3 Heroda chun a unaupa Filip nuhmei Herodi leiin Johan chu a man a, a khuop a, lung inah a khum a; 4 a san chu Johanin, “Herodi i nei hi a thieng nawh” a tipek lei a nih. 5 Heroda chun Johan chu sukhlum a nuom a, sienkhom mipuiin ama chu zawlneia an ngai leiin mipui chu a tri si a.

6 Heroda piengcham lawmnaah Herodi naunu a hung làm a, Heroda chu a suklawm èm leiin, 7 a hni taphot pe dingin thu a’n khâm a. 8 Ama chun a nu infui angin, “Thlĕngah, tu hin Baptistu Johan lu mi pe rawh” a ta. 9 Heroda chu a lungzing hle a, sienkhom a thu tiem lei le a ruoi kîlpuituhai lei chun pe dingin thu a pêk a. 10 Chuongchun, mi a tir a, lung ina um Johan lu chu a va’n laktir a, 11 a lu chu thlĕngin an hung dom a, nunghak chu an pĕk a, ama chun a nu kuomah a fepui a. 12 Chun, Johan zirtirhai chun a ruong chu an va’n hlăwm a, an phŭm a, Isu khom an hung hril a.

13 Isun a lo hrietin chutaka inthok chun longin hmun fienriel panin ama chauin a’n tawl hmang a. Mipuiin an hriet chun an khuohaia inthok chun kein an zui a. 14 Longa inthoka va kam a kai chun mipui tam tak a hmu a, a lunginsiet tawl êm êm a, damnawhai chu a sukdam a.

15 Zantieng a hung ni chun a zirtirhai chu a kuomah an hung a, “Hi hi hmun thlalĕr a na, khuo a’n hnu ta hle si a, khuoa hai fea an fak ding an inchawk theina dingin mipui hi infetir rawh” an ta. 16 Isu ruok chun, “An fe hmang a ngai nawh, nangnin fak ding pe lem ro” a ta. 17 Anni chun, “Hi taka hin bei phek panga le ngate pahni chauh naw chu ieng khom dang kan nei nawh” an ta. 18 Ama chun, “Ka kuomah hung chawi ro” a ta. 19 Hlobet chunga inthrung dingin mipui chu thu a pêk a, bei panga le ngate pahni chu a lâk a, van tieng nghain mal a sawm a, a khoi a, a zirtirhai a pêk a, zirtirhai chun mipui kuomah an sem a. 20 An rêngin an făk a, an khop seng a, an făk mahla nawi an rŭt khăwm chu bawm sawmpahni sip a nih. 21 A fatuhai chu, nuhmei le naupang tiem loin, patling ngot khom sangnga lai an nih.

22 Mipui a’n trintir vel sungin ral khing tieng lo kai hmasa dingin a zirtirhai chu longin a’n fetir a. 23 Mipui a’n trîntir zoin ama chu trongtrai dingin tlângah a fe hrang a, zantieng a hung ni chun ama khât chau a ni tah a.

24 Long chu va kama inthoka hla tak a tlung tah a, thliin a naw zawnga a not leiin, tuifawnin a tawm lêng a tawm lêng a. 25 Khawfingchat tawmin dil chungah anni tieng panin a hung lawn a. 26 Zirtirhaiin dil chunga lawn an hmu chun “Phûng a ni saw” an ta, thlaphângin an khêk chŭl a. 27 Nisienlakhom, Isun anni chu a biek nghal a, “Thlaphâng naw ro. Kei ka nih annawm. Tri naw ro” a ta.

28 Peter chun a don a, “Lalpa, nang i ni chun, tui chunga i kuoma hung thu mi pe rawh” a ta. 29 Isu chun, “Hung ta la” a ta. Peter chu longa inthokin a suok a, Isu panin tui chunga chun kein a lawn a. 30 Nisienlakhom, thli hrang chu a hmuin a tri a, a pil tran ta a, “Lalpa, mi san rawh” tiin a khêk a. 31 Isun a hei ban nghal a, a chel a, a kuomah “Nang, ringna tlawm, ieng dinga i ringhlel am a na?” a ta. 32 Longa an lut chun thli chu a rè tah a. 33 Longa umhai chun, “Pathien Naupa i lo ni takzet hi” tia bokkhupin an chawibiek a.

34 Dil an kăn chun Genesaret ramah an kăi a. 35 Chu hmuna mihaiin Isu a nih ti an hriet chun an sè vèl ram po poah mi an tir a, damnaw po po a kuomah an hung thruoi a; 36 a puon hmor chauh khom them an ngĕn a, a them taphot an dam pei a.