Lalin zawlnei Isai a rawn
37
1 Hezekian chu chu a lo hrietin a silfenhai a pot thlĕr a, saiip a sil a, LALPA Tempulah a lût a. 2 Lal in enkoltu lu Eliakim le lekha ziektu Sebna le thiempu upahai chu saiip inbelin Amoz naupa zawlnei Isai kuomah a tir a. 3 Anni chun a kuomah, “Hezekia-in hieng hin a tih: ‘Voisun hi beidongna ni, invauna ni le hmaimawkna ni a na; naute pieng a hun ta si a, a hring suoktu ding a nuin thâ sang ding a nei ta si naw ang hi kan nih. 4 A pu Asuria lalin Pathien hring hrilse dinga a tir sipai kawmandar thu hrilhai po po chu LALPA i Pathien chun hre ngei a ta, a thu hriethai lei chun ama chu LALPAN la hal ve rawi nawnim. Chuleiin, hlaa la um sunhai ta dingin trongtraipek rawh’ tiin a tih” an ta. 5 Hezekia mi tirhai chun Isai kuom an hung tlung a. 6 Isai chun an kuomah, “In pu chu hieng ang hin hril ro: ‘LALPA chun hieng hin a tih: I thu hriet, Asuria lal hnuoia thoktuhai mi hrilsietna chu trì dêr naw rawh. 7 Ngai ta, a sunga chun thlarau sieng ka ta, thuthang a hriet charin a ram tieng kir nawk a ta, chu taka chun kawlhnâmin inthattir ka tih, a tih’ tiin” a ta.Asuria-haiin an hung vau nawk
8 Sipai kawmandar chun Asuria lalin Lakis a suoksan ti a hrietin a’n hnuk kir a, Libna khuo a lo bei lai chu a va hmu a. 9 Chuong lai bok chun Aigupta lal Kusha mi Tirhaka chu ama rûn dingin a hung ti Asuria lal Sennakerib chun thu a dong leiin Hezekia kuomah mi a tir a, 10 “Hieng ang hin Juda lal Hezekia kuoma chun hril ro: ‘I ring Pathien chun ‘Jerusalem hi Asuria lal kutah pĕk ni naw nih’ tiin hlĕm naw raw se che. 11 Asuria lalhaiin ram po po sukse vonga an chunga kut an thlăk dan khom i hriet chieng kha. 12 An leh, nang hi san him ni bik dinga inngai i ni? Ka pi le puhaiin Gozan hai, Haran hai, Rezef hai le Tel Assar-a um Eden mihai an sukbohmang lai khan in hnam pathienhai chun an san suok a ni? 13 Hamath lal hai, Arpad lal hai, Sefarvaim khaw lal hai, Hena lal hai le Iva lal hai kha tu hin khaw lai am an um zo ta a?’ tiin” thu a’n phurtir a.
Hezekia trongtraina
14 Chu lekha a hmu chun Hezekia chun a hang tiem a, LALPA Tempulah a tlân lŭt a, LALPA hmaa chun lekha chu a phar a. 15 LALPA kuomah a trongtrai a, 16 “Aw Iengkim LALPA, Israelhai Pathien, cherubhai inkara lalthrungphaa inthrung, nang chauh hi hnuoia lalram po po chunga Pathien i nih. Hnuoi le van hi nangma siem a nih. 17 Aw LALPA, i na lo dawin mi ngaithla hrăm rawh; aw LALPA, i mit mengin mi hung en ta; Sennakerib-in Pathien hring a hrilsietna thu hi lo ngaithla hrăm rawh. 18 “A nih, aw LALPA, Sennakeribin hnam le ramhai a sukram nasatzie hi thudik a nih. 19 An pathienhai chu meiah a pei a, a suksiet a, chuonghai chu pathien an ni naw hrim a, mihriem kuta siem thing le lung mei mei an nih. 20 Chuleiin aw LALPA kan Pathien, nangma chauh hi LALPA Pathien i nizie hnuoia lalram po po hin an hriet theina dingin, a kuta inthokin mi hung san suok ngei rawh” tiin. 21 Chuong lai chun Amoz naupa Isai chun Hezekia kuomah mi a tir a, a kuomah, “Hi hi LALPA, Israel Pathien hril chu a nih: ‘Asuria lal Sennakerib chungthua i hung hnìna ang khan, 22 hieng hi ama chungthua LALPA thu chu a nih:
“Zion nunghak thienglâm chun,
Hmusitin a nuizat che.
