3 Chuong lai chun Thiempu laltak Kaiafa an ti in huon sung tuolah thiempu lalhai le vantlang upahai chu an inhawr khawm a, 4 Isu chu a rûk a răla man le that dan ding an phierrŭk a. 5 “Sienkhom, Kût sŭng chu ni naw sien, chuong naw chun mipui lai buoina suok hlauh rawi a tih” an ta.

6 Bethani khuoa phâr pakhat Simon ina Isun thlaithleng a ot laiin, 7 alasbastar bŭra hriek rimtui to tak chawiin nuhmei pakhat a kuomah a hung a, a lu-ah hriek rimtui chu a buok a. 8 Zirtirhaiin chu chu an hmuin an lung a sen hle a, “Ieng dinga hienga a sukhmangthai mei mei am a na? 9 Hi hriek rimtui hi to taka zor a, mi retheihai pek thei a ni si a” an ta. 10 Isun chu chu a hrietin an kuomah, “Hi nu hi ieng dinga in sukbuoi am? Thil thra tak ka chungah a thaw a ni hi. 11 Mi retheihai chu in kuomah ieng lai khomin an um a, kei ruok chu nangni lai um zing ding ka ni nawh. 12 Hi hriek rimtui, ka taksaa a bur hi, phûm dinga a mi buotsaina a nih. 13 Thu dik ka hril cheu hi, khawvel hmun tinah hi Chanchin Thra hi an hrilna taphotah hi nu thilthaw khom hi, ama hriet zingna dingin, hril ve pei an tih” a ta.

14 Chu hnung chun sawm le pahnihai laia pakhat, Juda Iskariot an ti chu thiempu lalhai kuomah a fe a, 15 “Ama chu inmantir ka ti chêu. Iem mi peng in ta?” a ta. Chuongchun, tangka sawmthum an tiem a, ama chu an pĕk a. 16 Chu taka inthok chun inmantir dan ding remchang a zong ta zing a.

17 Chol thrang lo bei kŭt ni hmasa taka chun zirtirhai chu Isu kuomah an hung a, “Khaw lai hmun am i ta dingin Fekân Kŭt ruoi buotsai inlang i nuom a?” tiin an hung indon a. 18 Ama chun, “Khawpuia tu amanih inah va fe unla, a kuomah, ‘Zirtirtuin ka hun a hnai tah a, ka zirtirhai leh i inah Fekân Kut ruoi kan kîl ding a nih’ a tih tiin va hril ro” a ta. 19 Isun a hril ang charin zirtirhai chun an va hril sawng a, Fekân Kŭt zanbu ding chu an buotsai a.

20 Zan tieng chun zirtir sawm le pahnihai leh zanbu chu an kîl a. 21 An fak lai chun Isun, “Thu dik ka hril chêu hi, nangni laia mi pakhatin mi’n mantir a tih” a ta. 22 Chuongchun an lungzing ta ĕm êm a, a hmatiemin Isu kuomah, “Lalpa, kei chu ni naw ning maw?” an ta. 23 Isun, “Ka ruola thlênga a kut phûmtu ngei chun mi’n mantir a tih. 24 Mihriem Naupa hi a chungthu an lo ziek ang takin a fe ding a nih; sienkhom Mihriem Naupa inmantirtu ding chung chu a rik ie; chu mihriem chu pieng naw law law sien a ta dingin a thra lem” a ta. 25 A’n mantirtu ding Juda Iskariot chun, “Rabbi, kei chu ni awm naw tak maw?” a ta. Ama chun, “Ni e, nang i nih” a ta.

26 An fak lai mek chun Isun bei chu a lak a, lawmthu a hril zoin a khoi a, a zirtirhai kuoma chun a pêk a, “La unla, fa ro; hi hi ka taksa a nih” a ta. 27 Chuong ang bokin no khom chu a lâk a, lawmthu a hril zoin an kuomah a pêk a, 28 “In rêngin dawn ro; hi hi ka thisen, thuthlung thisen, suol ngaidamna dinga mi tam tak ta dinga suok ding chu a nih. 29 Ka hril chêu hi, ka Pa rama nangni leh a thara ka dawn hun a tlung hmâ khat chu grep ra tui hi dawn nawk ta ngai naw ning” a ta. 30 Hla an sak zoin Oliv tlang tieng panin an suok a.

