Jerusalem chungthu hrilna
22
1 Jerusalema chungthu chu ka kuomah hieng ang hin a hung tlung a:Iengin am a sukbuoi cheu a na?
Ieng leia in chungah in lawn am?
2 Khawpui inzi nuoi nuoi el,
Hlima inri beng bung kha,
Nang hi i ni hlak naw maw?
I mithi ruong zâl khep khup hi,
Kawlhnâma that an ni naw a,
Indoa thi an ni bok nawh.
3 I rorêltuhai an tlànse a,
Hriem hmang loin an man vong a,
Intâng dingin an thruoi tawl a,
Hmêlma an hung tlung hmâ dai a,
Lo tlanse tawl vong an nih.
4 Chuleiin, kei chun an kuomah,
“Mi nghatsan vong tawl ro khai,
Lung na takin ka trap ding a nih.
Ka mihai siet tuoknaa hin,
Hnĕm tumin mi thlêm naw ro”
Tiin ka hril tawl hiel a.
5 Lalpa, Iengkim LALPA chun,
Chî-âina le sietna tribaium tak,
Inlàrna Ruoma a’n tlungtir ni chun,
Jerusalem bang a chim dur dur a,
Tlangahai beidongin an khĕk a.
6 Tawlailir le sakor chunga chuong,
Elamhai chun thalbawm an chawi a,
Kirhai chun phaw tuomna an sŭt a.
7 I ruom mawi taka chun tawlailir,
An inhnaw sip hmur el a,
Sakor chung chuong pawlhai chu,
I kot bulah an tlim hmur a.
8 Judahai inhliekhŭna kul chu,
Phǐn darin a hung um tah.
Lal in Lebanon Ngawpui Rŭn-ah,
Ralthuom lam dingin in fe a;
9 Davida khawpui kul sietna lai,
Hang tamzie chu in thlir vĕl a,
Dil chuonhnuoiah tui in sĕk a.
10 Jerusalem inhai in tiem a,
Kul bang tholna dingin in thriek a.
11 Dil chuonchunga luong lut di’n,
Kul bang pahni inkarah,
Tui sie khawlna in siem a;
Sienkhom, tiena tlanga inthoka,
Chuong thilhai lo ruot lawk a,
Hung intlungtirtu ruok chu,
In ngaisak ta hrim hrim nawh.
12 Lalpa, Iengkim LALPA chun,
Awm inchuma trap ding le
Lu vaw kola saiip sil di’n,
Chu ni chun a ko chêu a.
13 Nisienkhom ran in that a,
Sa faa uoiin dawnin,
Hlimhlop chenna’n in hmang a,
“Khai leh, fain dawn ei tiu,
Zinga thi ding ei ni si”
In ti tawl lem hlauh si a.
14 Hi suolna hi in thi ni chenin ngaidam ni hrim hrim naw nih tiin Iengkim LALPA chun ka kuomah a hril. Chu chu Lalpa, Iengkim LALPA rorĕl chu a nih.
Sebna kuoma thu tlung
15 Chu bakah Lalpa, Iengkim LALPA chun “Lal sum enkoltu Sebna kuomah fe la, hmaisanah hi thu hi va hril rawh:
16 “Hi taka hin iem i thaw a?
Hi taka hin nangma thlàn ding,
Tlâng pangah lung ker dingin,
Tu’n am phalna a pêk che a?
17 Ngai ta, nang fimkhur hle rawh,
LALPAN a thrâm trĕp ta che a,
Aw, nang mi ropui bŭng bûng,
A peihawn daih ding che a nih.
18 Thil hlûm angin thrâm a che a,
Ram zau takah dêng lût a che.
Chu taka chun i suong èm ém,
I tawlailir bulah thi’ng i ta,
I pu insŭng sukzak i tih.
19 I sina inthok băn ni’ng i ta,
I ninaa inthokin tlâng i tih.
20 Chu ni chun ka siehlaw Hilkia naupa Eliakim chu ko ka tih. 21 Ama chu i korfuol inhâktir ka ta, a kawngah kawnghrèn hrénpêk ka ta, i lalna hi a kuomah inhlàn ka ta, ama chu Jerusalema mihai le Judai rama mihai ta dingin pä ni ta’ng a tih. 22 A kutah Davida sungkuo chabi chu inhlàn ka ta, a hong chu tu khomin khâr naw ni a, a khàr chu tu khomin hong naw ni hai. 23 Ama chu hnuoi changa thlungphun nghet taka phun angin suknghet ka ta, a sungkuo ta dinga suongum tak ning a tih. 24 A sungkuohai le an thlahai pei khaidingtu le a hnuoihnung tak le a lien tak chen khoma an belbul tak ning a tih. 25 Chu ni chun hmun nghet taka thlungphun ka kheng det bur chu inkar phongin hung tliek a ta, chu taka inkhai po po chu chim thla vong a tih, Lalpa, Iengkim LALPA chun a tih” tiin.