4 A chunga thil hung tlung ding po po chu Isun a hriet vong a; a va suok a, “Tu am in zong?” a ta. 5 Anni chun, “Nazaret Isu” an ta. 6 Isun, “Keima hi ka nih” a ta. A’n mantirtu Juda khom chu anni lai a ngîr a. “Keima hi ka nih” a ti charin hnung tieng an intawl a, hnuoiah an tlu phung a. 7 “Tu am in zong?” tiin a’n don nawk a, “Nazaret Isu” an ta. 8 “Kei ka ni thu ka hril ta chêu kha. Kei mi zong in ni chun mi dang po hi chu lo inkieng raw hai se” a ta. 9 A hmaa “Nangin i mi pĕkhai kha pakhat khom ka’n hmang nawh” a ti kha a hung tlung kim theina dingin hi thu hi a hril a nih.

10 Simon Peter chun a kawlhnâm pai chu a phawi a, Thiempu laltak siehlaw chu a sât a, a nakawr chang tieng a fik thlak a (Siehlaw hming chu Malka a nih). 11 Isu chun Peter kuomah, “I kawlhnâm kha a pâiah thun rawh. Pain dawn dinga no a mi pĕk chu ka dawn naw ding maw?” a ta.

12 Chuongchun, sipai ruol le an hotu le Tempul vengtu Judahai chun Isu chu an man a, an khuop a, 13 Anna kuomah an thruoi hmasa phot a. Anna chu chu kuma thiempu laltak Kaiafa tarpu a nih. 14 Kaiafa hi a nih, “Mipui aia mi pakhat thi a thra lem” tia thurawn Judahai kuoma petu kha.

15 Simon Peter le zirtir dang pakhatin Isu chu an zui a. Chu zirtir chu Thiempu laltak hmĕlhriet a na, thiempu laltak tuol zawla chun Isu leh a ruolin a lŭt ve a. 16 Peter ruok chun tuolah a lo nghăk a. Thiempu hmĕlhriet, zirtir kha a hung kǐr nawk a, kotkhar vengtu nunghak chu a biek a, Peter chu a thruoi lŭt a. 17 Kotkhar vêngtu nunghak chun Peter kuomah, “Nang khom hi pa zirtir laia mi i ni ve an naw maw?” a ta. Ama chun, “Ni lo e!” a ta. 18 Siehlawhai le sipaihai chu chu taka chun an ngir a, a dei leiin mei an sĕm a, an awi a, anni lai ngir vein Peter khomin mei lum chu a awi ve a.

19 Thiempu laltak chun Isu chu a zirtirhai chanchin le a thu zirtir chungchang thu chîk takin a’n don a. 20 Isun, “A’n langin vantlang hmaah thu ka hril hlak. Sunagoga hai, tempula hai le Judahai pung khawmnaa hai ka zirtir rop hlak a, a rûkin ieng khom ka hril ngai nawh. 21 Ieng leia kei i mi’n don? Ka thu hril ngaithlatuhai kuomah ieng am ka hril indon lem ta la, iem ka hril ti an hriet annawm” a ta. 22 A hril zo chun vêngtu sipai ngirhai laia pakhat chun, “Thiempu lal chuongchun i don lèt ngam maw!” tiin Isu hmaiah a ben a. 23 Isun a kuomah, “Thu indik lo ka hril a ni chun hril suok la, ka hril si naw chun ieng dinga i mi ben am?” a ta. 24 Anna chun Isu chu khuop pumin Thiempu laltak Kaiafa kuoma chun a’n thruoitir a.

25 Ngir puma Peterin mei a awi ve lai chun, “Nang khom a zirtirhai laia thrang ve i ni maw?” an ta. Peter chun, “Ni lo e” tiin a’n phat a. 26 Thiempu laltak siehlawhai laia pakhat, Peterin a nakawr a satthlak laibungpa chun, “Huona khan a kuomah ka hmu che an naw maw?” a ta. 27 Peter chun a’n phat nawk a, chu lai tak chun âr a hung khuong ta nghal a.

28 Kaiafa ina inthok chun Isu chu Roman lârsap in Praitorianah^a an thruoi a. Zingkâr inhma tak a la na, Judahai chun inthieng nawna kai loa Fekân Kŭt ruoi kîl thei an nuom leiin lal in sunga chun an lŭt nawh. 29 Chuongchun, Pilat chu a va suok a, “Hi mi hin ieng am a suksuol leia in hêk a na?” tiin a’n don a. 30 Anni chun, “Hi mi hin thil suol thaw naw sien i kuomah hung thruoi naw ning ungah” an ta. 31 Pilat chun, “Nangnin thruoi unla, in dan angin a chungthu rêl ro” a ta. Judahai chun, “Keini chun mi sukhlum theina thu kan nei nawh” an ta. 32 Chu chu ieng anga thi ding am a na ti Isun a lo hril kha a hung tlungna dingin a nih.

33 Chuongchun, Pilat chu in sungah a lut nawk a, Isu a koa, “Judahai lal i ni maw?” tiin a’n don a. 34 Isun, “Chu chu nanga lungril puok suoka i hril a ni, annawleh mi dangin ka chungchang an hril lei chea i mi’n don?” a ta. 35 Pilat chun, “Juda mi i mi sawn ve a ni? I chipuihai le thiempu lalhaiin ka kutah an hung pek lut che a ni hi. Ieng poi am i thaw hrim leh?” a ta.

36 Isun a don a, “Ka ram chu hi khawvela mi hi a ni nawh; ni sien chu Judahai kuta inmantira ka um nawna dingin a mi zuituhaiin bei an tih, nisienlakhom ka ram chu hi taka mi hi a ni si nawh” a ta. 37 Pilat chun, “Chu, lal i ni chu tie maw?” a ta. Isun, “Lal ka ni thu i hril hi i hril indik ngot el. Thutak inhriettir hi ka pieng san le khawvela ka hung san a ni hrim a nih. Tu khom thutaka um chun ka thu an ngaithlak hlak” a ta. 38 Pilat chun,

“Thutak chu iem a na?” a ta. Chu chu a hril zoin Judahai kuomah a va suok nawk a, “A chungah thu poi ieng khom ka hmu nawh. 39 Amiruokchu, in thaw dan pangngaiin, Fekân Kŭtah tâng pakhat ka’n suopek ding cheu a na, Judahai lal hi insuopek lang cheu in nuom am?” a ta. 40 Anni chun inring taka khêkin, “Hi pa hi ni loin Baraba kha ni lem raw se” an ta. Baraba chu suomhmang a nih.