1 Hezekia inlala inthoka kum sawm le kum linaa chun Asuria lal Senakerib chu Judai rama kul nei khuo po po bei dingin a hang fe a, a lâk a. 2 Chu zoah Asuria lal chun Jerusalema lal Hezekia bei dingin sipai tam tak leh a sipai kawmandar Rabsake chu Lakis-a inthokin a tir a, dil chuonchung tui lakna bula puon sawptuhai umna hmuna lamliena chun a chawl a. 3 Lal in enkoltu Hilkia naupa Eliakim hai, lekha ziektu Sebna hai le chanchin ziektu Asaf naupa Joa hai chu ama hmu dingin an hung suok a. 4 Sipai kawmandar chun an kuomah, “Hezekia kuomah hieng hin hril ro. Asuria lal ropui tak chun hieng hin a hril: ‘I ringsan, i’n nghatna hi iem a ni hrim hrim a? 5 Indonaa dingin remruot thiem le sipai hrât tak tak ka nei dam i ti a, sienkhom kawk boa inpawt mei mei i nih. A tu am ringsanin ka lakah i hel a na? 6 Tu hin ngai rawh, Aigupta, luong hmol por ang, innghai pal chun kut ât popa mi sukhliem thei ang mei mei hi ringsanin i nei a ni maw? Aigupta lal Faraw inhnèmpuihai chan chu chuong ang chu a ni vong. 7 Tu hin, ‘Kan ringsan chu LALPA kan Pathien a nih’ i ti dam a ni chun, Judahai le Jerusalem mihai kuoma Hezekia’n, ‘Jerusalema maicham hmaa chauh hin in biek ding a nih’ a ti leia hmun sânga a bawlhmun le maichamhai a dehawnpekpa kha a ni naw maw? 8 “Chuleiin, tu hin ka pu Asuria lal kuomah hung la, indawrpui rawh. A khaltu ding mi i hmu indai phot chun sakor khom sanghni pe’ng ka ti che. 9 Aigupta mihai tawlailir le sakor chung chuonghai i ringsana chu, ka pu mihai laia hotu chîn tak pakhat khom hi i dang kir zo teu awm si nawh. 10 Chu bakah, LALPA thu thrang loin hi hmun hi bei le hnĕ dingin ka hung i ring am a ni? LALPA ngei chun hi ram hi hang beia hnĕ dingin a mi hril a nih’ tiin” a ta. 11 Chu phing leh Hilkia naupa Eliakim le Sebna le Joa chun sipai kawmandar kuomah, “Lunginsiet takin Aramik trongin mi hrilpêk hrăm rawh, i siehlawhai hin kan hriet si a; kul chunga umhai hrieta chu Hebrai trong chun mi be ta naw hràm rawh” an ta. 12 Sipai Kawmandar ruok chun, “Ka pu chun in pu kuoma le nangni kuoma chauh hieng thu hi hril dingin a mi tir am a ni? Kul chunga inthrunghai, nangni le anni, mani êk faa mani zun la dawn dinghai kuoma khom a mi tir bok a ni naw am a ni?” a ta. 13 Chuongchun, kawmandar chu a ngîr a, Hebrai trongin, “Lal ropui tak, Asuria lal thu hi lo ngaithla ro. 14 Lal chun hieng hin a tih: ‘Hezekia hlèm bawlin um naw ro, ama chun ka kuta inthokin a san suok thei teu naw cheu. 15 Hezekia chun, ‘LALPAN mi san suok ngei a ta, hi khawpui hi Asuria lal kutah pĕk ni naw nih’ tiin LALPA chu ringsan dingin thuhnê naw raw se cheu. 16 Hezekia thu chu ngai naw ro. Asuria lal chun hieng hin a tih: ‘Mi’n rempui unla, ka kuomah hung inpe ro. Chuongchun, mi tinin mani huona mi theichang le grêp fain, mani tui bela mi ngei tui dawn zing in tih. 17 Chu chu nangni ram ang boka ram hnienghnar, bu le uoiin thar tamna ram, bei le grêp tamna rama ka thruoi hma cheua in khawsak dan ding chu a nih. 18 Hezekiain, ‘LALPA chun mi san suok a tih’ a ti hin thruoi suol naw raw se cheu. Tu hnam pathienin am Asuria lal kuta inthokin ram a san suok tah hlak ti in hriet a? 19 Hamath le Arpad hai pathien kha khaw lai am an um zo ta a? Sefarvaim-hai pathien kha khaw lai am a um ta le? Ka kuta inthokin Samaria khuo an san suok a ni? 20 Chuong rama pathienhai po po lai chun tuin am ka lakah an ram a san him a? LALPA chun ka kuta inthokin Jerusalem hi a san suok telul ding maw?’ tiin” a ta. 21 Lal Hezekia-in, “Anni chu don dèr naw ro” tia thu a pek angin mipui chu an to trok trok a. 22 Chu zoah Hilkia naupa Eliakim, lal in enkoltu lû tak le lekha ziektu Sebna le chanchin ziektu Asaf naupa Joa hai chu Hezekia kuomah an fe a, an puonhai an pot thlĕr a, sipai kawmandar thu hrilhai chu an hril sawng a.