3 A’n mantirtu Juda chun Isu chu thiem naw an inchangtir ti a hriet phing leh a’n sǐr a, tangka sawmthum kha thiempu lalhai kawlah a va thak kǐr a. 4 “Tu poi khom hril lo, thi dinga ka’n mantir kha ka lo thaw suol a nih” a ta. Anni ruok chun, “Chu chu kan ta dingin iem an leh? Nangin i chang chang changpui rawh” an tisan a. 5 Chuongchun, tangka chu tempul sungah a deng lut a, a fe a, a va’n awk hlum a. 6 Thiempu lalhai chun tangka chu an lăk a, “Hi hi tempul tangka bawma sie a thieng nawh, thisen man a ni si a” an ta. 7 Chuongchun, an inrawn a, mikhuol thihai phŭmna ding bêlhemtu hmun inchawknaa hmang dingin thu an rêl a. 8 Chu lei chu a nih chu hmun chu tu chena ‘Thisen Hmun’ tia an ko tâkna chu.

11 Isu chu Lârsap hmaah a ngîr a, Lârsap chun, “Judahai lal i ni maw?” tiin an don a. Isun, “I ti annawm” a ta. 12 Thiempu lalhai le upahai hĕkna chu a ieng khom a don nawh. 13 Chuongchun Pilatin, “An hĕkna zozai che hi i hriet naw maw?” a ta. 14 Nisienlakhom, Isun a don dĕr naw a, an hĕkna pakhat khom a don naw leiin Lârsap chun mak a ti hle a.

15 Lârsap chun kût nia insuo dinga mipuiin tâng an hni taphot chu a’n suopek hlak a. 16 Chuong lai chun mi suola inthang pakhat Baraba an ti chu lung inah a’n tâng a. 17 Chuongchun, mipui hung pung khawmhai kuoma chun Pilatin, “Tu am insuopek lang chêu in nuom- Baraba am Isu, Krista an ti lem hi?” a ta. 18 Thîkna leiin Isu chu a kutah an hung pek suok a nih ti a hriet si a.

19 Rorêlna thrungphaa Pilat a la’n thrung zing laiin a nuhmeiin, “Kha mi fel tak chunga khan ieng khom thaw naw rawh, voisun hin ama ka mang thuah nasa takin ka tuor a nih” tiin thu a hung incha a. 20 Nisienlakhom, thiempu lalhai le upahai chun Baraba insuoa Isu chu sukhlum dinga ngĕn dingin mipui chu an thu hne a. 21 Lârsap chun, “A tu lem am insuopek lang chêu in nuom a?” a ti nawk a. 22 Anni chun “Baraba” an ta. Pilatin an kuomah, “Chuong an leh Krista an ti Isu hi ieng tin am thawng ka ta?” tiin a’n don a. An rêngin, “Kraws-ah hemde rawh” an ta. 23 Lârsap chun, “Ieng leiin am? Iem a thawsuol a?” a ta. Nisienlakhom, mipui chu inring nawk zuolin, “Kraws-ah hemde rawh” tiin an khêk tuor tuor a.

24 Pilat chun a khâwk dèr ti a hmuin le buoina nasa lem suok el dinga a hriet leiin tui a lâk a, mipui hmaa chun a kut a sâwp a, “Hi mi fel thisena hin ka’n thieng, nangnin in láw làw law ro” a ta. 25 Mipui chun an rêngin, “A thisen maw chu keini le kan nauhai chungah um raw se” tiin an don a. 26 Chuongchun, Baraba chu a’n suopek a, Isu ruok chu a’n vuoktir a, hemde dingin a peksuok ta a.

27 Chu zoah Lârsap sipaihai chun Isu chu Praitorian-ah^b an thruoi a, anni rawi po chun an ngir huol a. 28 A zakuo an hlippĕk a, kor fuol senduk an inhăktir a. 29 Chun, lukhum dingin hling an inkuol a, an inkhumtir a. A kut chang tieng luong hmol an inchawitir a, a hmaah an dingthrathruon a, “Chibai, Judahai lal” tiin nuizat bûrin an hmang a. 30 Chun, chil an sakkhum a, hmol chu an lakpek a, a luah an vuok an vuok a. 31 Nuizat bûra an hmang zoin a zakuo chu an hlîppĕk a, ama zakuo pangngai chu an inhăktir nawk a, kraws-a hemde dingin an thruoi tah a.

32 An fe laiin lampuiah Kurini khaw mi, a hming Simon an hmu a, Isu kraws putpui dingin an man lui a. 33 Golgotha, ‘Lu ru hmun’ an ti chu an va tlung a; 34 chu taka chun dawn dingin uoiin, thil kha le pol an pĕk a, a hang intem a, a dawn nuom naw a. 35 An hemde zo chun a silfenhai chu thrum vawrin an insem a. 36 Chu taka chun inthrungin ama chu an vĕng a. 37 Ama an hĕkna thu, ‘Hi hi Isu, Judahai lal a nih’ ti ziek chu a lu chungah an tăr a.