31 Chun, Isun an kuomah, “Voizan hin in rêngin mi nghatsan vong in tih; ‘Berampu chu vuong ka ta, beram ruol chu indar an tih’ ti ziek a ni kha. 32 Nisienlakhom, keithoa ka um hnungin Galili ramah lo fe hmasang ka tih” a ta. 33 Peter ruok chun, “An rêngin nghatsan vong hai sien la che khom kei chun nghatsan naw ning cheng” a ta. 34 Isun a kuomah, “Thu dik ka hril che hi, âr a khuong hmain voi zan hin voi thum mi’n phat i tih” a ta. 35 Peter chun, “Nang leh thi ding ni lang khom, inphat naw top ka ti che” a ta. Chuong ang chun zirtir danghai khomin an ti seng a.

36 Chu zo chun Isu chu a zirtirhai leh hmun pakhat Getsemani an tia chun an fe a, an kuomah, “Saw laia ka va trongtrai kârin hi taka hin lo inthrung ro” a ta. 37 Peter le Zebedai nauhai pahni chu a thruoi a, thlaphângin a beidong hle a. 38 An kuomah, “Ka thla a phâng ngot el, thipui khop hiel a nih. Hi taka hin lo um inla, mi mengpui ve ro” a ta. 39 Hma tieng a va fe hret a, a bokkhup a, “Aw Pa, a thei chun hi no hin mi pĕl hrâm raw se; nisienlakhom ka thu ni loin nangma thu ni lem raw se” a ta.

40 Zirtirhai kuoma chun a hung a, an inlusu chu a hung hmu a. Chuongchun, Peter kuomah, “E khai, darkar khat khom in mi mengpui thei naw a ni maw? 41 Thlêmnaa in lut nawna dingin invêngin trongtrai ro. Thlarau chun a pei a, taksa ruok chu a hrât naw hlak a nih” a ta. 42 A va fe voi hninaa chun a trongtrai nawk a, “Aw Pa, hi no hi ka dawn loa lak hmang thei a ni naw chun, nangma thu angin tlung raw se” a ta.

43 A hung nawk a, an inlusu a hung hmu nawk a, an meng zo hlol si naw a. 44 Chuongchun a maksan tawl nawk a, a voi thumnaah a thu hril ngai bok hrilin a trongtrai nawk a. 45 Chu zoa chun a zirtirhai kuomah a hung a, “In la inlusu zing a ni maw? Ngai ta u, Mihriem Naupa hi mi suolhai kuta inhlăn a ni ding hun chu a hung tlung tah. 46 Tho unla, feng ei tiu. En ta u, a mi’n mantirtu ding khom a hung tlung ta saw!” a ta.

47 A hril lai zingin Juda, sawm le pahni laia pakhat chu a hung tlung a, ama ruol chun thiempu lalhai le vantlang upahai hung tir mi tam tak, kawlhnâm le hmoltum chawiin an hung tlung bok a. 48 A’n mantirtu ding khan, “Ka fawp tak chu ama ni’ng a tih” tia inchikna a lo hril sa vong a na. 49 Chuongchun, Isu a va pan ta nghal a, “Chibai Rabi” tiin a fawp a. 50 Isu chun, “Ruola, i hung san chu thaw el rawh” a ta. Chu phing leh man mihai chun an hung hnai a, Isu chu an chel a, an man ta a.

51 Isu rawihai laia pakhat chun a kawlhnâm a phawi a, thiempu laltak siehlaw chu a sât a, a nakawr a fikpek a. 52 Chu phing leh Isun, “I kawlhnâm kha a pâiah thun rawh; kawlhnâm ruoitu po po chu kawlhnâma that an ni ding a ni si a. 53 Vantirko singsari nêka tam hung tir nghal dingin ka Pa ka hni thei naw i ring am a ni? 54 Sienkhom, ngĕn ta lang, hieng ang thil hung tlung ding hrilna Pathien Lekha thuhai chu ieng tin am hlen ni thei a ta?” a ta.

