah an ngai nawh.
Inhuolna ding pil dêng pawngin,
Kulhai chu an lak zung zung.
11 Thli angin an hung nuoi a,
Hma an tawn tlang pur pur a.
An hrătna pathiena nei mi,
Thiemnawna phur ruol an nih.
Habakuk nuor voi hnina
12 Aw LALPA, chatuona mi,
I lo ni naw am a ni?
Ka Pathien, ka Mi Thienghlim,
Thi hmang naw ning ungah.
Aw LALPA, i rorêlna hlen dinga,
Anni chu i ruot an na,
Keini mi hremtu dinga
I ruot an nih, Aw Lungpui.
13 Thil thra naw enna dingin,
I mit a thienghlim taluo a,
Thil thra naw i ngai thei nawh.
Chuong chu ni siin ieng dinga,
Dawhaa che hlak mihai hi,
I ngai thei tawl am a na?
Mi rilohaiin mi felhai,
An lem zo duok duok lai khan,
Ieng dinga i to zing am?
14 Tuipuia nga le rannunghai,
Rorêltu nei lo ang elin,
Mihriemhai hi i siem a.
15 Hmêlma riloin ngakuoiin,
Anni chu a khai dok a,
A lènin a man tawl a,
A lenkhangin a fun khawm a,
Chuleiin hlimin a lawm.
16 Chuleiin a lèn kuomah,
Inthawinahai a’n hlăn hlak a,
A lenkhang kuomah rimtui;
A lèn leia hnienghnâr a na,
Fak ding inhnik petu a nih.
17 A lèn chu bun ruok zingin,
Lungsietna nei dêr loin,
Hnamhai a suksiet ding maw?