Sabat inser thu
6
1 Sabat voi khat chu huit bil an fe thleng a, a zirtirhaiin a vuihai chu an thliek a, kutin a hawng an nuoi fai a, a tak chu an băr a. 2 Farisai threnkhat chun “Ieng dinga Sabat nia thaw thieng lo in thaw am a na?” an ta. 3 Isun anni chu a don a, “Davida le a ruolhai an trâmsawl truma an thilthaw kha in tiem naw a ni? 4 Pathien inah a lut a, thiempuhai chau fak thieng hlanbeia chu a lâk a, a fâk a, a ruolhai khom a sem thu kha?” a ta. 5 Ama bokin, “Mihriem Naupa hi Sabat Lal a nih” a ta.Kut zeng sukdam thu
6 Sabat ni trum khat nawk chu sunagogah a lût a, a zirtir a, chu taka chun mi pakhat kut chang tieng zeng a um ve a.
7 Dan zirtirtuhai le Farisaihai chun a hĕkna ding an hmu theina dingin Sabat nia a sukdam ding le ding naw an bithla zing a. 8 An lungril chu a hrietin zeng kuoma chun, “Tho la, a laia hin ngir suok rawh” a ta. Ama chu a tho a, a laia chun a ngir suok a. 9 Isun an kuomah “Sabat nia sukthrat am a thieng suksiet, sandam am a thieng sukhlum? ti kan don cheu a nih” a ta. 10 An rêng chun a en vel a, zeng kuomah, “I kut phar rawh” a ta, a hang phar a, a kut chu a dam ta nghal a. 11 Anni rawi chu lungsenin an puok koi văng vâng a, Isu chu ieng tia law di’m ti ngaituoin an inrawn khawm a.
Tirko sawm le pahni a ruot
12 Chuong hun lai bok chun zan khat chu trongtrai dingin tlângah a fe a, zankhuoin Pathien kuomah a trongtrai a. 13 Khuo a hung var chun a zirtirhai chu a ko a, anni laia inthokin sawm le pahni a thlang suok a, an hmingah tirko a’n bùk a; 14 Simon, Peter tia an ko bok dam, a unau Andri hai, Jakob le Johan hai, Filip le Barthalomai hai, 15 Mathai le Thoma hai, Alfai naupa Jakob hai, Simon, Zealot an ti bok hai, 16 Jakob naupa Juda hai le Juda Iskariot, a’n mantirtu hai chu an nih.
Mipuihai laia rongbawlna
17 Anni ruol chun a fe thla a, hmun zawlah a ngîr a. Chu taka chun a zirtirhai tam tak le Judai ram hmun tina inthok dam, Jerusalema inthok dam, Tura le Sidon vel tuifinriet kama inthok damin mipui tam tak, a thu ngaithla nuom le an natna sukdam beiseia hunghai chu an um a; 18 thlarau tirdakum soisak khom an hung dam tah a. 19 Amaa inthoka thilthawtheina suok a, mi tin an dam pei lei chun mipui po poin them seng an tum a.
Hamthratna le vangduoina
20 Chun a ngha vel a, zirtirhai tieng chu enin:
Nangni pasiehai, in hamthra,
Pathien ram chu in ta a ni si a;
21 Tuta phingtrâmhai, in hamthra,
In la tlai ding a ni si a;
Tuta traphai, in hamthra,
In la’n nui ding a ni si a;
22 Mihriem Naupa leia mihaiin theida a, tuithlâr a, hal a, hming se dêra an hnawl pha cheu chu in chan a va thra awm ngei! 23 Chu huna chun lawm unla, hlimin inchawm ro, vanah in lawmman a um rawn si a. In thlatu zawlneihai chunga khom chuong ang chun an thaw hlak kha.
24 “Nangni tuta hausahai, in chung a rik ie,
Inhoi in chĕn zo dĕr ta si a.
25 Nangni tuta khophai, in chung a rik ie,
In phǐng a la trâm ding a ni si a;
Nangni tuta innuihai, in chung a rik ie,
Lungngaiin in la trap ding a ni si a.
26 Mi po poin an inpăk phâ chĕu in chung la rik a tih, chuong ang bokin in thlatuhai khomin zawlnei tehlĕmhai chungah an thaw hlak kha.
