Hezekia damnaw thu
38
1 Chuong hun lai chun Hezekia chu thi ngamin a na a. Amoz naupa zawlnei Isai chun a hung kan a, a kuomah, “LALPA chun hieng hin a tih: ‘Dam suok loin i thi ding a na, i sungkuo um dan ding rêl fel rawh’ a tih” a ta. 2 Hezekia chu bang tieng a ngha a, LALPA kuomah, 3 “Aw LALPA, i hmaah ringum tak le inpe fai thrakin kal ka chawi hlakzie le i mithmua thil thra ka thaw hlakzie kha mi hrepêk hràm rawh” tiin a trongtrai a. Hezekia chu namen loin a trap a. 4 LALPA thu chu Isai kuomah a hung tlung a, 5 “Kîr nawk la, Hezekia kuomah hieng hin hril rawh: ‘LALPA, i pu Davida Pathien chun hieng hin a tih: I trongtraina kha ka lo hriet a, i mitthli tlak khom ka hmu bok. 6 Ngai ta, i dam sung kum khom kum sawm le kum ngain suksei ka ta, nang le hi khawpui hi Asuria lal lakah san him ka ta, khawpui hi huol him bok ka tih. 7 “LALPAN a thutiem a hlen ngei dingzie inchikna chu hi hi ning a tih: 8 nisa hlim chu sirbi sawm chen, lal Ahaz-in darkar inher chen inkhǐna dinga sirbi a bawl chen intawl kir a tih” a ta, chuongchun nisa tla ta hnung chu sirbi sawmin an tawl kirtir nawk a. 9 Judai ram lal Hezekia damnaw hung dam nawk hnung chun hieng hin lekha a ziek a:10 Hieng ang hin ka lo ti a:
“Ka hringnun vanglai tak hin,
Thlăna muol ka liem el ding maw?
Ka nun hmang zo hman loin,
Lăkpêkin ka um ding maw?
11 Hringmi lĕngna rama hin,
LALPA hmĕl hmu ta loin,
Hringmi tu khom hmu ta loin,
Hring khawvela chênghai lai,
Ka um ta naw el ding a na maw!
12 Berampuhai puon in angin,
Ka hringnun puon in a thriek a,
A lâk hmang el ta si a.
Puonkhawngtu puonkol angin,
Ka nunkol chu a zuol ta a,
Puonkol a’nthok mi tan thlain,
Sŭn le zănin a mi suklungdong.
13 Zăn khawvârin ka nghâk a,
Sienkhom sakeibaknei ang elin,
Ka rù le chânghai a pot nawi a,
Sŭn le zănin a mi suklungdong.
14 Vamûr le kănghlâi angin,
Inhrâmin ka kiu vel a,
Zingkar vathru ang elin,
Inrûmin ka’n kuk bok a.
Van tieng ka thlirna leiin,
Ka mithai a’n thim zo tah.
Aw LALPA mi hung san rawh
Ka bei a dong a ni hih,” tiin.
15 Ieng am hril thei ka nei a?
A mi hril anga a thaw a nih.
Hi natna hi ama hung tir a na,
Ka thlâ beidongna lei hin,
Ka dam sung la um poah,
Tlawm takin kal chawi ka tih.
16 LALPA thununna hi a thra,
Damna le hriselna a nih;
Chuleia mi sukdam nawkin,
I mi’n hringtir nawk a ni hi.
17 Lungzingna ka lo tuor kha,
Ka thratna ding a lo nih.
Sietna khura inthokin,
I hmangainan mi humin,
Ka suolhai i ngaidam tah.
18 Seol-in a’n pak thei naw che,
Inpakna rawl a’n suo thei nawh.
Khuorkhurûma tla tahai chun,
I ringumna an beisei thei ta nawh.
19 Hring le dama umhai chauin,
Voisuna ka thaw ang bok hin.
An inpak thei che a nih.
Paha’n an nauhai kuomah,
I ringumna thuhai hi,
An inhlan sawng pei a nih.
20 LALPAN mi sukdam a ta,
Tringtrang rimawi leh remin,
Ka dam sung po poin hla,
LALPA inah sak ka tih.