6 Chu thu chu Pilatin a hrietin Galili mi a ni le ni naw thu a’n don a. 7 Heroda biela mi a nih ti a hriet chun Heroda kuomah a thon a, ama chu Jerusalema a lo um lai a ni nghe nghe a. 8 Herodan Isu a hmu chun a lawm hle a, a chanchin a hriet rop hlak leiin a hmu chăkna a sawt ta rĕng a; a thilmak thaw iemani bêk hmu a beisei bok a. 9 Thu tam tak a’n don a, sienkhom bau khat khomin a sàng nawh. 10 Thiempu lalhai le Dan zirtirtuhai chu an ngir ve a, inzom zatin an hĕk a. 11 Heroda le a vengtu sipaihai chun hmusit taka soisakin, nuizat siemnan an hmang a, lal korfuol mawi tak inhaktirin, Pilat kuom tieng an thon kir a. 12 Pilat le Heroda chu kha hma khan inhmelma hle hai sien khom hi ni hin an inngei nawk tah a nih.

13 Pilat chun thiempu lalhai, Dan zirtirtuhai le vantlang mipuihai chu a ko khawm a. 14 An kuoma chun, “Hi pa hi hel dinga mihai infuiportuah in hĕk a, nangni hmaa ngei thu ka’n don chieng a, sienkhom inhĕkna thuah thil poi ieng khom a tawk ka hmu nawh. 15 Heroda khomin a hmu naw leiin ka kuomah a hung thon nawk a ni hi. In hmu ang hrimin, thina khop ieng khom a thaw nawh. 16 Chuleiin, invuoktir ka ta, insuo nawk el ka tih” a ta.

17 Chun, Fekân Kŭt laiin tâng pakhat anni ta dingin a’n suopek hlak a.^a 18 Chuongchun a ruolin, “Hi pa hi sukbohmang la, Baraba kha mi’n suopêk rawh” tiin inring takin an khêk a. 19 Baraba chu khawpuia helna lei le tuolthat leia lung ina intâng a nih. 20 Pilat chun Isu chu insuo a nuom a, an kuomah thu a hril nawk a. 21 Sienkhom anni chun, “Hemde rawh, hemde rawh” tiin an khêk thruop thruop a. 22 Pilat chun a voi thumnaah “Ieng leiin am? Iem a thawsuol a? Thina khop poi a tawk ka hmu nawh. Invuoktir ka ta, ka’n suo el ding a nih” a ti nawk a. 23 Anni chun inring taka khêkin, kraws-a hemde dingin an ngĕn lui tlat a, an rawl chun a vau zăm tah a. 24 An ngĕn ang chun Pilatin thu a sukthlŭk a.^b 25 Helna le tuolthat leia lung ina intâng an hni pa kha a’n suo a, Isu ruok chu an nuom nuom law dingin a pêk suok tah a nih.

26 Chuonga an thruoi hmang lai chun Simon, Kurini khaw mi, tlangrama inthoka hung chu kraws putpui dingin an man a, Isu hnungah an inputtir a. 27 Mipui tam tak le nuhmei ruol, lungse taka trap traphai chun an zui dul dul a. 28 Isu chu anni tieng a ngha a, “Jerusalem nuhai, mi trà naw ro, nangni le in nauhai ta dingin trap lem ro. 29 Ngai ta u, ‘Nuhmei ching, sula nau pai ngai lo le nauin an nènè an nĕk ngai lo chu an hamthra’ in ti hun a la hung tlung ding a nih. 30 Chu huna chun mihaiin tlâng kuomah ‘mi del rawh’ tîng an ta, muol kuomah ‘min khum rawh’ ti bok an tih. 31 Thing hring lai hman chuonga an thaw si chun thing a trawl pha lem chu ieng tin topin am an la thaw ding maw!” a ta.

32 Sukhlum dingin mi dang, mi suol pahni ama ruolin an thruoi ve a. 33 ‘Lu Ru’ an ti hmun an tlung a; chu taka chun kraws-ah an hemde a; mi suolhai khom chu a chang tieng pakhat, a voi tieng pakhat, an hemde bok a. 34 [Isun, “Pa, anni hi ngaidam rawh, an thilthaw hi an hriet naw a ni hi” a ta]^c. A silfenhai chu thrum vawrin an insem a. 35 Mipui chun ngîrin an thlǐr a. Juda hotuhai chun nuisawin, “Mi dang hman a sukdam hlak a, Pathien mi ruot, Krista chu a ni takzet chun ama khom insukdam raw se” tiin an esĕl a. 36 Sipaihai khom chun an nuisaw a, a kuomah hungin uoiin thŭr an pĕk a, 37 “Judahai lal i ni takzet chun nang le nang insukdam ta la” an ta. 38 A chunga chun HI MI HI JUDAHAI LAL A NIH ti ziek^d an tăr a.

39 An hemde ve mi suol pakhat chun a hrăng khum a, “Krista chu i ni naw’m a ni? Insukdam la, keini khom mi sukdam ta la” a ta. 40 Nisienlakhom pakhat chun a hal a, “Pathien meu khom i tri naw maw, thuhmun zingin an hrem che hi? 41 Eini pahni hi chu hrem âwm hrim ei na, ei thilthaw man ei hmu a ni hi; hi pa ruok hin chu ieng khom a suksuol nawh” a ta. 42 Chu zoah, “Isu, i ram i tlung pha mi hre zing rawh aw” a ta. 43 Isu chun a kuomah, “Voisun hin thu dik ka hril che hi, ka kuomah paradis-ah um veng i tih” a ta.

44 Sun dar sawmpahni vela inthoka chawhnung dar thum chenin khawvel a hung inthim ta vong a; 45 nisan a var an suo naw a, tempul puonzar chu a laiah a’n thlêr suok a. 46 Isu chu rawl inring takin a khêk a, “Pa, i kutah ka thlarau ka’n koltir” a ta. Chu chu a hril zoin a hnuk a chat tah a.

47 Sipai zahotuin thil umzie a hmu chun, “Hi pa hi matheiloin mi indik tak a ni phot el” a ta, Pathien a’n pâk a. 48 Chu thil chu thlîra mipui hung inkhawmhaiin thil hung tlung an hmu chun âwm inchumin in tieng an inlawi tawl tah a. 49 A hmêlhriethai ruok chu hla feah an ngîr zing a, Galili rama inthoka ama zuitu nuhmeihai le chun chuong thil chu an thlîr a.

50 Chun, mi pakhat a hming Josefa, Sanhedrina Kansil membar pakhat, mi thra tak le indik tak a um a. 51 Ama chun an rorêl le an thilthaw chu a remtipui naw hrim a. Judahai khuo Arimathaia um a na, Pathien ram beisei ve hlaktu a ni bok. 52 Ama chu Pilat kuomah a fe a, Isu ruong a va hni a. 53 Chun, a lâk thlak a, puon zai inhmiin a tuom a, tu khom la zal ngai nawna lung ker thlănah chun a’n zăl a. 54 Chu ni chu Inbuotsaina ni a na, Judahai Sabat chu a’n tran vàng vâng ta si a. 55 Galili rama inthoka hung zuitu nuhmeihai khom chun an zui ve pei a, thlàn le a ruong an inzâl dàn chu an hmu a. 56 Chun, in tieng an kir a, rimtui le hriek rimtuihai chu an buotsai a. Dan thupêk chu zawmin Sabat ni chu an chawl a.