Baptistu Johan mi tirhai
11
1 Zirtir sawmpahnihai kuoma thu a pek zoin Isu chu chu taka inthok chun a suok a, Galili ram khuoahai thu hril le inchuktir dingin a fe tah a. 2 Krista thilthawhai chanchin Johanin lung ina inthoka a lo hriet chun, 3 “A hung ding chu i ni am, annawleh mi dang kan la nghak ding?” tia indon dingin a zirtirhai chu Isu kuomah a tir a.
4 Isun anni chu a lo don a, “Kir nawk unla, in thil hriet le hmuhai hi Johan va hril ro. 5 Mitdelhai mit a var a, kebaihai an lawn a, phârhai sukthiengin an um a, nasêthai na a var a, mithihai keithoin an um a, riengvaihai kuomah Chanchin Thra hril a ni bok. 6 Tu khom keima laka beidong lo chu a hamthra” a ta.
7 Johan zirtirhai an fe phing leh Isun mipuihai kuomah Johan chanchin a hril a. “Ieng en dingin am thlalera khan in fe a? Thliin luong a mŭt hnǐng maw? 8 An naw leh, ieng hmu dingin am in fe? Puon nêm sila inchei maw? Ni lo e, puon nêm sila incheihai chu lal inah annawm an um hlak. 9 Anleh ieng en dinga fe rêng rêng am in na? Zawlnei en dingin maw? A ni rèng, ka hril chêu hi, zawlnei nêka ropui lem tie! Ama chanchin hi annawm hienga an lo ziek:
10 ‘Ngai ta, ka tirko,
I hmaah ka tir a;
Ama chun i hmaah,
I lampui buotsai a tih’
tiin.
11 Thu dik ka hril chêu hi, nuhmei sula inthoka insieng lai Baptistu Johan nĕka ropui lem an la pieng ngai nawh; nisienlakhom, van rama mi chîn tak khom ama nêkin an ropui lem. 12 Baptistu Johan a hunga inthok tu chen hin Pathien ram chun tharuma norna a tuok a, tharuma beituhai chun an pawnglâk mêk a nih. 13 Johan a hung inlang chen khan Dan thu le zawlnei po poin chu chu an lo hril lawk a ni kha. 14 In ring nuom a ni chun, ama hi zawlnei hung dinga hril tah Elija chu a nih. 15 Ngaithlâkna dinga na nei chun ngaithla ngun raw se.
16 “Tu lai ruoltharhai hi ieng le’m hrilkhing ka ta? Dawr hmuna thrung naupang ruol inkhêktuo a,
17 ‘Theihlé kan mŭtpĕk chêu a,
In lăm nuom si naw a;
Lusûn hla kan sak hlakin,
In trap chuong bok si nawh’
tihai ang hi in nih.
18 “Johan chu a hung a, fain a dawn naw a, ‘Ramhuoi zawl a nih’ in ti a. 19 Mihriem Naupa a hung a, fain a dawn a, “En ta u, mi virkâwngpa, uoiin hè mi, siekhontu le mi suolhai ruolpa saw’ in ti nawk si a. Nisienlakhom, Pathien varna chu a thilthawah a’n lang” a ta.
Sim nuom le nuom naw khuohai
20 Chun, thilmak a thaw tamna tak khuohai chu an sim chuong si naw leiin Isun a hal a. 21 “Nang Korazin, i chung a pik. Nang Bethsaida, i chung a pik. Nangni laia thilmak ka thawhai kha Tura le Sidona thaw ni sien chu saiip sila vuta inbuolin sim ta’ng an tih. 22 Chuleiin, ka hril chêu hi, rorêl nia in tuor ding nĕk chun Tura le Sidon tuor chu zie-um lem dai a tih. 23 Kapernaum, nang khom vàn chena chawi sang i ni ding am a ni? Teu lo e! Mithi khuo chena tla thla ding i nih. Nangmaa thilmak thaw tahai po po kha Sodoma thaw ni sien chu, tu chen hin la um zing a tih. 24 Chuleiin ka hril che hi, rorêl nia i tuor ding nek chun Sodom tuor chu zie- um lem dai a tih” a ta.
Chăuhai chawl hadamna
25 Chu lai chun Isun hieng hin a hril a: “Aw Pa, hnuoi le vana Lalpa, nangin mi var le mi thiemhai lakah hieng thu hi i thup a, naupangtehai kuomah i puong leiin ka’n pàk che. 26 A nih, Pa, chuong chu thra i tizawng tak a nih. 27 Ka Pain iengkim a mi’n koltir tah; Pa chau naw chun tu khomin Naupa hi an hriet nawh; Pa khom Naupa le a kuoma Naupain a puong nuomnahai chauh naw chun tu khomin an hriet nawh.
28 “Nangni rimtong le rikphur po po hai, ka kuomah hung unla, keiin sawldamna peng ka ti chêu. 29 Ka ringkol bât unla, ka kuomah inchûk ro; mi zaidam le lungrila inngaitlawm tak ka ni si a, chuongchun in thlarau ta dingin sawldamna hmung in tih. 30 Ka ringkol a hàdam a, ka phur khom a zâng a nih” a ta.