Hmêlmahai hmangai ding
(Mt 5:38-48; 7:12)
27 “Chuleiin, ka thu ngaithlatuhai, ka hril chêu hi, in hmĕlmahai chu hmangai unla, a theidatu cheu chungah thrat insuo unla, 28 trongsie inphurtuhai chêu chu malsawmna hnipek unla, sukdudatuhai chêu chu trongtraipek ro. 29 I bieng khing tieng bentu chu khing tieng khom dawpek la, i puon lapêktu che chu i zakuo a lak khom sêl naw rawh. 30 A hnitu che taphot chu pe la, i thil nei lakpektu che chu thrîn nawk ta naw rawh. 31 In chunga miin thaw sien in ti ang charin mi chunga khom thaw ve ro. 32 “Nangni hmangaituhai chauh in hmangai hin misuolhai nêka in chuong liemna bik iem a um? Anni khomin anni hmangaitu chu an hmangai ve tho annawm. 33 In laka thrahai chunga chauh thrat in insuo hin mi suolhai nêka in chuong liemna bik iem a um a? Anni khomin chuong ang chun an thaw ve tho annawm. 34 Hmu kîr nawk in beisei theinahai kuoma chauh thil in inpŭktir hin mi suolhai nêka in chuong liemna bik iem a um? Anni khomin a ngai hmu kîr nawk ding chun misuolhai kuomah an inpŭktir ve tho annawm. 35 In hmĕlmahai chu hmangai lem ro; an chungah thil thra thaw unla, hmu kîr nawk beisei kher loin inpûktir ro, chuongchun lawmman tam tak hmung in ta, Chunghnungtak nauhai ni’ng in tih. Ama chun lawm nachang hre lohai le mi suolhai khom a lunginsiet vong si a. 36 In pain a lunginsiet chêu ang bokin nangni khom inlunginsiet tuo hlak ro.
Mi dang soisel naw rawh
(Mt 7:1-5)
37 “Mi soisel naw ro, chuongchun soiselin um nawng in tih; tu khom thiem naw inchangtir el naw ro, chuongchun thiem naw inchangtir nawng an ti cheu; ngaidam ro, chuongchun ngaidamin um in tih. 38 Pe ro, chuongchun pĕkin um in ta, inkhǐna hlawka nam dĕn, sawi muka liem zar zar chu in chungah vŭrin um a tih. Inkhǐna in hmang ngei khan an inkhǐpek ding cheu a ni si a” a ta. 39 Chun, an kuomah hi tekhintu khom hi a hril a. “Mitdelin mitdel bok a thruoi thei ding am a ni? An pahniin khurah an tla el naw ding maw? 40 Inchûktu chu a zirtirtu chungah a um nawh, amiruokchu tu khom nasa taka inchûktu chu a zirtirtu tluk a hung ni thei. 41 Iengtiziea mani mita thingtum um chu ngaimaw si loa i unau mita hmunhnok hlek um chu i ngaimaw? 42 Mani mita thingtum hmu si loin i unau kuomah, ‘Unau, i mita hmunhnok hlek kha mi’n lak suoktir rawh’ iengtin am i ti thei ding? Nang lêmdertu, i mita thingtum kha la suok hmasa zet rawh, chuongchun i unau mita hmunhnok hlek um chu fie takin hmu thei i tih. 43 “Thing thra chu a ra a se ngai nawh, thing sie hlak a ra a thra ngai bok nawh. Thing tin nina chu a raa inthoka hriet thei a nih. 44 Tu khomin hling bukah theichang an lo ngai nawh; intŭn buka inthokin grep ra an lo ngai bok nawh. 45 Mi thra chun a lungril robawm thra inthokin thil thrahai a phor suok hlak a; mi suol chun a lungril suola thil suol a paihai chu a phor suok hlak. Lungrila sip liem chu bauin a hril suok hlak si a.
Lungphŭm chi hni
46 “Ka thu zawm si loin ieng dinga ‘Lalpa, Lalpa’ in mi ti hlak am? 47 Tu khom ka kuoma hung a, ka thu hre a, zawmtu chu tu ang am a na ti hril ka ti chêu. 48 Ama chu in bawltu, inthûk taka hnuoi cho a, lungpui chunga lungphŭm remtu ang chu a nih. Tui a hung lien a, tuizăng khauin a hung hrŭt a, sienkhom a sukhning thei nawh, a bawl nghet ĕm leiin. 49 Amiruokchu, ka thu hrea zawm si lo chu lungphŭm nei lo, hnuoi chung ela in bawltu ang chu a nih; chu in chu tuizăng khauin a hung hrŭt a, a chim se nghal a, a tlu hmât ta ruop el a nih” a ta.