9 Kei chu tirkohai laia chîn tak ka na, Pathien kohranhai ka suknomnat leiin tirkoa inbûk tlăk khom ka ni nawh. 10 Sienkhom, Pathien lunginsietna leiin ka ni ang hi ka hung ni a, ka chunga a lunginsietna chu a thlawn nawh. Tirko danghai nêkin sin ka thaw nasa lem a; amiruokchu, keima thaw a ni naw a, ka kuoma um Pathien lunginsietna khan a thaw a ni lem. 11 Keiin amanih anniin amania thu kan hril hlak ngei kha a nih nangni khoma in lo ring tah hih.

12 Mithi laia inthoka Isu Krista keitho a ni thu kan hril hlak si chun ieng ti dâna nangni laia threnkhatin mithi thonawkna a um nawh in ti am a na? 13 Mithi thonawkna a um si naw chun Krista khom kha keitho ni naw nih. 14 Krista kha keitho a ni si naw chun kan thu hung hril hi thu hmang lo ning a ta, in ringna khom hmangna bo ning a tih. 15 Chu chau chu a ni nawh. Pathienin mithi laia inthoka Krista a keitho thu kan hril hlak a, mithi thonawkna a um si naw chun Krista khom keitho ni naw ni a, Pathien chungthua hrepuitu khêlhlip ni bok kan tih. 16 Mithihai keitho an ni si naw chun Krista khom kha keitho ni naw nih. 17 Krista kha keitho a ni si naw chun, in ringna chu a thlâwn el ning a ta; in suolnaah in la um zing ning a tih. 18 Chuong a ni chun Kristaa lo in tahai khom kha an bohmang tah ni’ng a tih. 19 Kristaa beiseina ei nei hi tuta dam sunga ding chauh lo ni sien chu, mi po po laia mi lungsietum tak ni’ng ei tih.

20 Nisienlakhom, Krista chu mithi laia inthokin keitho a ni takzet a, mithi thonawkhai hmathruoitu a nih. 21 Mihriem pakhat leiin thina a hung um a, mihriem pakhat lei bokin mithi thonawkna khom a um a nih. 22 Adamah mi po po an thi ang khan, Kristaah mi po po sukhring ning an tih. 23 Amiruokchu, mani hun sengah ning a tih. Thonawkna hmathruoitu Krista chu a tho hmasa a, a dotah, a hung nawk pha ama mihai chu tho an tih. 24 Chu zoah tawpna chu hung tlung a tih. Lalram hai, thuneina hai le thilthawtheina po pohai a sukbo hnungah Pa, Pathien kuomah ram chu inhlăn a tih. 25 Pathienin a hmêlmahai po po hnè a, a ke hnuoiah a sie vong hmâ khat chu Krista chun ro a rĕl ding a ni si a. 26 Hmêlma nuhnung tak sukboa um ding chu thǐna hi a nih. 27 Pathienin, “Iengkim a ke hnuoiah a sie” Sam 8:6 ti a ni a. Hi taka “iengkim” tia hin Krista hnuoia iengkim sietu Pathien chu a thrang ve nawh ti a’n lang chieng a. 28 A hnuoia iengkim sie a ni hnungah, ama, Naupa ngei chu, a hnuoia iengkim sietu Pathien hnuoiah sie ni tang a ta, Pathien chu iengkima chunghnung tak ni tang a tih.

29 An leh, thonawkna a um si naw chun, mithi puola baptisma^a inchangtuhai khan iem a na an thaw hrim? Mithihai keitho an ni si naw ding chun ieng leia mithi puola baptisma an inchang hlak am a na? 30 Ieng leiin am keini khom darkar tin kan hringna kan thăp am a na? 31 Unauhai, ei Lalpa Isu Kristaah ka uongpui ĕm chêu leiin ni tina thina ka hmasuon hlak thu ka hril chêu a ni hi. 32 Mihriem beiseina mei mei chauh hmangin, Efesi khuoa hin sahrang insuolpui ni ta lang, ka ta dingin iem a trangkai a? Mithihai keitho an ni si naw ding chun,

33 Thruoi hmangin um naw ro, “Ruol suolin nungchang thra an sukkhawlo hlak”^b ti a ni kha. 34 Har fîm unla, suol thaw ta naw ro. Threnkhat chun Pathien hrietna hrim in nei nawh; chu chu in inzakna dinga ka hril a nih.

