2 Lal 18

Juda lal Hezekia

1 Israel lal, Ela naupa Hosea inlala inthoka kum thumnaa chun Ahaz naupa Hezekia chu Juda lalin a hung inthrung a. 2 Lal a hung ni chun kum sawmhni panga mi a na, Jerusalemah kum sawmhni le kum kuo a’n lal a. A nu hming chu Abija a na, Zekaria naunu a nih. 3 A pu Davida thilthaw dan anga thaw vein, LALPA mithmuah thil thra a thaw hlak a. 4 Hmunsânga an bawlhmunhai chu a pei hmang a, an lungphunhai chu a vuok nawi a, Asera lim thinghai chu a phûr a. Chuong lai hun chen chun Mosie dar rul siema chun Israelhaiin rimtui an la raw hlak leiin a vuok nawi vong a (Hienga rimtui an raw hlak hi Nehustan an tih).

5 Hezekia chun LALPA, Israelhai Pathienah ringna a’n nghat a. Juda lalhai lai ama ang hrim a hma khomin, a hnung khomin an um nawh. 6 Nghet takin LALPA a chel tlat a, a zui zing a, LALPAN Mosie kuoma thu a pekhai chu a zawm tlat bok a. 7 LALPA chun a umpui zing a, a thilthaw tinrêngah a hlawtling a. Asuria lal lakah a hel a, a rong a bawl ta naw a. 8 Ral vêngbùk le kul nei khuo Filistinhai ram chin po po chu Gaza chenin a hnê vong a.

9 Lal Hezekia inlala inthoka kum lina, Israel lal Ela naupa Hosea inlala inthoka kum sarinaa chun Asuria lal Salmaneser chun Samaria khawpui chu a hung bei a, a’n huol a. 10 Kum thum an inhuol hnungin Asuria-hai chun an làk a. Samaria an lak kum hi Israel lal Hosea inlala inthoka kum kuona a nih. 11 Asuria lal chun Israel mihai chu salah a thruoi a, Hala rama dam, Gozan rama Habor vadung phaia dam le Medes-hai khuoa dam a’n umtir a. 12 LALPA an Pathien thu zawm loa a thuthlung, a siehlaw Mosie hmanga LALPAN thu a pèk po pohai chu an bawsiet leiin hieng thil hi an chungah a hung tlung a nih. LALPA thupèkhai chu an ngaithlàk nuom naw a, an thaw nuom bok nawh.

13 Hezekia inlala inthoka kum sawm le kum linaa chun Asuria lal Sennakerib chun Judai rama khuo, kula inhuonhai chu a hung bei a, a lâk a. 14 Juda lal Hezekia chun Lakis khuoa Asuria lal kuoma chun, “Ka lo suksuol a nih. Inhnuk kir la, ka laka i ngiet po po chu peng ka ti che” tiin thu a thon a. Asuria lal chun Juda lal Hezekia chu tangkaruo kilogram singkhat le rangkachak kilogram sangkhat chawi dingin a tuk a. 15 Hezekia chun LALPA tempul le lal ina ro siekhawmnaa an nei po po chu a pêk a. 16 Hi trum hin Juda lal Hezekia chun LALPA tempul kotkhar le kotkhar bieng tuomna rangkachakhai chen khom a khok fai vong a, Asuria lal a pêk a nih.

Sennakeribin Jerusalem bei a tum

(2 Kro 32:1-19; Isa 36:1-22)

17 Asuria lal chun a mi lien tak pathum Tartan, Rabsari le Raksake^a hai chu sipai tam tak leh Lakis-a inthokin Jerusalema lal Hezekia bei dingin a tir a. Jerusalem an tlung chun an tui lakna kor chuonchunga tui kul, Puonsawptuhai Hmun panna lampuia chun an chawl a. 18 Chu taka inthok chun lal chu an hang ko a, lal in enkoltu lu tak Hilkia naupa Eliakim hai, lekha ziektu Sebna hai, chanchin ziektu Asaf naupa Joa hai chu an hung suok a. 19 Rabsake chun an kuomah, “Lal Hezekia kuomah hieng hin hril ro: ‘Lal ropui tak. Asuria lal chun hieng hin a tih: I ringsan, i’n nghatna hi ieng am a na? 20 Indonaa dingin remruot thiem le sipai hrât tak tak kan nei dam i ti a, sienkhom chu chu kawk boa inpawt mei mei ang a nih. A tu am ringsanin ka lakah i hel ngam hrim hrim a na? 21 Tu hin ngai rawh, Aigupta mei mei dam kan hnèmpui i ti maw? Aigupta lal Faraw inhnempui chu luong hmol por tah, kut chu ât thi thei, innghai chun mi sukhliem thei ringsan ang char a nih. 22 Tu hin, ‘Kan ringsan chu LALPA kan Pathien a nih’ i ti dam a ni chun, Judahai le Jerusalem mihai kuoma Hezekia’n, ‘Jerusalema maichàm hmaa chauh hin in biek ding a nih’ a ti leia hmunsanga a bawlhmun le maichamhai po po a dehawnpekpa kha a ni naw maw?

