2 Tirko sawmpahnihai hming chu: a hmasa takin Simon, Peter an ti le a unau Andri, Zebedai naupa Jakob le a unau Johan, 3 Filip le Bartholomai, Thoma le siekhontu Mathai, Alfai naupa Jakob le Thadai, 4 Kanan mi Simon le a’n mantirtu Juda Iskariot hai an nih.

5 Chuong sawmpahnihai chu Isun a tir suok a, hieng hin thu a pêk a: “Jentelhai lai fe naw unla, Samari mihai khuo sir bok naw ro; 6 beram inhmang Israelhai kuoma chun fe lem ro. 7 In inzinnaah, ‘Van ram chu a hnâi tah’ ti pei ro. 8 Damnawhai sukdam unla, mithihai kei tho unla, phârhai sukthieng unla, ramhuoihai hnot suok ro. A thlăwnin in hmu a, a thlăwnin pe ro. 9 In kawngchŭnah rangkachak le tangkaruo le dâra siem tangka hrim hrim chûn sa naw unla; 10 in inzinnaah mansa amanih, zakuo inthlâkna ding amanih, pheikhok amanih, hmol amanih chawi bok naw ro; sinthawtu chu fak hmu tlak a ni si a.

11 “Khaw lien le khaw chîn in lutna taphotah tlungna tlâk ăwm mi zong unla, a khuo in suoksan chenin chu taka chun tlung zing ro. 12 Ina in lŭtin chibai bûk ro. 13 Chu ina chênghai chu chibai dong tlâk an ni chun in thlamuongna thu^a chu an chungah tlung raw se. 14 Mi tu khomin an lo lawm naw chêu a, in thu khom an lo ngaithlak naw chun, chu ina inthok amanih, chu khuoa inthok amanih in suok hunah in kea pilvut chu thin thla ro. 15 Thu dik ka hril cheu hi, rorêl nia chun chu khaw tuor ding nêk chun Sodom le Gomora tuor chu zieum tak ni lem a tih.

16 “Satene ruol laia beram inluttir ang elin nangni khom ka tir suok chêu a ni hi; chuleiin rûl anga var le vàthrû anga poi tawk loin um ro. 17 Mihai laka chun invêng fimkhur ro; Sanhedrin kutah inhlănin, sunagoga hai invuoktir an ti chêu. 18 Keima leiin hotuhai le lalhai hmaah, anni le Jentelhaiin ka thu an hriet theina dingin, la thruoi an ti chêu. 19 Chuonga an man pha cheu chun iem in hril ding le in hril dan ding thuah lungkham naw ro. In hril ding chu a hun takah inhriettir ni’ng in tih. 20 A hriltu chu nangni ni loin, nangni hmangin in Pa Thlarau chun a hril lem ding a ni si a.

21 “Chun, sukhlum dingin unaupa chun a unaupa inmantir a ta, pa khomin a naupa inmantir a ta; nauhai khomin an nu le pahai do an ta, sukhlum an tih. 22 Ka hming leiin mi po po theida ni’ng in ta; a tawp chena ngir nghettu^b chu sandamin um a tih. 23 Hmun khatah an suknomna pha cheu hmun dangah tlansan pei ro. Thu dik ka hril chêu hi, Mihriem Naupa hung hmain Israel khuohai sir suok hman naw ti niu.

24 “Inchuklai chu a zirtirtu chunga mi a ni naw ang bokin siehlaw khom a pu chunga mi a ni nawh. 25 Inchuklai chu a zirtirtu ang le siehlaw chu a pu ang a ni chu a ta dingin a huntawk. In neitupa hman hi Belzebub an ti si chun a sungkuohai lem chu an va hril siet nasa zuol ding de aw!

26 “Chuleiin, anni chu tri naw ro. Inlang lo dinga thup ieng khom a um naw a, hriet lo dinga ip ieng khom a um bok nawh. 27 Thimthama ka hril chêu hi khaw varah hril ro; biekrûka ka hril chêu hi in chung sîpa inthokin tlâng insampui ro. 28 Taksa sukhlum thei, sienkhom thlarau sukhlum thei si lohai chu trì naw unla, hremhmuna thlarau le taksa sukbohmang theitupa ruok chu trì hlê ro. 29 Chongzong pahni poisa khatin^c an zor hlak an naw maw? Nisienlakhom, anni laia pakhat khom in Pa thu loin hnuoiah tla naw nih. 30 In sam zai chen hin inchik vong a nih in sonnaw. 31 Chuleiin, tri naw ro, chongzong tam tak nêkin in hlu lem si a.

32 “Chuongchun, mihai hmaa mi tran taphot chu kei khomin ka Pa vana mi hmaah tran vèng ka tih. 33 Tu khom mihai hmaa mi’n phattu ruok chu kei khomin ka Pa vana mi hmaah inphat ve’ng ka tih.

34 Hnuoia hin inremna inlèngtir dinga hung ka ni sawn naw ro; inremna inlengtir ding ni loin, kawlhnâm inlèngtir dinga hung ka ni lem. 35 Naupa chu a pa indotir ding dam, naunu chu a nu indotir ding dam, mo chu a tarpi indotir ding dama hung ka ni lem. 36 Miin a hmêlma chu ama sungkuo laia mi ngei ni’ng a tih. 37 Tu khom mani nu amanih, pa amanih keima nêka hmangai lemtu chu ka mi ni tlâk a ni nawh. Tu khom keima nêka mani naupa hmangai lem chu ka mi ni tlâk a ni nawh. 38 Tu khom mani kraws puta mi zuitu naw chu ka mi ni tlâk a ni nawh. 39 Tu khom mani nun hum tum chun chân a ta, keima leia nun chânhai chun hum an tih.

40 “Tu khom a lawmtu cheu chu keima mi lawm an nih; tu khom mi lawmtu chu mi tirtu lawm an nih. 41 Zawlnei chu zawlnei a nina leia lawm taphot chun zawlnei lawmman hmung an tih; mi fel chu mi fel a nina leia lawm taphot chun mi fel lawmman hmung an tih. 42 Thu dik tak ka hril chêu hi, hieng mi chîn tak laia mi tu khom ka zirtir a ni leia tuisik no khat lo petu chun a lawmman chu chân naw top a tih” a ta.