35 Ieng tin am mithihai chu keitho ning an ta? Ieng taksa am put an ta? tiin in indon a ni thei. 36 Chu chu zawna invêthlak tak a nih. Hnuoia thlai chi in tu hi a thi zet naw chun a tro ngai nawh. 37 Bu chi amanih thil dang chi amanih in tu hin a kûng la hung um ding chu in tu naw a, a chi mal chauh a la nih. 38 Nisienlakhom, Pathienin a nuom dan angin a kûng a hung siem a, thlai chi hrang hrangin kûng chi hrang hrang an nei hlak. 39 Taksa po po hi a’n ang vong nawh: mihriem taksa a dang a, ran taksa a dang a, vate taksa a dang a, nga taksa a dang. 40 Van taksa a um a, hnuoi taksa a um a, van taksa ropui dan le hnuoi taksa ropui dan khom an inang nawh. 41 Nisa hin ama ropuina a nei a, thlain ama ropuina hran a nei a, arasihai khomin ropuina an nei a, arasi hrang hrang ropuina khom an inang nawh.

42 Mithi thonawkna khom chuong ang bok chu ning a tih. Taksa chu hmon theia tuin a um a, hmon thei loa keithoin a um a; 43 chawimawi loa tuin a um a, ropui taka keithoin a um a; hrat nâw taka phŭmin a um a, thilthawtheia keithoin um a tih. 44 Ei phŭm kha mihriem taksa a na, keithoa um chu thlarau tieng taksa a nih. Mihriem tieng taksa a um chun thlarau tieng taksa khom um a tih. 45 Pathien Lekha thu chun, “Mihriem hmasa tak Adam chu mi hring a hung ni tah a” a ta; Adam nuhnung tak chu hringna petu Thlarau a nih. 46 Thlarau tieng um hmasa loin taksa tieng a um hmasa a, chu hnungah thlarau tieng a um chauh a nih. 47 Mihriem hmasa chu pila siem, hnuoi mi a ni a, mihriem pahnina chu vàn mi a nih. 48 Hnuoia mihriemhai chu hnuoia mi ang an na, vana mihai ruok chu vana mi ang an nih. 49 Hnuoia mi angna ei put ang hin vana mi angna khom la put ngei ei tih.

50 Unauhai, taksa le thisen hin Pathien ram a hluo thei naw a, hmon thei hin hmon thei lo chu hluo bok naw nih ti ka hril a nih. 51 Thurûk ka hril cheu hi, ngaithla ngun ro. Ei rêngin ei in vong naw ding a na, sienkhom tawtawrawt nuhnung tak a hung inri pha chun thawk le khat, mit khap kar loin sukdanglam ni vong ei tih. 52 Tawtawrawt a hung inrîk pha chun mithihai chu hmon thei loa keitho ning an ta, eini khom sukdanglam ning ei tih. 53 Hmon thei hi hmon thei loah inchang a ta, thi thei hi thi thei loah inchang a tih. 54 Chuong anga hmon thei hi hmon thei loa a hung inchang huna chun hi Pathien Lekha thu,

56 Thǐna tûr chu suol hi a na, suol thilthawtheina chu Dan hi a nih. 57 Sienkhom, ei Lalpa Isu Krista zara hnĕna mi petu Pathien kuoma chun lawmthu um raw se.

58 Chuleiin, ka unau dittakhai, sukchăng ruol loin ngîr nghet unla, Lalpaa chun in sin inrimna a thlawn naw dingzie hre zingin, Lalpa rongbawlna sina chun inpe fâi thrak ro.