55 Chuong lai chun Isun mipuihai kuomah, “Hel hmang man ding ang elin kawlhnâm le hmoltum chawiin in hung inthok a ni maw? Ni tin tempulah inthrungin mi ka’n chuktir hlak a, in mi man si nawh. 56 Nisienlakhom, zawlneihai thuziek po po chu a hung tlung kimna dingin hieng thil hi a um a ni hi” a ta. Chuongchun, a zirtirhai chun an zamsan a, an tlan hmang ta rip a.

57 A mantuhai chun Isu chu thiempu laltak Kaiafa in, Dan zirtirtuhai le khawtlang hotuhai an lo inkhawmnaa chun, an thruoi a. 58 Peter chun hla feah thiempu laltak in huon sung tuol lai chen a zui a; chun, a va lût a, a tawp chena thil tlung chu hmu tumin vengtuhai lai a thrung ve a. 59 Thiempu lalhai, Dan zirtirtuhai le Sanhedrin mi po po chun thu khêla intumin, Isu an sukhlum thei dan ding an dap khawm a. 60 Hrepuitu tehlèm tam tak an ngira chu thu tling an hmu zo si nawh.

61 A tawpah mi pahni an hung ngir a, “Hi pa hin, ‘Hi Tempul hi thrieka ni thuma bawl nawk thei ka nih’ a tih” an ta. 62 Chuongchun, thiempu laltak chu a ngir suok a, Isu kuomah, “Hienghai hĕkna che hi i don thei naw maw? An hĕkna che hi ieng thu am an ta a?” a ta. 63 Isu ruok chu a to zing a. Thiempu laltak chun, “Pathien hring sâlin thu ka pêk che: Krista, Pathien Naupa i ni le ni naw mi hril tawl rawh” a ta. 64 Isu chun, “I ti annawm. Nisienlakhom, ka hril chêu hi, hun la tlung dingah Mihriem Naupa hi Ropuitak chang tienga inthrung le van sûm laia hung la hmung in tih” a ta.

65 Chu phing leh Thiempu laltak chun a silfenhai a keithlĕr a, “Pathien a hrilsiet a nih; thuhretu dang ei la ngai rop am a ni? Ngai ta u, Pathien a hrilsietzie chu tu khan in hriet ta kha. 66 Ieng tin am in ngai a?” a ta. “Thi tlâk a nih” tiin an don a. 67 A hmâiah chil an sâk a, an lok a, 68 threnkhatin, “Nang, Krista,^a tuin am a ben che, hril thei rawh” tiin an ben bok a.

69 Peter chu in inhuon sung tuol lai a’n thrung a, siehlaw nunghak a kuomah a hung a, “Nang hi Galili mi Isu kuoma um kha i nih” a ta. 70 Peter ruok chun, “I thu hril umzie chu ka hriet map nawh” tiin an rênga hmaa chun a’n phat a. 71 In inhuonna kotpuia a va suok chun siehlaw nunghak dangin a hmu a, chu taka umhai kuoma chun, “Hi pa hi Nazaret Isu kuoma um ve kha a ni hi” a ta. 72 Peter chun, “Chu mihriem chu ka hriet ngai nawh’ tiin inkhâm hielin a’n phat nawk a. 73 Sawt naw te hnungah chu taka ngirhai chun Peter kuomah, “Nang khom hi anni laia thrang ni ngei i tih, i trong awphawia inthokin a’n hriet annawm” an ta. 74 Peter chun trongsie phur hiel dinga inkhâmin, “Chu mihriem chu ka hriet ngai nawh” a ta. 75 Ar a khuong ta nghal a. Isun, “Ar khuong hmain nangin voi thum mi’n phat i tih” a ti kha Peter chun a hriet suok a. Chuongchun, a suok a, lungse takin a trap zoi zoi a.