Sennakerib-in Jerusalem a vau
32
1 Chuonga ringum taka Hezekia-in thil a thaw hnung chun Asuria lal Senakerib-in Judai ram a hung rûn a, làk tumin kul nei khuohai chu a’n huol a. 2,3 Jerusalem rûn dingin Senakerib a hung inthok ti Hezekia’n a hriet chun a mi lienhai le sipai hotuhai chu a rawn a, khaw puo tienga tuikul po po chu khàr a rot a, anni chun an thrangpui a. 4 Chuongchun, mi tam tak an pung khawm a, “Ieng leiin am Asuria lal chun tui tam tak a nei ding?” an ta, a rama luong lut vadungte tui hnar po po chu an dang chat vong a. 5 Chu zoah Hezekia chun inrim taka thokin kul bang chim tah po po chu a siem thra a, kulbing insanghai a’n din thar a, kul puo tieng kul dangin a’n huon a, Davida khawpui thrut chu a suknghet a, hriemhrei le phaw tam tak a siem bok a.6 Chun, indonaa mipuihai inrawitu ding hotu a ruot a, khawpui kotzawla chun a ko khawm a, 7 “Hrât tak le huoi takin um ro. Asuria lal le a sipai tam takhai chu tri naw unla, zâm bok naw ro, ama nêka thil thaw thei lem ei kuomah a um si a. 8 Ama kuoma chu mihriem bân chauh a um a, eini kuoma ruok chu mi thrangpuitu ding le ei ral dotu ding LALPA ei Pathien a um a nih” tiin a thlamuong a. Juda lal Hezekia thu hril chun mipuihai chu a sukhuoi a.
9 Senakerib-in Lakis khuo a’n huol lai chun Jerusalema Juda lal Hezekia le Juda mipuihai po po kuomah a ofisarhai a tir a, hi thu hi a’n cha a: 10 “Asuria lal Senakerib chun hieng hin a tih: ‘Jerusalem inhuol a ni ta hnung khoma in um zing ngamna san chu iem ni tang a ta? 11 Hezekia-in, ‘LALPA ei Pathien chun Asuria lal kuta inthokin mi san suok a tih’ tia a hril cheu kha, phingtrâm le dangchâra in thina dinga a hlèm bawlna cheu a ni kha. 12 Hezekia ngei hi hmunsânga maichàmhai sukchim a, Judai ram le Jerusalema mihai kuoma, ‘Maichàm pakhatah Pathien bein, a chungah pumraw thilhlân in inhlàn ding a nih’ titu kha a ni naw am a ni? 13 Ram danghai chunga kei le ka pi le puhaiin kan thaw dan in la hriet naw a ni maw? Chuong hnamhai pathienhai chun ka kuta inthokin an ramhai chu an humpek thei am a ni? 14 Ka pi le puhaiin an sukbohmang ta hnung a tu hnam pathienhaiin am ka kuta inthokin an san suok tah ti in hriet ta hlak a? In Pathien chun ieng tin am ka kuta inthokin a san suok thei bik ding cheu? 15 Hieng ang hin Hezekia chun hlèmin thruoi suol naw raw se cheu. Ama chu ring naw ro; tu hnam pathien le ieng ram pathien khom ka kuta inthok le ka pi le puhai kuta inthoka san suok thei an um nawh. In Pathien lem lem chun ka kuta inthokin san suok naw nawk zuol a ti cheu” tiin.
16 Senakerib mihai chun chu nêka nasa lem chun Pathien le a siehlaw Hezekia chu an biek sisaw a. 17 Chun, Asuria lal chun Israelhai LALPA Pathien hmusit zawngin, “Ram dang mi pathienhaiin ka kuta inthoka an mipuihai an san suok thei naw ang bokin, Hezekia Pathien khomin ka kuta inthokin san suok naw top a tih” tiin a ziek bok a. 18 Khawpui chu an lak theina dinga Jerusalem mipuihai rîkrâp le sukthlabar dingin kul chunga umhai chu Hebrai trongin an khèk khum a. 19 Jerusalem Pathien chu mihriem kuta siem, khawvela mi danghai pathien ang mei meiin an hril a.
20 Chuong ang thil lei chun, lal Hezekia le Amoz naupa zawlnei Isai chu van tieng nghain an trongtrai a. 21 Chuongchun, LALPAN vantirko a tir a, Asuria lal riekhmuna mi hrât huoisen po po le an hma thruoitu le hotuhai po po chu a sukhlum vong a, hmai thûmin a ram tieng a kir nawk ta a. A pathien tempula a fe chu ama nauhai ngeiin kawlhnàmin an lo sukhlum a.
22 Chuong ang chun LALPAN Hezekia le Jerusalema mihai chu Asuria lal Senakerib kuta inthok le mi dang po po kuta inthokin a sanhim a, an kawl le kienga mihai lakah a vèng a. 23 Chun, mi tam takin LALPA ta dingin Jerusalemah thilpek an hung chawi a, Juda lal Hezekia chu thil hlu tak tak an hung pèk a. Chu taka inthok chun nasa taka hnam tin ngaisang a hung hlaw ta a.
Hezekia damnawna le chapona
24 Chuong lai chun Hezekia chu thi ngamin a na a, LALPA kuomah a trongtrai a, a lo don a, inchikna mak a pêk a. 25 Nisienlakhom, Hezekia lungril chu a chapo a, a chunga zangaina inhmutira a um angin a thaw ve naw leiin ama le Judai ram le Jerusalem chunga chun LALPA lung nasa takin a sen a. 26 Hezekia chun a lungril chapona chu a’n sìr a, chuong ang bokin Jerusalem mipuihai chun an insìr ve leiin Hezekia dam sung chun LALPA lungsenna chu an chungah a tlung ta nawh.
Hezekia hausakzie le ropuizie
27 Hezekia chun sum le pai a hung hau a, a hung ropui ta hle a, tangkaruo hai, rangkachak hai, lunghlu hai, rimtui hai, phawhai le thil hlu tam tak sie khawmna in a bawl a. 28 Bu le uoiin le hriek sie khawmna in a bawl bok a. Ran ruol tinrêng sie khawmna ding bûk le beram huong hai a bawl a. 29 Khuohai a siem a, bawng ruol le beram ruol tam tak a nei a, Pathienin hausakna nasa takin a vûr a. 30 Hezekia bok hin Gihon vadung chuonchung lem chu a khâr a, Davida khawpui thlang tieng pangah an luong thlaktir a. Chuongchun, Hezekia chu a thilthaw po poah a hmuingil pei a. 31 Amiruokchu, Babulon lalin a rama inchikna mak hung tlung chu indon dinga palai a hung tir chun, a lungrila thil um po po a hriet theina dinga fie dingin Pathienin a thlathlam a.
Hezekia thi thu
32 Hezekia inlal sunga thil tlung danghai le a thilthaw thrathai chu Amoz naupa Isai inlàrna bu, Juda lahai le Israel lalhai chanchin inzieknaah a chuong. 33 Hezekia chu a pi le puhai kuomah a chawl a, Davida thlahai thlan umna muola chun an phùm a. Juda mi po po le Jerusalema mihai po poin a thi ni chun ropui takin an sùn a. A naupa Manase chun a lalna chu a hung hluo ta a.