Israel chunga Pathien lungsenna
13
1 Efraim a hang trong pha leh,Mihai an inthin hawp hlak a,
Israel ramah ngaisang a hlaw.
Sienkhom Baal biekna tieng,
An hmang suol leiin a thi a.
2 Tuhin an suol deu deu a,
An tangkaruohai hmangin,
Milimhai an insiem a,
Vervêk taka an duong suok,
Themthiem kutsuok vong a nih.
“Mihriemin an inthawi a,
Bawngte lim chu an fawp a”
Tiin an chanchin an hril hlak.
3 Chuleiin, zing trieusûm ang,
Zing daidaw ral nawk el ang,
Hrizâwla bu si inlêng ang,
Tukvera meikhu suok ang,
An hung inchang ding a nih.
4 “Kei hi LALPA in Pathien,
Aigupta rama inthoka
Thruoi suoktu cheu chu ka nih.
Kei naw chu Pathien dang hrim,
In pom ding a ni naw a,
Kei naw chu Sandamtu dang,
In pom ding a ni bok nawh.
5 Ram lum le sahâlna hmun,
Thlalĕrah ka don cheu kha.
6 Ka chawm cheu a, in khop a,
In khopkham pha in chapo a,
Chu pha leh in mi theinghil si.
7 Chuongchun, sakeibaknei angin,
In chungah hung truong ka ta,
Keite ang elin lampuiah,
Lo inchăn rŭk ka ti chêu.
8 A tê lăkpĕk savom ang elin,
Lo beiin pot thler ka ti chêu a,
Keipui angin fang ka ti chêu a,
Ramsa angin pot chen ka ti chêu.
9 “Aw Israel, a thrangpuitu che,
Nangman i mi do tlat leiin,
Suksietin i um a ni hih!
10 A san ding che i lal chu,
Khaw lai am a um ta a?
In khawpuihai santu dinga,
Lal le hotu in hnǐhai kha,
Khaw lai am an um zo ta a?
11 Lungsenin lal ka pêk cheu a,
Lungsenin ka lâk nawk a.
12 Efraim suolna intieng hnûr chu,
Zieka inchik le kol vong a nih.
13 Nauha sè anga nâ tuor a ta,
Sienkhom nau a pieng huna,
Suok nachang hre bok si lo,
Varna nei lo nau ang a ni si.
14 “Seol thilthawtheinaa inthok,
Ka’n tlan suok tawl ding a ni?
Thina kuta inthokin,
Ka san suok tawl di’m a ni?
Aw thina, khawla’m i hri sie chu?
Aw Seol, khawla’m i sietna chu?
15 A unauhai laia hmuingil tak,
Ni sienkhom lunginsiet naw ning;
Sak tieng thlalĕra inthokin,
LALPA thliin hung nuoi a ta,
A tui hnărhai kang chât a ta,
A tuikhurhai inhil vong a tih.
A ro sienaa rosumhai chu,
Hung rok rampek vong an tih.
16 Pathien laka an hel leiin,
Samaria-a chênghai chun,
An suol man intêl an ta,
Kawlhnamin sâm thlung an ta,
Hnuoi vuoknan naute hmangin,
In raihai phing dâwt thlĕr an tih.