1 Chuong lai chun Babulon lal Baladan naupa Merodak Baladan chun Hezekia damnaw thu a lo hriet leiin lekhathon le thilpek inchawitirin mi a tir a. 2 Hezekia chun anni chu a lo lawm a, a thil hlu po po tangka le rangkachak dam, rimtui dam, hriek hlu tak dam, ralthuom dam a siena le a ina ro um po po chu a’n entir a; a ina mi le a ram sunga thil inentir naw sam a nei nawh. 3 Chun, zawlnei Isai chu Hezekia kuomah a fe a, “Hienghai hin iem an hril a, khaw laia inthoka hung am an na?” tiin a’n don a. Hezekia chun, “Ram hla tak, Babulona inthoka hung an nih” a ta. 4 Zawlnei chun, “I ina hin ieng ieng am in inentir ta a?” a ta. Hezekia chun, “Ka in sunga thil um po po hi an hmu vong ta a, ka ro laia mi ka’n entir naw hrim hrim a um nawh” a ta. 5 Isai chun Hezekia kuomah, “Iengkim LALPA thu hi lo ngaithla raw khai. 6 ‘Ngai ta, i in sunga um po po le voisun chena i pi le puhai ro khawl khawmhai chu Babulon tienga an fepui ni la hung tlung a ta, ieng khom maksan hrim nei naw ni hai’ LALPAN a tih. 7 ‘Chun, i thlahai, nangma taksa le thisen put ngei la hung pieng dinghai laia mi ngei khom la thruoi hmang an ta, Babulon lal ina an sor mi tilrehai lai la thrang veng an tih’ a tih” a ta. 8 Hezekia chun a dam sung muong tak le him taka a um ding thu a hrilna a sawn leiin Isai kuomah, “LALPA thu i hril hi a thra” a ta.