2 Hezekia chu bang tieng a ngha a, LALPA kuomah, 3 “Aw LALPA, i hmaah ringum tak le inpe fai thrakin kal ka chawi hlakzie le i mithmua thil thra ka thaw hlakzie kha mi hrepek zing rawh” tiin a trongtrai a, namên loin a trap a.

4 Isai chun lal chu a maksan a, sienkhom lal tuolzawl a khèl hma chun LALPA thu a hung tlung a, 5 “Kir nawk la, ka mihai thruoitu Hezekia kuomah hieng hin hril rawh: ‘LALPA, i pu Davida Pathien chun hieng hin a tih: I trongtraina kha ka lo hriet a, i mitthli tlak khom ka hmu a. Ngai ta, sukdam ka ti che a, ni thum niah LALPA tempulah kai pei nawk tang i tih. 6 I dam sung kum khom kum sawm le kum ngain suksei ka ta, nang le hi khawpui hi Asuria lal lakah san him ka ta, keima zâr le ka siehlaw Davida zàrin hi khawpui hi huol him bok ka tih, a tih’ tiin” a ta. 7 Isai chun a kuomah, “Theichang hnàk kha hung la ro” a ta, a khuoihlia chun a bel a, a hung dam nawk ta a.

8 Hezekia chun Isai kuomah, “LALPAN mi sukdam a ta, LALPA tempulah ni thum niin ka hang kai pei ta ding a nih ti inchikna iem ning a ta?” a ta. 9 Isai chun, “LALPAN a sukdam ngei ding che a nih ti i ta dinga LALPA laka inchikna chu hi hi ning a tih: hlim chu sirbi sawm chen a’n tawl tung am i nuom, an naw leh sirbi sawm chen an tawl kir lem?” a ta. 10 Hezekia chun, “Sirbi sawm chen intawl tung chu thil olsam a na, sirbi sawm chen intawl kir lem raw se” a ta. 11 Chuongchun, zawlnei chun LALPA a hang ko a, LALPA chun lal Ahaz sirbi bawl chen chun hlim chu sirbi sawmin an tawl kirtir a.

12 Chuong lai chun Babulon lal Baladan naupa Merodak Baladan chun Hezekia damnaw thu a lo hriet leiin lekhathon le thilpek inchawitirin mi a tir a. 13 Hezekia chun anni chu a lo lawm a, a thil hlu siena po po dam, tangka le rangkachak dam, rimtui dam, hriek hlu tak dam, ralthuom a siena dam le a ina ro um po po chu a’n entir a; a ina mi le a ram sunga thil inentir naw sam a nei nawh.

14 Chun, zawlnei Isai chu Hezekia kuomah a fe a, “Hienghai hin iem an hril a, khaw laia inthoka hung am an na?” tiin a’n don a. Hezekia chun, “Ram hla tak, Babulona inthoka hung an nih” a ta. 15 Zawlnei chun, “I ina hin ieng ieng am in inentir ta a?” a ta. Hezekia chun, “Ka in sunga thil um po po hi an hmu vong ta a, ka ro laia mi ka’n entir naw hrim hrim a um nawh” a ta. 16 Isai chun Hezekia kuomah, “LALPA thu hi lo ngaithla raw khai. 17 ‘Ngai ta, i in sunga um po po le voisun chena i pi le puhai ro khawl khawmhai chu Babulon tienga an fepui ni la hung tlung a ta, ieng khom maksan hrim nei naw ni hai’ LALPAN a tih. 18 ‘Chun, i thlahai, nangma taksa le thisen put ngei la hung pieng dinghai laia mi ngei khom la thruoi hmang an ta, Babulon lal ina an sor mi tilrehai lai la thrang veng an tih’ a tih” a ta.

19 Hezekia chun Isai kuomah, “LALPA thu i hril hi a thra” a ta. Ama bokin, “Ka dam sunga muongna le himna a um a ni phot chun” a la ti nawk nghal a!

20 Hezekia inlal sunga thil tlung danghai, a thilthawhai po po, khawpuia tui lakna kor siema tui a lak lut danhai po po chu Juda lalhai inlal lai chanchin inziekna lekhabuah a chuong. 21 Hezekia chu a thlatuhai kuomah a chawl a, a naupa Manase chun a lalna chu a hung hluo ta a.