Trong hriet lo chungchang
14
1 Hmangaina hi hnot pei unla, thlarau thilpĕkhai chu dong châk hle unla, abikin thuhril theina lem chu dong châk zuol ro. 2 Trong hriet loa thu hriltu chun a thlaraua thurûk Pathien kuoma a hril a ni leiin mi dang tu khomin an hriet thei nawh. 3 Thuhriltu ruok chun mihai sukhrât ding dam, chokphûr ding dam le thlamuong ding damin an kuomah thu a hril lem hlak. 4 Trong hriet loa hriltu chun ama a’n dom sang a, thuhriltu ruok chun kohran a dom sang hlak.5 Trong hriet lo nei vong inla ka ti hle a, thu hril theina lem chu nei vong inla ka ti nawkzuol. Kohran hlawkpui dinga hril fiepektu an um si naw chun trong hriet lo neihai nĕk chun thuhril theina neihai chu an trangkai lem.
6 Unauhai, tuhin in kuomah hungin trong hriet loin hung trong ta lang, in kuomah thu puong a, hrietna inbà chêu a, thu hrila ka’n chŭktir chêu amanih a ni si naw chun ieng tin am mi hlawkpui thei tang in ta? 7 Hringna nei lo thil inri thei tringtrang keiin amanih theihle mût ta hai sien, a ri bi ding anga a’n ri suok si naw chun ieng hla am an tum ti tuin am hre thei a ta? 8 Tawtawrawt khom mumal uma an mŭt naw chun tu am râl do dingin insiem an ta? 9 Chuong ang bokin, trong hriet theia in hril a ni si naw chun tuin am in thu hril chu hre thei tang an ta? Boruoka trong mei mei ang chauh ning in tih. 10 Sĕl ruol loin khawvela hin trong chi hrang hrang a tam hle a, umzie nei lo pakhat khom a um nawh. 11 Amiruokchu a thu hril umzie ka hriet si naw chun kei chu a ta dingin ram dang mi ni’ng ka ta, ama chu ka ta dingin ram dang mi ni bok a tih.
12 Chuong ang char chu nangni lai khom a ni ve. Thlarau thilpĕk dong in châk hlè lai hin, kohran tungdingna dinga thra thlarau thilpĕk chu hlut tak ro.
13 Chuleiin, trong hriet lo neihai chun a hrilfie theina hni raw se. 14 Trong hriet loa ka trongtrai chun ka thlarau chu a trongtrai ngĕi a, ka ngaituona ruok chu ka hmang hlăwk nawh. 15 Ieng tin am ni tang a ti le? Thlarauin trongtrai ka ta, ngaituona hmangin trongtrai bok ka tih; thlarauin inpâkna hla sak ka ta, ngaituona hmangin sak bok ka tih. 16 I thlarauin Pathien inpâkin lawmthu hril la, i thu ngaithlatuhai khan i hril umzie an hriet si naw chun ieng tin am ‘Amen’ ti thei an ta? 17 I lawmthu hril trongtrai chu a thra hlè khom a ni thei, mi dang ruok chu a sukhlawk chuong nawh. 18 Nangni nêka trong hriet lo ka hmang rawn lem leiin Pathien chungah ka lawm hle a; 19 sienkhom kohran inkhawmah mi dang inchuktirna ding chun trong hriet loa thu mal singkhat hril nêkin ngaituona hmanga an hriet thiem thei zawng thu mal panga chauh hril ka nuom lem.
20 Unauhai, naupang lungril puta thil in ngaituo hlak kha bansan ro; suol kongah nautesen ang ni unla, ngaituonaa ruok chu puitling takin um ro.
21 Dan thua khom,
“Trong dang hmangtuhai hmangin,
Ram dang mihai hmŭr hmangin,
Hi mihai kuomah hin hril ka ta,
Lalpan a tih, ti ziek ang khan.
22 Chuongchun, trong hriet lo hi ringnawtuhai ta dingin inchikna a na, ringtuhai ta ding chun a ni chuong nawh; chuong ang bokin thuhril hi ringtuhai ta dingin inchikna a na, ringnawtuhai ta ding ruok chun a ni nawh. 23 Kohran pumpui inkhawmah inrêngin trong hriet loin thu hril ta mur mur unla, la hre ngai lo amanih le ringnawtu amanih hung lut hai sien, in invêt ta’m a nih an ti naw ding maw? 24 Inrêngin thu lo hril ni unla ruok chu, ringnawtu amanih la hre ngai lo amanih hung lŭt ve lungril chu in thu hril chun tâwk a ta, in hril hron a nih ti hrieng a ta, a suolzie inhriet suoktir a ta, 25 chuongchun, a lungril rûkhai chu phor langin, bokkhupin Pathien chawibiek a ta, “Nangni lai Pathien a lo um takzet a ni hi” ti lem a tih.
Chawibiek inkhawma um dan ding
26 Unauhai, in inkhawm pha hla thlang nei dam, thucha hril nuom dam, puong ding nei dam, trong hriet loa thu hril nuom dam le hrilfie ding nei dam in um si chun ieng tin am ni tang a ta? Hieng po po hi kohran sukhrâtna dingin thaw ro. 27 Trong hriet loa thu in hrilin mi pahni, a tam tawpah pathum bakin hril naw un la, an dot peiin hril unla, pakhatin hrilfie pei raw se. 28 Hrilfietu an um naw chun inkhawmnaa chun to el sien, ama hriet chauin Pathien kuomah hril lem raw se. 29 Thuhril khom mi pahni pathum chauin hril sien, mi dangin chîk takin lo ngaithla raw se. 30 Amiruokchu a ngaithlaa inthrunghai lai thucha dong an um chun a hril hmasatu chu to phot raw se. 31 A’n dotin thu hril hlak unla, chuongchun mi tinin inchûk ding nei thei in ta, insukphŭr tlăng thei in tih. 32 Thuhriltuhai thuhril theina thlarau chang chu a koltu thununna hnuoiah a um ding a nih. 33 Pathien chu buoina Pathien ni loin, remna Pathien a ni lem si a.
34 Kohran tina mi thienghlimhai thaw dan angin, kohran inkhawmah nuhmeihai chu to zingin um raw hai se, thu an hril ve phal a ni si nawh. Dan bua a hril angin, an intuklŭt lem ding a nih. 35 Thil hriet fie an nuom chun in tieng an pasalhai indon lem raw se; nuhmei ta dingin kohran inkhawma thu hril hi thil inzăpuium a nih.
36 Pathien thu hi nangnia inthoka suok a ni? In kuoma chauh a tlung a ni? 37 Tu khom zawlnei amanih thlarau mi amanih nia inngai chun in kuoma ka lekha hung ziek hi Lalpa thupĕk a nih ti lo hre raw se. 38 Mêna thlaktu chu ama khom mena thlaka ni’ng a tih.