Jerusalem naunu chun,
I tlănsiet lai a hmuin,
A lu a thin khum chê a nih.
23 A tû hrim hrim am a na,
Hmusita i deusaw kha?
Tu chung am a na i râwl,
I hang sukpuom hrim hrim kha?
Tu lak am a na i mit,
I hang meng sang hrim hrim kha?
Israelhai Mi Thienghlim chungah.
24 I mi tirhai bău hmangin,
LALPA hming i hrilsiet a:
‘Ka tawlailir tam tak leh,
Tlâng sâng chen ka hang hne a,
Lebanon tlâng sîp ka chuon a,
A sidar tluon sei sei hai le
A far thing thrá thràhai chu,
Ka nuom nuomin ka phûr a,
An ram ril le ngaw thratna,
Tlok naw sam hrim ka nei nawh.
25 Ram dangah tuikhur choin,
An ram tuihai ka tlăn a.
Aigupta vadungte po po,
Kein ka pal kangpêk vong’
Tiin i hril a ni kha.
26 “‘Tiena inthoka keiman,
Thaw dinga ka lo ruot sa,
A nih ti i hriet naw maw?
Ka ruohmang ta sa angin,
Thil iengkim a hung tlung a,
Kul nei khuohai i suksiet a,
Lung bŭm khawm i’n changtir a,
27 An mipuihai che thei loin,
Chi-aiin an muolpho a,
Phŭla hlo mawng ang an na,
Thing tuoi dawng lai ang an na,
In chunga hlo a hung mawng,
A’n thrang lien hmaa nisa’n,
A em vuoi ang hi an nih.
28 “‘Sienkhom i chĕngna hmun le,
I fe le hung ka hriet vong,
Ka chunga i lungsen hrăng khom.
29 Ka chunga i lungsen inhrăwt,
Trong uong i mi thaw khumhai,
Ka nain a lo hriet leiin,
I hnârah hnâr kol inbunin,
I băuah thîr bar inbûk ka ta,
I hungna tieng lampuia bok,
In kîrtir nawk ka ti che’tiin.”
30 Isai chun Hezekia kuomah,
“I ta ding chun hienghai hi,
Inchikna ding ning a tih:
Tu kum bu tuoltro ring in ta,
Kum nawk leh ring bok in tih.
Kum thumnaah bu tuin,
A ra khom sîk ta’ng in ta,
Grêp huon siemin phun unla,
A răhai chu tlàn ta ro.
31 Hlaa um Juda sungkuo chun,
Hnuoi tieng zung hung kei an ta,
A lĕr tieng ra insuong an tih.
32 Jerusalema inthokin,
Hlaa umhai hung suok an ta,
Zion tlanga inthokin,
A dam sunhai hung suok an tih.
Iengkim LALPA thrahnemngainan,
Chuong ang chun hlen suok a tih.
33 “Chuleiin, Asuria lal chungthuah,
LALPAN hieng ang hin a hril:
‘Hi khawpui hi lut naw ni a,
Thal khomin kâp bok naw nih.
Phaw leh hung inlang naw ni a,
Inhuolna ding hlàn daw naw nih.
34 A hungna ngaiah kîr a ta,
Hi khawpuia hin lût naw nih,
Ti hi LALPA thu suok a nih.
35 Kei le ka siehlaw Davida zarin,
Hi khawpui hi hum ka tih’ tiin.”
36 Chu zan chun LALPA vantirko chu a’n thok suok a, Asuria-hai riebuka chun mi nuoi khat le singriet le sangnga a sukhlum a. Zing tieng an hang tho chun mithi ruong ngot an lo ni el ta a. 37 Asuria lal Sennakerib chun an riebuk chu a suoksan a, Ninevi tieng a kir a, chu taka chun a um a. 38 Ni khat chu tempula an pathien Nisrok a biek laiin a nauhai pahnih, Adramalek le Sarezer chun kawlhnâmin an săt hlum a, Ararat ramah an tlăn lŭt a, a naupa Esarhadon chun a lalna chu a hung hluo ta a.