Juda lal Manase
33
1 Manase a hung inlal chun kum sawm le kum hni mi a na, Jerusalemah kum sawmnga le kum nga a’n lal a. 2 Israelhai hmaa LALPAN a hnot suok hnamhai chîng dan tirdakum tak chu zuiin LALPA mithmuah thil suol a thaw a. 3 A pa Hezekia-in a sukchim hmunsânghai chu a’n din thar nawk a, Baal maichàmhai a bawl a, Asera lim thinghai a phun a, vana um po po khi a biek a, an rong a bawl a. 4 LALPAN “Jerusalem-ah kumkhuoin ka hming um a tih” a tina LALPA tempula chun pathien danghai maichàm a bawl a. 5 LALPA Tempul tuolzawl ve vea chun vana um po po ta dingin maichàm a siem a. 6 Ben Hinom ruomah a naupahai meiah a’n hlàn a, aisan a chîng a, dawi a hmang a, ramhuoi zawlhai le rau ko thiem hai a rawn a, LALPA suklungsen dingin a mithmuah thil suol tam tak a thaw a.7,8 Pathienin Davida le a naupa Solomon kuoma, “Hi tempul le Israel thlahai hmun laia ka thlang Jerusalema hin ka hming chu kumkhuoin inumtir ka ta, Mosie hmanga thu ka pèkhai, dànhai, thusuokhai le thuruot po po fimkhur taka an zawm phot chun, an pi le puhai ka pèk tah hi rama inthok hin Israelhai ke chu inpen suoktir ta naw ning” a lo tina Pathien Tempula chun ama milim inkertir chu hung chawiin a sie a. 9 Manase chun Judahai le Jerusalema mihai chu thruoi suolin, LALPAN Israelhai hmaa a sukbohmang hnamhai nêka nasa lemin thil suol an thaw a.
10 Manase le a mihai kuomah LALPAN thu a hril hlaka chu an ngaisak nawh. 11 Chuleiin, LALPAN Asuria sipai kawmandarhai a tir a, Manase chu an man a, a hnârah khaidiet an inbuntir a, dar kol an inbuntir bok a, Babulon tieng an thruoi a. 12 Beidong taka a um lai chun LALPA a Pathien ditsakna chu a zong a, a pi le puhai Pathien hmaa chun nasa takin a’n phàhnuoi a. 13 Chuonga trongtraia a hang hni chun LALPA lung a tawk a, a hnìna chu LALPAN a ngaithlak a, Jerusalemah a rama chun a thruoi kir nawk a. Chu phing leh Manase chun LALPA chu Pathien a nizie a hung hriet ta a.
14 Chu hnung chun Davida khawpui inhuonna tuol bang, Gihon vadung thlang tieng ruoma inthoka Nga Kotkhar lutna chenin, a siem thra a, Ofel muol inhuol velin insang takin a rem a. Chun, Judai rama kul umna khaw tinah sipai kawmandar a sie vong a. 15 Ram dang pathienhai le milimhai po po chu LALPA Tempula inthokin a’n thiel fai vong a, LALPA Tempul muol le Jerusalema maicham a siemhai po po chu khuoa inthokin an pei hmang vong a. 16 Chun, LALPA maichàm chu a siem thra a, inremna thilhlân le lawmthu hrilna thilhlân hai chu a’n hlàn a, Judahai chu LALPA Israelhai Pathien rong bawl dingin a hril a. 17 Mipuihai chu hmunsânga hai chun an la’n thawi zing a, sienkhom LALPA an Pathien kuoma chauh a ni ta lem.
Manase hun tawp
18 Manase inlal laia thil tlung danghai le Pathien kuoma a trongtrai thu hai, LALPA, Israelhai Pathien hminga a kuoma zawlneiin thu a hrilhai chu Israel lalhai chanchin inziekna buah a chuong. 19 A trongtraina thu le a hninain Pathien lungril a tawk thu hai, a’n phàhnuoi hmaa a khawsak dan, a suolna le ringum nawna hai, hmunsâng a bawlna hmun hai le Asera lim thing le a milim siem fawmhai a siena hmun po po chu Hozaiin a chanchin a’n chikna buah a chuong vong. 20 Chuongchun, Manase chu a pi le puhai kuomah a chawl a, ama inah an phùm a, a naupa Amon chun a lalna chu a hung hluo ta a.
Juda lal Amon
21 Amon chu kum sawmhni le kum hni a ni kumin a’n lal tran a, Jerusalemah kum hni a’n lal a. 22 A pa Manase thaw ang bokin LALPA mithmuah thil suol a thaw a, a pa Manase siem fawm milim po po kuomah Amon chu a’n thawi a, an rong a bawl a, a suol zuol sau lem a nih. 23 A pa Manase inphahnuoi ang khan LALPA hmaah a’n phahnuoi ve nawh. 24 Chun, a siehlawhaiin an phierruk a, ama inah an sukhlum a.
25 Nisienlakhom Amon phiertu po po chu mipuiin an that vong a, mipui chun a naupa Josia chu lalah an siem a.