23 “Chuongchun, ka pu Asuria lal kuomah hung la, indawrpui rawh: a chuong ding mi i hmu indai phot chun sakor sanghnih khom peng ka ti che. 24 Aigupta mihai tawlailir le sakor chungchuonghai i ringsan ringota chu ka pu mihai laia hotu chin tak khom hi i dang kir zo ding am a ni? 25 Chu bakah, LALPA thu thrang loin hi hmun hi bei le hnè dinga ka hung i ring a ni? LALPA ngei chun hi ram hi hang beia sukse dingin a mi hril a nih’ tiin” a ta.

26 Hilkia naupa Eliakim le Sebna le Joa chun Rabsake kuomah, “Lunginsiet takin Aramik trongin mi hrilpek rawh, i siehlawhai hin kan hriet thei tho si a; kul chunga umhai hrieta chu Hebrai trong chun mi be ta naw hram rawh” an ta. 27 Rabsake chun, “Ka pu chun in pu kuoma le nangni kuoma chauh hieng thu hi hril dingin a mi tir am a ni? Kul chunga inthrunghai, nangni le anni mani ek faa mani zun la dawn dinghai kuoma khom a mi tir naw am a ni?” a ta.

28 Chuongchun, Raksake chu a ngîr a, Hebrai trongin inring takin a khêk a, “Lal ropui tak Asuria lal thu hi lo ngaithla ro. 29 Lal chun hieng hin a tih: ‘Hezekia hlèm bawlin um naw ro, ama chun ka kuta inthokin a san suok thei naw cheu. 30 Hezekia chun, ‘LALPAN mi san suok ngei a ta, hi khawpui hi Asuria lal kutah pèk ni naw nih’ tiin LALPA chu ring dingin thu hne naw raw se cheu. 31 Hezekia thu ngai naw ro. Asuria lal chun hieng hin a tih: Mi’n rempui unla, ka kuomah hung inpe ro. Chuongchun, mi tinin mani huona grep le theichang fain, mani tuibêl ngeia tui chu dawn zing thei in tih. 32 Chu chu nangni ram ang boka ram hnienghnar, bu le uoiin thar tamna ram, bei le grep tamna ram, oliv le khuoizu tamna rama ka thruoi hma cheua in khawsak dan ding chu a nih. Thi nêkin hring thlang lem ro. Hezekian, ‘LALPAN mi san him a tih’ tia a thlêm cheu khomin a thu la naw ro. 33 Tu hnam pathienin am hi ram hi Asuria lal kuta inthokin a san suok ti in hriet ta hlak a? 34 Hamat le Arpad hai pathien kha khaw lai am an um zo ta a? Sefarvaim hai, Hena hai le Ivva hai pathienhai khom kha khaw lam an um zo ta a? Samaria chu ka kuta inthokin an san him am a ni? 35 A tu ram pathienin am hi ram hi ka kuta inthokin an san suok thei ta hlak a? LALPA chun ka kuta inthokin Jerusalem khuo hi a san suok telul ding maw?’ tiin” a ta.

36 Lal Hezekia chun, “Anni chu don dèr naw ro” tia thu a pèk angin mihai chun ieng khom an hril nawh. 37 Chuongchun, Hilkia naupa Eliakim, lal in enkoltu lu tak le lekha ziektu Sebna le chanchin ziektu Asaf naupa Joa hai chu Hezekia kuomah an fe a, an puonhai an pot thler a, Rabsake thu hrilhai chu an hril sawng a.