Ikoniam khuoah
14
1 Paula le Barnaba chu Ikoniam khuoa khom an thaw dan pangngaiin Judahai sunagog-ah an inkhawm a. Chu taka chun an thuhrilin mi a hnè tawl ĕm leiin Juda le Jentel mi tam takin an ring a. 2 Nisienlakhom, ring nuom ve lo Judahai chun Jentelhai chu an infui por a, unauhai chu an intheidatir a. 3 Chu hmuna chun Paula le Barnaba chu sawt fe an chăm a, Lalpa thu chu huoi takin an hril hlak a. A lunginsietna thu an hril hlak chu namnghetin Lalpan anni hmangin inchikna le thilmak tam tak a thaw a. 4 A khaw mihai chu an hung inthre a, a threnin Judahai an tran a, a threnin tirkohai an tran a. 5 Jentelhai le Judahai le an hotuhai chun anni chu soisak hrep a, lunga dêng an tum ti tirkohan an lo hrietin, 6 Lukaoni rama Lustra khuoa hai, Derbe khuoa hai le a sè vĕl rama hai an tlàn ta lem a. 7 Chuong hmuna hai khom chun Chanchin Thra an hril pei a.Lustra khuoah
8 Lustra khuoa chun mi pakhat hi a pienga inthoka ke zeng, la lawn ngai dêr lo a um a. 9 Ama chun Paula thuhril a ngaithlak ve a. Paulan ama chu a en zing a, damna dingin ringna a nei ti a hriet a, 10 inring takin, “I kein ngir suok rawh” a ta. Ama chu a’n chawm tho a, kein a fe thei el tah a. 11 Mipuiin Paula thilthaw an hmu chun, Lukaoni trongin inring takin “Pathienhai chu keini lai mihriem angin an hung trum tah a ni hi” an ta. 12 Barnaba chu Zeusa an ta, Paula chu thu hriltu tak a ni leiin Hermesb an ti thung a. 13 An Pathien Zeus tempul chu kotsuoah a um a, chu taka thiempuhai chun bawngchal le par thri an hung lak a, mipuihai le chun tirkohai kuomah inthawina inhlàn an tum a.
14 Tirko Barnaba le Paulan chu thu an hriet chun an puonhai an kei thlèr a, mipui lai chun an inchawm lut a, inring taka khêkin, 15 “Puhai, hieng thil hi ieng dinga in thaw am a na? Keini khom nangni ang boka mihriem vê el kan ni hi. Hieng thil hmang lo hi nghatsan a, van hai, hnuoi hai le tuifinriet le a sûnga um po po hai siemtu Pathien Hring tieng in nghat theina dingin Chanchin Thra kan hung hril chêu a ni hih. 16 Tuta hmâ khan hnam tin anni dan ang peia um a phal a. 17 Chuong sà khom chun sui suok thei lo dingin ama a’n thup ngai nawh; a thil thra thawin ama a’n hriettir a, vana inthoka ruotui hung pein, a hun takah in thlaihai a’n ràtir a, fak ding tam tak a pêk chĕu a, in lungril a sukhlim ĕm êm hlak a nih” an ta.
18 Chuong thu chu hrilin mipuihai chu an kuoma inthawina inhlăn lo dingin an khap thei ta hrăm a.c 19 Nisienlakhom, Antiokei le Ikoniama inthokin Juda threnkhat an hung a, mipui chu an hung inhmin a, Paula chu lungin an dĕng a, a thi tah sawnin khuoa inthokin an hnŭk suok a. 20 Sienkhom, zirtirhaiin an ngir huol laiin ama chu a hung tho a, khuoa chun a lût nawk a. A zinga chun Barnaba leh Derbe-ah an fe a.
Suria ram Antiokeiah an kǐr nawk
21 Derbe-a chun Chanchin Thra an hril a, zirtirah mi tam tak an siem hnungin Lustra-ah an kǐr a, chu taka inthokin Ikoniama hai, Antiokeia hai an fe pei a. 22 “Rinum tam tak tuorin Pathien ram ei lut ding a ni hrim a nih” tiin zirtirhai lungril chu an suknghet a, ringna chu chel tlat dingin an infŭi a. 23 Kohran tinah upa dinghai an thlangpui a, bu ngheiin an trongtrai a, an ring Lalpa kuomah an inkoltir pei a. 24 Pisidi ram chu an fang suok a, Pamfulia ram an hung tlung nawk a. 25 Perga-ah thu an hril a, Atali khuoah an zu fe a, 26 chu taka inthok chun longin an suok a, Antiokei an tlung nawk tah a. Antiokeia inthok hin a nih an sin thaw ding tak thaw dinga unauhaiin Pathien lunginsietnaah inkoltir a, inzin suok an tran chu ni. 27 An tlung chun kohran mihai an ko khawm a, Pathienin anni hmanga thil a thaw po po le Jentelhai ta ding khoma ringna kot a hongpek zie thuhai chu an hril a. 28 Ringtuhai kuoma chun sâwt fé an chăm a.