ROM
Thuhma
Rom hi Baibul pumpuia bu 45-na, bung 16, chang 433 a sei, Paulan Korinth khuoa inthoka Rom khuoa Juda mi le Jentel mi kohranhai kuoma A.D 58 vela a ziek a nih. Paula chun Rom khuo sir a, chu taka chun iemani chen rong bawl a, Spain tieng fe pei a tum a. A fe hmaa kohranhai lungril lo buotsai lawkna dingin, Kristien ringna hi iem a na, ieng anga ni tin nuna inlang suok dim a na? ti a hriet dan a ziek a nih. Hi lekhathon hi a lekhathonhai lai po poa Paula thucha pumpui hril chiengna tak a nih.
Chibai a bŭk zoin, ringna lei chaua Pathienin mi thiem a’n changtir dan thuah a lűt nghăl a (1:17). Mi po po, Juda khom Jentel khom suola an tlûk vong leiin Pathien hmaah thiem chang thei an um ta naw a, Isu ringtuhai ruok chun thiem an chang thei a, Isu an ringna leia Pathien hmaa thiem chang tahai chun Pathien leh inremna thar an nei a, thlamuongna an nei a, suol le thina thilthawtheinaa inthokin Pathien Thlarauin a sukfihlîm tâk thu a hril a. Bung 5-8 sunga hin Pathien Danin a tum a hrilfie a, Pathien Thlarauin ringtu nuna a thaw dan a suklang bok a. Pathien lunginsietna huom sunga Jentelhai thruoi lut an ni theina dingin Judahaiin Isu an hnăwl a, chu chu Pathienin mi po po ta dinga thil a lo ruot dan chu a nî ngĕi a ring thu a hril bok a. Judahaiin Isu an hnăwl song a ring bok nawh. Chun, kristienhai khawsak tlang dan ding hai, Pathien rongbawl dan indik hai, sorkar laka thaw ding hai, sie le thra hrietna hmang thiem a trûlziehai a hril zoah lawmthu hrilna le mi mal chibai bûknain a suktawp.
A sung thu tlangpui
Thuhma le thupui (1:1-17)
Mihriemin sandamna a mamawzie (1:18-3:20)
Pathienin mi a sandam dan (3:21-4:25)
Kristaa nun thar (5:1-8:39)
Pathien thiltuma Israelhai ngirhmun (9:1-11:36)
Kristienhai um dan ding (12:1-15:13)
Tlangkawmna le chibai bûkna (15:14-16:27)