Inpâkna hla
25
1 Aw LALPA, ka Pathien i na,I hming inpakin chawimawi ka tih.
Thil mak tak tak i thaw hlak a,
Tiena inthoka i remruothai chu,
Ringum takin i hlen suok hlak.
2 Hmunhnok dèng bûmna angin,
Khawpuihai chu i’n changtir a,
Kul nei khuohai po po khom,
Nangman i sukchim vong a.
Ram danghai kulpui nghet khom,
Nangman i sukram vong a,
Indin thar ni ta ngai naw nih.
3 Chuleiin, hnam hrathai chun,
Nangma chawimawi an ti che a,
Hnam tawrot chengna khuohan,
Nangma inzà hlêng an ti che.
4 Thlipuiin bang a nêk anga,
Thlalĕr sa huom huom anga lum,
Mi tawrothai thuokin a mŭt,
Retheihai inbǐkna i na,
Beidong tlasamhai ta dinga,
An kulbing nghet chu i nih,
Ruo le thlipui laka himna,
Nisa laka an deihlim chu.
5 Thlaler lum anga chawl loa,
Nuoitu hnam danghai rihău chu,
Nangman i sukrê vong a,
Sûmin ni a zàr hlie angin,
A ram chu i zàr hlim a,
Tawrothai rihău a rè tah.
Pathien ruoi ropui
6 Iengkim LALPAN chu tlangah,
Mi tin ta din ruoi hnienghnar,
A la buotsai ding a na,
Sa inhnik hnik, a thlin leh,
Uoiin thrâ thră, a tuihăng leh,
Ruoipui a la thrè ding a nih.
7 Mi po po hmai tuom hlaktu,
Hnam tin chunga inzâr chu,
Chu ni chun hlip kieng a tih.
8 Thina lem song ta’ng a ta,
A mihai mitthli hru hul a ta,
A mihai hmingsietna po po chu,
Hnuoi a’nthok la hmang a tih,
Chu chu LALPA hril a nih.
9 Chu ni chun, hie’n hril an tih:
“Ama ngei hi ei Pathien a nih;
Ei ringsan a, a mi san suok tah.
Ei innghatna LALPA chu a nih,
A sandamna chunga hin,
Hlim takin lawm ei tiu” tiin.
10 LALPA kut chu hi tlanga hin,
A hung innghat ding a ni si a.
Êk dûra bupawl sir phŭm angin,
Moab-hai chu sir sop a tih.
11 Tuia mi an inhlieu pha,
Kuta an inzăp hlak ang hin,
Êk khurah kut zâp an ta,
Ieng angin thranghai sienkhom,
An chapona leh êk dŭrah,
Pathienin nam phŭm a tih.
12 Kul bang insanghai khom chu,
Sukchimin um vong a ta,
Pilvut lai inlet rum an tih.