Isu chungthu an rêl
19
1 Chun, Pilatin Isu chu a thruoi a, a’n vuoktir a. 2 Sipaihai chun lukhum dingin hling an inkuol a, an inkhumtir a, korfuol senduk an inhàktir bok a, 3 Inzûr zuta panin “Chibai, Judahai lal!” tiin a hmaiah an ben a. 4 Pilat chu tuolah a va suok nawk a, an kuomah, “En ta u, a chungah thu poi ieng khom ka hmu nawh ti hrietna dingin in kuomah ka hung thruoi suok a ni hi” a ta. 5 Hling lukhum khum le korfuol senduk hâka Isu a hung suok chun Pilatin, “En ta u, hi pa hi a ni hih” a ta. 6 Thiempu lalhai le an thruoihruoihaiin an hmu chun, “Kraws-ah hemde rawh, kraws-ah hemde rawh” tiin an khêk a. Pilat chun, “Nangnin thruoi unla, kraws-ah hemde ro chu, kei chun a chungah thil poi ka hmu nawh” a ta. 7 Judahai chun, “Dan kan nei a, chu dan ang chun a thi ding a nih, Pathien Naupaa a’n sâl leiin” an ta. 8 Pilatin chu thu a hriet chun a tri zuol a. 9 Insŭngah a lût nawk a, Isu kuomah, “Khaw laia inthoka hung che?” tiin a’n don a, sienkhom Isun a don nawh. 10 Pilat bokin, “I mi don nuom naw vei a ni maw? Insuo thei che ka na, kraws-a hemde thei che ka ni bok ti i hriet naw maw? a ta. 11 Isun a don a, “Chung tienga inthoka pĕk i ni naw chun ka chungah ieng khom thaw thei nei naw ti nih. Chuleiin, i kuta kei mi hung pe suoktu khan suol a phur nasa lem a nih” a ta.12 Chu taka inthok chun Pilatin ama chu insuo dan kong a zong a, sienkhom Judahai chun, “Hi pa hi i’n suo vai chun Kaisar ruolpa ni naw ti nih. Tu khom lala insiem chu Kaisar khingtu a nih” tiin an khĕk a.
13 Chuong thu chu Pilatin a hrietin Isu chu a hung thruoi suok a. Lungrem (Aramik tronga Gabbatha an ti) a chun a rorelna thrungphaah a thrung a. 14 Fekân Kŭt urlâwk ni sŭn chang lai a na, Judahai kuoma chun, “En ta u, in lal hi” a ta. 15 Anni chun, “Sukbohmang rawh, sukbohmang rawh, kraws-ah hemde rawh” tiin an khĕk a. Pilat chun, “In lal hi hemdeng ka ti maw?” a ta. Thiempu lalhai chun, “Kaisar naw chu lal dang kan nei nawh” tiin an don a. 16 Chuongchun, hemde dingin an kuomah Pilatin a pêk suok a, Isu chu sipaihaiin an thruoi tah a.
Isu an hemde
17 Mani kraws putin, ‘Luru Hmun’, Aramik tronga ‘Golgotha’ an ti chu panin a suok a. 18 Chu taka chun an hemde a, mi pahni dang leh, a sîr tuokah pakhat ve ve, a laiah Isu. 19 Pilatin târ dinga a ziek, ‘NAZARET ISU, JUDAHAI LAL’ ti chu kraws lêra chun an tăr a. 20 Thil târ chu Juda mi tam takin an tiem a, an hemdèna hmun chu khawpui bul a ni leiin Aramik, Latin le Grik trongin an ziek a. 21 Judahai thiempu lalhai chun Pilat kuomah, “Judahai lal’ tiin ziek naw rawh. ‘Judahai lal ka nih a tih’ tiin ziek lem rawh” an ta. 22 Pilat chun, “Ka ziek kha ka ziek zo tah” a ta.
23 Kraws-a Isu an hemde chun sipaihaiin a silfen an hlǐp a, sipai pakhatin chan khat senga an chang theina dingin chan liin an insem a. A korfuol an lâk bok a, chu chu thrui lo zakuo, a rînga inthoka a hmawr chena pum khawng a nih. 24 Anni chun, “Hi chu pot thlêr loin, a changtu ding enna dingin thrum vâwr ei tiu” an ta. Pathien thua
ka silfênhai an insem a,
Ka zakuo dingin thrum an vawr a
ti kha a hung tlungna dingin a nih. Chu chu a nih sipaihaiin an thaw chu.
25 Isu kraws bula chun a nu le a nu zuorpui dam, Klopa nuhmei Mari dam, Mari Magdalin hai dam chu an ngir a. 26 Isun a nu le a bula ngir zirtir a hmangai chu a hmuin a nu kuomah, “Nu, en ta, i naupa kha” a ta; 27 zirtir kuoma khom chun, “En ta, i nu kha” a ti bok a. Chu taka inthok chun chu zirtir chun ama inah a thruoi tah a.
Isu thi thu
28 Thil po po a tlung kim tah ti Isun a hriet chun Pathien Lekha thu a tlung kimna dingin, “Ka dang a châr” a ta. 29 Bêl, uoiin thŭra sip a um a, chu taka chun sipon an inchie a, hmol lĕrah an târ a, a hmŭr leh an hang chuktuo a. 30 Uoiin thŭr an pek zo chun, Isun “A kin tah” a a ta, a lu a kûn a, a thlarau an thla tah a.
31 Judahai Sabat urlâwk ni a na, a zing chu Sabat an hmang ursun ni ding a nih. Sabat laia a ruong kraws-a a um zing nawna dingin, an mi hemdehai ke chu vaw tliek a, an ruong lăk phalna Pilat kuomah an hni a. 32 Chuongchun, sipaihai chu an hung a, Isu ruola an hemde pakhat ke chu an hang vuok tliek phot a, pakhat dang ke khom chu an vuok tliek nawk a. 33 Isu bul an hung tlung chun a thi tah ti an hriet a, a ke chu an vuok tliek ve nawh. 34 Amiruokchu, sipai laia pakhat chun a nâkah feiin a sun a, thisen le tui a hung inbaw ta huk a. 35 Hi hi mit ngeia hmutu hril a na, a hril chu a’n dik a nih. Thu dik a hril ti a hriet a, nangni khoma in ring theina dingin a hril a nih. 36 Pathien Lekha thua “A ru pakhat khom suktliek ni naw nih” ti kha a hung tlung kimna dinga hieng thil hi hung tlung a nih. 37 Pathien Lekhabu danga chun “An sunpa ngei chu la en an tih” a ti bok.
Isu an phŭm
38 Chu hnung chun Arimathai khuoa mi Josefa, Judahai a tri leia a rûka Isu zuitu chun Isu ruong inhlawm phalna chu Pilat a hni a, a lo phalpĕk a, a ruong chu a lâk a. 39 Nikodem, kha hmaa zăna Isu hung pantu khom kha rimtui murra le aloi chokpol, kilogram sawmthum le pali lai chawiin a hung ve a. 40 An pahni chun Isu ruong chu an làk a, Judahai inphŭm dan angin a ruong chu rimtui leh puon zai inhmiin an zem a. 41 An hemdena hmuna chun huon a um a, chu taka chun tu khom la zăl ngai nawna thlăn thar a um a. 42 Judahai Sabat Urlawk ni a ni lei le thlan chu a bul ela um a ni leiin, chu taka chun Isu chu an inzăl tah a.