Lalin zawlnei Isai a rawn
19
1 Hezekian chu chu a lo hrietin a silfenhai a pot thlèr a, saiip a’n bel a, LALPA Tempulah a lût a. 2 Lal in enkoltu lu Eliakim le lekha ziektu Sebna le thiempu upahai chu saiip inbelin Amoz naupa zawlnei Isai kuomah a tir a. 3 Anni chun a kuomah, “Hezekia-in hieng hin a tih: ‘Voisun hi beidongna ni, invauna ni le hmaimawkna ni a na; naute pieng a hun ta si, a hring suokna dingin a nuin thâ sang ding a nei ta si naw ang hi kan nih. 4 A pu Asuria lalin Pathien hring hril se dinga a tir Rabsake thu hrilhai po po chu LALPA i Pathien chun hre ngei a ta, a thu hriethai lei chun ama chu LALPAN la hal ve rawi nawnim. Chuleiin, hlaa la um sunhai ta dingin trongtraipek rawh’ tiin” a ta.5 Hezekia mi tirhai chun Isai kuom an hung tlung a. 6 Isai chun, “In pu chu hieng ang hin hril ro: ‘LALPA chun hieng hin a tih: I thu hriet, Asuria lal hnuoia thoktuhai mi hrilsietna chu tri dêr naw rawh. 7 Ngai ta, a sunga chun thlarau sieng ka ta, thuthang a hriet charin a ram tieng kir nawk a ta, chu taka chun kawlhnâmin inthattir ka tih, a tih’ tiin” a ta.
Asuria-haiin an hung vau nawk
8 Rabsake chun Asuria lalin Lakis a suoksan ti a hrietin an hnùk kir a, Libna khuo a lo bei lai chu a va hmu a. 9 Chuong lai bok chun Aigupta lal Kusha mi Tirhaka chu ama rûn dingin a hung ti Asuria lal Senakerib chun thu a dong leiin Hezekia kuomah mi a tir a, 10 “Hieng ang hin Juda lal Hezekia kuoma chun hril ro: ‘I ring Pathien chun ‘Jerusalem hi Asuria lal kutah pek ni naw nih’ tiin hlem naw raw se che. 11 Asuria lalhaiin ram po po sukse vonga an chunga kut an thlak dan khom i hriet chieng kha. 12 An leh, nang hi san him ni bik dinga inngai i ni? Ka pi le puhaiin Gozan hai, Haran hai, Rezef hai le Tel Asar-a um Eden mihai an sukbohmang lai khan in hnam pathienhai chun an san suok a ni? 13 Hamath lal hai, Arpad lal hai, Sefarvaim khaw lal hai, Hena lal hai le Iva lal hai kha tu hin khaw lai am an um zo ta a?’ tiin” thu a’n phurtir a.
Hezekia trongtraina
14 Chu lekha a hmu chun Hezekian a hang tiem a, LALPA tempulah a tlan lut a, LALPA hmaah lekha chu a phar a. 15 LALPA kuomah, “Aw LALPA, Israelhai Pathien, cherubhai inkara lalthrungphaa inthrung, nang chauh hi hi hnuoia lalram po po chunga Pathien i nih. Hnuoi le van hi nangma siem a nih. 16 Aw LALPA, i na lo dawin mi ngaithla hram rawh; aw LALPA, i mit mengin mi hung en ta; Senakerib-in Pathien hring a hrilsietna thu hi lo ngaithla hràm rawh.
17 “A nih, aw LALPA, Senakeribin hnam le ramhai a sukram nasatzie hi thudik a nih. 18 An pathienhai chu meiah a pei a, a suksiet a, chuonghai chu pathien an ni naw hrim a, mihriem kuta siem thing le lung mei mei an nih. 19 Chuleiin aw LALPA kan Pathien, nangma chauh hi LALPA Pathien i nizie hnuoia lalram po po hin an hriet theina dingin, a kuta inthokin mi hung san suok ngei rawh” tiin a trongtrai a.
