LALPA siehlaw
42
1 En ta, ka siehlaw, ka chel tlat,Ka mi thlang le ka lawmna hi;
A chungah ka Thlarau ka buok a,
Ama chun hnam tin chungah,
Indik takin ro rêl a tih.
2 Khêkin rău khâwng naw ni a,
Vantlâng hmaah rawl ki insang,
Hmangin thu hril bok naw nih.
3 Hrât nawhai sir sop naw ni a,
An beisei hmet mit naw ni a,a
Thudik tranin ro rêl a tih.
4 Hnuoi chungah rorêlna indik,
A ngir hmâ khat chăwl naw ni a,
Lung hnuolin beidong naw nih.
A dan chu thlierkar tinhai,
Beisei innghatna ni zing a tih.
5 Văn inumtira kei phartu,
Hnuoi le a sunga umhai indintu,
Hringna thuok le thlarau petu,
LALPA chun hieng hin a tih:
6 “Kei hi LALPA chu ka nih.
Indik taka ro rêl dingin,
Nang hi ka ko suok che a,
Kuta chelin hum ka ti che;
Hnam tin ta dinga thuthlung le,
Jentelhai el var ding dam,
7 Mitdelhai mit sukvar ding dam,
Ripa intânghai insuoktir a,
Thima thrunghai thruoi suok dingin.
8 Kei hi LALPA chu ka nih,
Chu ngei chu ka hming a nih.
Tu khomin ka ropuina,
An mi’n trawmpui thei naw a,
Chawimawia an min păkna khom,
Milim kan trawmpui thei nawh
9 Ngai ta u, hril lawka umhai kha,
A hung tlung kim tawl ta a,
Tu hin thu thar ka puong a,
Chu chu a hung tlung hmain,
In kuomah ka puong a nih.
LALPA inpakna hla
10 LALPA chu hla thar rempekin,
Kawl kil tawp chenin sak ro,
Tuipuia inzin le a sunga umhai,
Thlierkâra chênghai khomin,
LALPA inpâkin zâi hla rem ro.
11 Thlalĕr le a sunga khuohan,
An hla chu lo zawm ve unla,
Kedara khaw mihai hlim sien,
Sela mihan lawm hla rem sien,
Tlang sîpah lawn tunghai sien,
Inring takin khêk raw hai se.
12 Tuipui kama thlierkarhaiin,
LALPA chawimawi hai sienla,
A’n pakna hla sak raw hai se.
13 Indonaa hrât khawkheng,
Lungsena inthok suok angin,
LALPA a hung inthok suok a,
Mi râlhrâng insĕru angin,
A hmêlmahai tukdol dingin,
Inring takin a khêk suok.
14 “Sawt tak el ka to zing a,
Insûmin ka’n kei dei a;
Tuhin ka lungsen hrîk thlain,
Nauha se tuor nuhmei angin,
Inthuok hlop hlopin khêk ka tih.
15 Tlang le muolhai sukram ka ta,
Hna hringhai suktrawl ka ta,
Vadunghai sukkang ka ta,
Dilhai sukkang vong ka tih.
16 An hraw ngai lo lam tharah,
Mitdelhai chu thruoi ka ta,
An hriet lo lamah thruoi ka tih.
An hma zawna inthimna chu,
Varah inchangtir ka ta,
An lam hraw ding sukruol ka tih.
Chuong ang tak chun thawng ka ta,
Anni chu thlathlam naw ning.
17 Sienkhom milimhai ringsana,
“Kan pathien in nih” tituhai chu,
Muolpho takin hnawl kǐr ka tih.
Israel mitdelna le nasêtna
18 “Aw nasethai, lo ngaithla ro,
Mitdelhai, enin la, hmu ta ro!
19 Ka siehlaw naw, tu am mitdel?
Ka tirko naw, tu am nasêt?
LALPA siehlaw le thlang tluka,
Tu am mit indel an um a?
20 Thil tam tak ka’n entir a,
Sienkhom a ûksak si nawh.
I nä chu a’n kaw ve ngei a,
Sienkhom a hriet thei chuong nawh.”
21 A felzie suklangna dinga,
A Dan chawimawi le sukropui hi,
LALPA lawm zawng tak a nih.
22 Sienkhom hi mihai ruok hi chu,
Mi rok le suomin an um a,
Mihai tlăkkhurah an tla a,
Ripah an intăng zo a,
Suom le rok takah an thrang a,
San suoktu ding an nei naw a,
“Insuo ro” ti ding an um nawh.
23 Chuong thila chun nangni lai,
Thil la tlung ding peia khom,
Tu am ngaithlaa bengkhon cheu?
24 Tuin am suomhmang kutah,
Jakob thlahai a pek suok a?
Tuin am roktuhai kutah,
Israelhai a’n hlàn a na?
An suolsan LALPA ngei chu,
Anni pe suoktu an naw maw?
A lampui an zui nuom naw a,
A dan an zawm nuom bok nawh.
25 Chuleiin a lungsen chok chu,
An chungah a bun thlăk a,
Indona a hung intlungtir a,
Chu meichok chun a tuom a,
An hriet thiem thei chuong naw a,
Mei chun a lem zo tawla chuh,
An poisa nuom chuong dĕr nawh.