Pilat hmaah Isu a ngir
15
1 Zingkâr inhma takin thiempu lalhai, upahai, Dan zirtirtuhai leh Sanhedrin po po chun ro an rêl a; Isu chu an khit a, an thruoi hmang a, Pilat kutah an inhlăn a. 2 Pilat chun, “Judahai lal i ni maw?” tiin a lo indon a. Ama chun, “Ni e, i ti annawm” a ta. 3 Thiempu lalhai chun kong tam takin an hĕk a. 4 Chuongchun, Pilatin, “An hĕkna zozai che hi i hriet naw maw? I don dĕr naw ding maw?” tiin a’n don nawk a. 5 Nisienlakhom, Isun a don chuong naw leiin Pilat chun mak a ti hle a.Sukhlum dingin an rĕl
6 Kût niin tâng pakhat insuopêk dinga mipuiin an hni taphot chu Pilatin a’n suopek hlak a. 7 Helna a suok truma tuol that leia hel pawl an man le lung ina an khumhai lai chun mi pakhat a hming Baraba a um a. 8 Chuongchun, mipui chu an hung a, a thaw hlak anga thaw dingin an ngĕn a. 9 Ama chun, “Judahai lal hi insuopêk lang chêu in nuom am?” a lo ta. 10 Thîkna leiin Isu chu thiempu lalhaiin a kutah an hung inhlăn a nih ti Pilatin a hriet si a. 11 Amiruokchu, Baraba insuo dinga hni lem dingin thiempu lalhai chun mipui an infui por a. 12 Pilat chun, “Chuong a ni si chun Judahai lal in ti hi ieng tia thaw dingin am in dit a?” tiin a’n don nawk a. 13 Anni chun, “Hemde rawh” tiin an khĕk a. 14 Pilat chun, “Ieng leiin am ie? Iem a thaw suol?” a ta. Nisienlakhom, anni chun inring nawk zuolin, “Kraws-ah hemde rawh” tiin an khĕk a 15 Chuongchun, mipui chu suklawm nuomin Baraba chu a’n suopek a; Isu ruok chu a’n vuoktir a, kraws-a hemde dingin an kutah a pêk suok ta a.
Sipaihaiin Isu an soisak
16 Sipaihai chun Isu chu lal in sung, Praitorian an tia chun an thruoi lŭt a, an pawla mi po po chu an ko khawm a. 17 Ama chu korfuol senduk an inhăktir a, a lallukhum dingin hling an inkuol a, an inkhumtir a. 18 “Chibai, Judahai lal” tiin an inriem khum a. 19 Hmolin a lu-ah an vuok an vuok a, chil an sakkhum a, dingthrathruonin chibai an bŭk el huoi huoi a. 20 Chuonga nuizat siemnaa an hmang zo chun korfuol senduk chu an hlippek a, ama silfen an inhăktir nawk a, kraws-a hemde dingin an thruoi suok tah a.
Isu an hemde
21 Mi pakhat Simon, Kurini khaw mi, Aleksandra le Rufa hai pa, thingtlanga inthoka hung chu Isu kraws putpui dingin an man lui a. 22 Golgotha, ‘Lu ru hmun’ an ti chu an thruoi tlung a, 23 murra pol uoiin an pĕk a, sienkhom a dawn nuom naw a. 24 Chuongchun, kraws-ah an hemde a. A silfenhai chu insemin, an chan ding seng hrietna dingin thrum an văwr a. 25 An hemde hun chu zing dar kuoa vel a nih. 26 Ama an hĕkna thu, ”JUDAHAI LAL” ti chu an tăr a. 27 Ama ruol chun suomhmang pahni an hemde bok a, a chang tieng pakhat, a voi tieng pakhat. 28 Pathien Lekha thua, “Ama chu bawsetuhai lai tiem sain a um a” ti kha chuong ang chun a hung tlung indik tah a nih.b 29 Mi invêl nuk nuk hai chun an lu thinin, “E hei! Nang, Tempul thrieka ni thuma bawl nawk theitu, 30 insukdam la, kraws-a inthok khan hung trum ta la” tiin an biek el a. 31 Chuong ang bokin thiempu lalhai le Dan zirtirtuhai chun, “Mi dang hman sukdam hlak si, mani insukdam thei si lo. 32 Ama ei ring theina dingin ei mit hmua ngei Krista, Israel lal chu tuhin kraws-a inthokin hung trum raw se chu” tiin an nuisaw a. Ama ruola an hemde pakhat khom chun a lo deusaw bok a.
Isu a thi
33 Sŭn dar sawmpahnia inthoka chawhnung dâr thum chenin khawvel pumpui chu a’n thim ta vong a. 34 Chawhnung dâr thum vela chun rawl inring takin, “Eloi, Eloi, lama sabakthani” tiin a khêk a (chu chu “Ka Pathien, ka Pathien, ieng dinga i mi maksan am?” tina a nih). 35 A bula ngir threnkhatin chu chu an hrietin, “Ngai ta u, Elija a ko a ni chu” an ta. 36 Mi pakhat a tlân a, sipon-ah uoiin thŭr a’n chie a, hmolah a târ a, Isu chu indawntir a tum a, “Ama la thla dingin Elija a hung hrim am, en ei tiu” a ta. 37 Isu chu rawl inring takin a khêk a, a hnuk a chat tah a. 38 Chun, tempula puonzar chu a chung tienga inthoka a hnuoi tieng chenin a’n thlêr vong a. 39 A hma zawna ngîr sipai zahotu, chuonga a khĕk ri hrea a thi dan hmutu chun, “Hi mi hi Pathien Naupa a lo ni ngei hi tie!” a ta.
40 Nuhmei ruol khomin hla taka inthokin an thlir a, chuonghai lai chun Mari Magdalin hai, Jakob chîn lem le Jose nu Mari hai le Salomi hai khom an thrang a. 41 Hieng mihai hi Galili rama a um laia ama zuia a rong bawlpek hlaktuhai an nih; chun, anni ruola Jerusalema hang fe ve nuhmei dang tam tak an thrang sa bok.
Isu an phŭm
42 Judahai Inrinnic a ni a (chu chu Sabat dinga an inbuotsai ni a nih). 43 Zan tieng a hung ni chun Josefa, Arimathai khuoa mi, Judahai Rorelna Inpuia membar pakhat, mi inzaum tak, Pathien ram beisei mi chu huoi takin Pilat kuomah a fe a, Isu ruong a hni a. 44 Pilat chun a thi tah ti a hrietin mak a ti hle a, sipai zahotu chu a ko a, a thi hun a’n don a. 45 A thi ngei tah ti sipai zahotu baua inthoka a hriet hnung chun Isu ruong chu Josefa a pêk a. 46 Chuongchun, ruong tuomna ding puon a’n chawk a, chu chun a tuom a, lung ker thlănah a’n zàl a, thlăn kotkhar chu lungkhărin a khâr a. 47 Mari Magdalin le Jose nu Mari khomin Isu an inzăltirna thlăn chu an hmu a.