Isaiin Senakerib siet ding a hril lawk
20 Amoz naupa Isai chun Hezekia kuomah, “LALPA, Israel Pathien chun hieng hin a tih: ‘Asuria le Senakerib chungthua i trongtraina kha ka lo hriet. 21 A chungchang thua LALPA kalna thu chu hi hi a nih:
“‘Zion nunghak thienglâm chun,
Hmusitin a nuizat chê,
Jerusalem naunu chun,
I tlan siet lai a hmuin,
A lu a thin khum chê a nih.
22 Tu lak am i rawl suksang a,
Vauna le hrilsietna sak suok a,
Mit i hang meng sang vèl chu?
Israel Mi Thienghlim chungah.
23 I mi tirhai chu hmangin,
LALPA chu i vau khawng a,
‘Ka tawlailir tam tak leh,
Tlang sangah ka hung kai a,
Lebanon tlang sìp ka chuon a,
An sidar thing insang takhai,
An far thing thrá thrahai le chun,
Ka nuom nuomin ka phûr a,
An ram ril le ngaw thratna,
Lut nawna hrim ka nei nawh.
24 Ram dangah tuikhur choin,
An ram tuihai ka tlàn a;
Aigupta vadungte po po,
Kein ka pal kangpek vong’
Tiin i hril hlak a ni kha.
25 “‘Tiena tlanga inthoka
Keiman ka lo ruot ta sa,
Ka ruohmang ta sa lei a,
Thil hung tlung a nizie hai,
Khaw kula lungremhai khom,
I sukchim hner hnûrzie hai,
I hriet fuk naw a ni maw?
26 Tha nei lo mipuihai chu,
Chi-aiin an muolpho a,
Phûla hlo hnâ ang an na,
Hna zîk dawng ang an ni a,
In chunga hlo a hung mawng,
A’n thrang lien hmaa nisa’n,
A em vuoi ang hi an nih.
27 “‘I chêngna hmun ka hriet a,
I fe le hung ka hriet vong,
Ka chunga i lungsen khom.
28 Ka chungah lung suksen a,
Trong uong i mi thaw khum chu,
Ka na’n a lo hriet leiin,
I hnâr le i baua chun,
Ka thir bar inbûk ka ta,
I hungna lama bok chun,
In kirtir nawk ka ti che’
tiin” a ta.
29 Chun, Isai chun Hezekia kuomah,
“I ta ding chun hienghai hi,
Inchikna ding ni’ng a tih:
Tu kum bu tuoltro ring in ta,
Kum nawk ring bok in tih.
Kum thumnaah bu tuin,
A ra khom sîk ta’ng in ta,
Grêp huonhai siem unla,
A ra suokhai chu tlàn ro.
30 Hlaa la um Juda sungkuo chun,
Hnuoi tieng zung hung kei an ta,
A lèr tieng ra insuong an tih.
31 Jerusalema inthokin,
Hlaa umhai hung suok an ta,
Zion tlanga inthokin,
A dam sunhai hung suok an tih.
Iengkim LALPA thrahnemngaina zàrin,
Chuong ang chun hlen suok a tih.
32 “Chuleiin, Asuria lal chungthua chun LALPAN hieng ang hin a hril:
‘Hi khawpui hi lut naw ni a,
Thal khomin kâp bok naw nih.
Phaw leh hung inlang naw ni a,
Inhuolna ding hlàn daw naw nih.
33 A hungna lamah kir nawk a ta,
Hi khawpui hi lut naw nih,
Ti hi LALPA thu suok a nih.
34 Keima zâr le ka siehlaw Davida zarin,
Hi khawpui hi huol him ka tih’
tiin” a ta.
35 Chu zân chun LALPA vantirko chu a’n thok suok a, Asuria-hai riebuka chun mi nuoi khat le singriet le sangnga a sukhlum a. Zing tieng an hang tho chun mithi ruong ngot an lo ni el ta a. 36 Chuongchun Asuria lal Senakerib chun an riebuk a suoksan a, Ninevi khuoah a um a. 37 Chun, tempula an pathien Nisrok a biek laiin a nauhai pahnih, Adramalek le Sarezer chun kawlhnâmin an hung sat hlum a, Ararat ramah an tlàn lut a, a naupa Esarhadon chun a lalna chu a hung hluo ta a.