38 Ama ruol chun suomhmang pahni an hemde ve a, a chang tieng pakhat, a voi tieng pakhat. 39 Mi inlon hut huthai chun an lu thinin an biek-el a, 40 “Nang, tempul hi thrieka ni thuma indin nawk theitu, insukdam rawh. Pathien Naupa i ni takzet chun kraws-a inthok khan hung trum ta la!” an ta. 41 Chuong ang bokin, thiempu lalhai chun Dan zirtirtuhai le upahai leh nuizatin, 42 “Mi dang hman a sukdam hlak, mani insukdam thei si lo! Israel lal a ni hi! Tuhin kraws-a inthokin hung trum sien, a awi khom ei awi rawi mawh! 43 Pathien a ring annawm, Pathienin a nuom chun sansuok raw se chu, ‘Pathien Naupa ka nih’ a ti kha” an ta. 44 Ama le an hemde suomhmanghai khomin chuong ang bok chun an ti-el a.

45 Sùn dâr sawmpahnia inthoka chawhnung dâr thum chenin khawvel pumpui a hung inthim ta vong a. 46 Dar thum vêlah Isu chu inring takin, “Eloi, Eloi, lama sabakthani” tiin a khêk suok a, chu chu “Ka Pathien, ka Pathien, ieng dinga i mi maksan am?” tǐna a nih. 47 A bula ngîr threnkhatin chu chu an hrietin, “Elija a ko a ni chu” an ta. 48 Anni laia pakhat chu a tlân nghăl a, sipon a lâk a, uoiin thŭrah a’n chie a, hmolah a tăr a, Isu chu indawntir a tum a. 49 Mi dang chun, “Ngaisak naw rawh. Ama san dingin Elija a hung hrim am, en ei tiu” an ta. 50 Isu chu inring takin a khêk nawk a, a thlarau an thla tah a.

51 Chu char chun tempul puonzâr chu a chung tienga inthoka a hnuoi tieng chenin a’n thlĕr suok a, simkhawlei a hung inhnǐng a, lungpuihai an koi dar a. 52 Thlănhai an inhong a, mi thienghlim tam tak lo in tahai taksa khom keitho an ni tah a. 53 A tho nawk hnung chun chuonghai chu thlăna inthoka hung suokin khaw thienghlima chun an lŭt a, mi tam tak kuomah an inlăr a. 54 Sipai za hotu le a rawihai, Isu vengtuhaiin lirhning le thil hung tlunghai an hmu chun an tri ĕm êm a, “Hi pa hi Pathien Naupa a ni ngei el” an ta.

55 Chu taka chun nuhmei tam tak, a rong bawla Galilia inthoka Isu hung zuituhai chu an um bok a, hla taka inthokin an thlǐr a. 56 Chuonghai lai chun Mari Magdalin hai, Jakob le Josefa nu Mari hai le Zebedai nuhmei khom an thrang a.

57 Zan tieng chun Arimathai khuoa mi hausa pakhat, a hming Josefa, Isu zirtir laia thrang ve chu a hung a. 58 Ama chu Pilat kuomah a fe a, Isu ruong a hni a, 59 Pilat chun a lo phalpĕk a. Chuongchun, Isu ruong chu Josefa chun a’n hlăwm a, puon zai inhmi fâi takin a tuom a, 60 ama thlân thar, lung ker kuoka chun a’n zăl a, thlăn kotkhar chu lung lien takin a khăr a, a fesan tah a. 61 Chu taka chun Mari Magdalin le Mari khom an um ve a, thlăn zâwna chun an inthrung a.

62 A zing, Sabat ni chun thiempu lalhai le Farisaihai chu a honin Pilat kuomah an fe a, 63 “Pu, Hlĕmtu khan a dam laiin, ‘Ni thum hnungah tho nawk ka tih’ a ti kan hriet zing a. 64 Chuleiin, thlăn chu ni thum ni chena vêng thra dingin thu pe rawh. Chuong naw chun a zirtirhaiin ama chu inru hmangin, vantlâng kuomah mithi laia inthokin a tho nawk tah ti hlauh rawi an ta, hlĕmna nuhnung lem chu a hmasa nêkin thra naw nawkzuol a tih” an ta. 65 Pilatin an kuomah, “Vêngtu sipaihai thruoi unla, thlăn chu a him thei dan taka in hriet angin invĕngtir ro” a ta. 66 Chuongchun an fe a, thlăn lungkhàr chu an inchik a, vêngtuhai chu an invengtir tlat a.