THILTHAWHAI
Thlarau Thienghlim pĕk tiem
1
1 Theofil, ka lekhabu hmasaa khan Isu rongbawl trana inthoka vana lâk tung a ni chena a thilthaw le a thu inchuktirhai po po chanchin ka ziek tah a; 2 Thlarau Thienghlim hmangin a tirko thlanghai kuomah thu a’n cha a; 3 a tuor le thi hnungin a hring nawk ngei ti sĕl ruol loin hieng mihai kuoma hin voi tam tak ama ngeiin a’n entir a, ni sawmli sung an kuomah Pathien ram thu hrilin a’n lăr a. 4 Trum khat chu, bu an fak tlâng laiin an kuomah hi thu hi a pêk a, “Jerusalem suoksan naw ro, Pa thutiem ka hril chêu kha lo nghak ro. 5 Johan khan tuiin a baptis hlak chêu a, sienkhom ni sawt naw te hnungah Thlarau Thienghlima baptis ning in tih” tiin.Isu van lawn thu
6 An intuok khawm chun Isu kuomah, “Lalpa, tuhin a ni Israel ram i tungding nawk ding chu?” tiin an indon a. 7 Ama chun, “Pain a hun le ni ama thuneinaa a ruot chu nangni lo hriet ding a ni nawh. 8 Nisienlakhom, in chungah Thlarau Thienghlim a hung tlung pha thilthawtheina la nei in ta, Jerusalema hai, Judai ram le Samari rama hai le hnuoi kil tawp chenin ka thu hretu ning in tih” a ta. 9 Chuong thu chu a hril zoin, an hmu zing laiin sûm lai an hmu phak loa lăk tungin a um a. 10 Chuonga van tieng a kai an thlir zing lai chun, thâwk le khatah puon vâr sil mi pahni an kuomah an hung ngǐr a. 11 “Galili mihai, ieng dinga van tieng thlîra in ngîr zing am a na? Hi Isu, in kuoma inthoka vàna lăk tunga um ngei hi, vàna a fe in hmu ang tak hin a hung nawk ding a nih” an ta.
Juda thlaktu ding an thlang
12 Chuongchun, Oliv tlanga inthokin Jerusalema bok an kǐr nawk a, an inkăr hlatzie chu kilometer khat vela a nih. 13 Khuo an lut chun an tlungna pindan chunghnungah an kai a, chuonghai chu Peter hai, Johan hai, Jakob hai, Andri hai, Filip hai, Thoma hai, Bartholomai hai, Mathai hai, Alfai naupa Jakob hai, Zelot pawla mi Simon hai le Jakob naupa Juda hai an nih. 14 An rêngin, nuhmeihai le Isu nu Mari le Isu unauhai leh thrahnemngai takin an trongtrai ruol hlak a.
15 Chuong laia ringtu za le sawmhni ruol um khawmhai hmaa chun Peter a ngîr a. 16 “Unauhai, Isu mantuhai hung thruoitu Juda chungchang thu chu Davida baua Thlarau Thienghlimin a lo hril lawk Pathien Lekha thu ang khan a hung tlung ding a ni hrim a nih. 17 Ama chu eini lai a thrang ve hlak a, ei rongbawlpui a ni hlak hrim kha. 18 (Ama ngeia a rîtlona man intĕla hmun pakhat a’n chawka chun a khupin a tla hlum a, a rîl suok vong khopin a phìng a tet koi a. 19 Chu thu chu Jerusalema um po poin an hriet a, chu hmun chu anni trongin ‘Akeldama’ an ta, chu chu ‘Thisen Hmun’ tina a nih).
20 Peter chun hril zom peiin, “Sam ziekah hieng hin a lo chuong a: ‘A in le lo sukramin um sien, Tu khom a sungah chêng naw raw se” ti le ‘A hotu nina chu Mi dangin chang raw se’ ti hi. 21 Chuleiin, ei Lalpa Isu rawia ei khawsak laia eini laia khawsa ve, 22 Baptistu Johan huna inthoka vana a mi kaisan ni chena eini laia thrang ve hlak mi pakhat, a thonawkna mi hrepuitua thrang ding ei thlang suok ding a nih” a ta.
23 Chuongchun, Josefa, (Barsaba amanih Justa an ti bok) le Mathia chu pakhat lem lem thlang an rot a. 24,25 “Lalpa, mi po po lungril i hriet a. A tirko nina le rongbawlna sin tlansantu Juda Iskariot hmun hluotu dingin hieng mi pahnihai lai hin a tu lem am i thlang mi hung inhriettir rawh” tia trongtraiin an hni a. 26 Chu zoah thrum an vawr a, Mathia chungah a tla a, tirko sawm le pakhathai lai chun lăk lût a lo ni tah a.