Heroda a hrâng
12
1 Chuong lai chun lal Herodana kohran mi threnkhat chu hrem dingin a man khawm a. 2 Johan unaupa Jakob chu kawlhnâmin a’n sathlumtir a. 3 Chu chun Judahai a suklawm ti a hrietin Peter khom man a tum ta pei a. Hi hi chol thrang lo bei kŭt hun lai a nih. 4 Peter chu a man a, lung inah a khum a, sipai pawl li, pali peia insawkin, a’n vĕngtir a. Fekân Kŭt zo pha vantlangin a chungthu an rĕl dinga thruoi dok a tum a nih. 5 Lung ina Peter a’n tăng sung chun kohran mihaiin thrahnemngai takin Pathien kuomah an trongtraipĕk a.Lung ina inthokin Peter a suok
6 Herodan a chungthu rêl dinga thruoi suok a tum ni hma zan chun Peter chu a kut khing hnia thir khaidiet bunin, sipai pahni inkârah a in a, vêngtu dang pahni chun kotkhar bulah ngîrin an vêng tlat bok a. 7 Ngai ta, thâwk le khatah Lalpa vantirko pakhat a hung inlang a, rip sung chu a var ta phŭt el a, Peter chu a nâkah a khîk har a, “Tho vat rawh” a ta. A kuta inthok chun khaidiet chu a’n sŭt thla a. 8 Vantirko chun, “Insiem la, pheikhok bun rawh” a ta. Chuong ang chun a thaw a. Vantirko chun, “I zakuo fuol khan inzem la, mi zui rawh” a ti nawk a. 9 Peter chun a zui a, sienkhom vantirko thilthaw chu a tak ngei a nih ti a hriet nawh, zêla um anga a’n ngai leiin. 10 Vêngtu hmasa le a dottu an fe khĕl a, khawpui tienga fe suokna thir kotkhar chu an va tlung a, kotkhar chu amain a hung inhong a, an suok a, kotthlêr pakhata an fe laiin vantirko chun a maksan ta thut a. 11 A hung har chieng chun Peterin, “Lalpan vantirko a hung tir a, Heroda kuta inthok le Judahaiin ka chunga tlung ngei dinga an ngaia inthokin a mi san suok a nih ti tuhin ka hriet chieng tah” a ta. 12 Thil umzie a hriet fie hnung chun, Johan, ‘Marka’ tia an ko bok nu Mari ina chun a fe a, chu taka chun mi tam tak um khawmin an lo trongtrai a.
13 Peter chun kotkhar chu a kik a, siehlaw nunghak pakhat Rodi chu kot hong dingin a va fe a, 14 Peter rawl a hriet chun lawm taluoin, kot khom hong loin, a tlân kǐr nawk a, kotkhar bulah Peter a ngîr ti a va hril a. 15 Anni chun, “In vêt an ta hi!” an lo ta. Ama chu a thrang tlat a, sienkhom anni chun, “Ama vêngtu vantirko a ni chu” an ti nawk pei a. 16 Peter chun kot chu kik a kik a, an hang hong chun ama chu an hmu tah a, mak an ti ĕm êm a. 17 Anni rawi chu to dingin kutin a zâp a, Pathienin lung ina inthoka a thruoi suok dan chu a hril tawl a. “Hieng thu hi Jakob le unauhai va hril ro” a ta, a suok a, hmun dangah a fe tah a.
18 Khuo a hung var chun vengtu sipaihai chu Peter chunga thil tlung thuah namen loin an buoi chi-ai a. 19 Heroda chun a zong a, a hmu si naw a; vengtu sipaihai chu thil umzie an don chieng hnungin an rênga sukhlum dingin thu a pêk a. Heroda chu Judai rama inthokin Kaisari-ah a fe thlak a, chu taka chun a châm ta zing a.
Heroda thi thu
20 Heroda chu Tura le Sidon mihai chungah a lungsen hle a, chuleiin anni chu inthuruolin ama be dingin an hung a. A khawnbawl upa, a ringzo ĕm êm Blasta chu thrangpuitu dinga ruola an siem hnung chun, an ramin Heroda rama inthoka pûr an inchawk hlak leiin inrem dingin an ngĕn a. 21 Inbiekna ni ding chun Heroda chu lal thuom inbelin lalthrungphaah a thrung a, an kuomah thu a hril a. 22 Mipui chun, “Pathien rawl a nih, mihriem rawl a ni nawh” tiin an khĕk a. 23 Heroda chun Pathien kuomah chawimawina a pêk naw leiin Lalpa vantirkoin chop le chilin a hem thlŭk a, rŭlrukûtin an făk a, a thi tah a. 24 Pathien thu ruok chu a’n dar a, ringtu an hung pung pei a. 25 Barnaba le Saulan an rongbawl sin an zo chun Johan (Marka) chu thruoiin Jerusalemab inthokin an kǐr nawk tah a.