Isu thonawkna thu
28
1 Sabat zo, Pathienni tûk, khaw var tawmin Mari Magdalin le Mari dang chu thlăn en dingin an fe a. 2 Lir nasa takin a hung inhnǐng a, Lalpa vantirko vana inthokin a hung trum a, lungkhăr chu a hung inhlum son a, a chungah chun a thrung a. 3 A’n lang dan chu kawlphe ang a na, a silfenhai chu vûr angin a vâr a. 4 Vêngtu sipaihaiin ama chu an tri êm leiin an inthin hăwp a, an thidang a. 5 Vantirko chun nuhmeihai chu a biek a, “Tri naw ro, Isu an hemde kha in zong a nih ti ka hriet. 6 Hi taka hin a um ta nawh, a hril tah ang khan a tho nawk tah. A zălna hi hung en ta u. 7 Chuleiin, fe nghâl unla, a zirtirhai kuomah, ‘Mithi laia inthokin keitho a ni tah a, Galili ramah a lo fe hmasa ding a na, chu taka chun ama chu hmung in tih’ ti ro. Ngai ta u, ka hril ta chêu hi” a ta. 8 Tri le lawm ĕm êm pumin thlăna inthok chun inhmaw takin an suok a, zirtirhai hril ding chun an tlăn kǐr a. 9 Isun anni chu a’n tuokpui thut a, “Chibai” a ta. Chuongchun, an va hnai a, a ke chela kûnin an chawibiek a. 10 Chun, Isun an kuomah, “Tri naw ro. Fe unla, Galili rama fe dingin ka unauhai kha va hril ro, chu taka chun mi hmung an tih” a ta.Vêngtuhai ripawt
11 Lampuiah nuhmeihai an la thang mek lai chun vêngtu threnkhat chu khawpuiah an va lut a, thil hung tlung po po chu thiempu lalhai kuomah an hril a. 12 Thiempu lalhai le upahai an inrăwn zo hnung chun thaw dan ding an phierruk a. Vêngtu sipaihai chu tangka tam tak an pĕk a. 13 An kuomah, “‘Zanah zirtirhai an hung a, kan in kârin an lo inrŭk hmang a nih’ tiin hril ro. 14 Chun, Lârsapin a lo hriet pal a ni khomin ama chu suklungawi kan ta, buoi sà ve lo dingin siem kan ti chêu” an ta. 15 Chuongchun, tangka chu an lăk a, an ti ang tak chun an hril thang a. Chu tienami chu tu chen hin Judahai lai an la hril dar ta pei a nih.
Zirtirhai kuomah Isu an lâr
16 Chuongchun, zirtir sawm le pakhathai chu inhmŭna dinga Isun a hril, Galili rama tlâng pakhata chun an fe a. 17 Ama an hmu chun an chawibiek a; a thren ruok chun an la ringhla deu a. 18 Isun anni chu a hung pan a, a biek a, “Hnuoi le vana thuneina po po pĕk ka ni tah. 19 Chuongchun fe unla, hnam tin zirtirah siem unla, Pa le Naupa le Thlarau Thienghlim hmingin baptis un la, thu ka pĕk po po chêu hi zawm dingin zirtir ro 20 Chun, kei in kuomah kumkhuoin, hun tawp chen khomin, um zing ka tih” a ta.