Ringtuhai ta dinga thilpêk
16
1 Mi thienghlimhai ta dinga thawlawm thaw thua chun, Galati kohranhai ka hril ang khan thaw ve ro. 2 Pathienni zâtin nangni lai tu khomin malsawmna in dong dan ang peiin sie khawl ro, ka hung phaa dawl a ngai nawna dingin. 3 Ka hung phâ leh in thilpêkhai chu Jerusalema fepui dingin mi in ring zawnghai chu ka lekha inchawitirin tir ka tih. 4 Ka fe ve a trûl a ni lem chun ka ruolin hung veng an ta.Paula inzin dan ding
5 Makedonia ram ka sir hnungin in kuomah hung ka tih; Makedonia ram fang a trûl tlat si a. 6 In kuomah sâwt fè ka châm el thei, thlasik sung po khom a ni el thei a; ka’n zin nawk peina dinga khom in mi thrangpui ding annawm. 7 Tuta trum chu fe malama hung sir vuoi chêu ringot ka nuom naw a, Lalpan rem a ti chun iemani chen in kuoma chăm ka beisei a nih. 8 Efesi-a hin Pentikos ni chen châm ka tih. 9 Hlawk taka rong bawl theina lampui ka ta dingin a’n hong a, dodâltu ruok chu an tam ĕm êm.
10 Timothe a hung chun nangni lai inphalam dêr lo dingin lo inumtir ro, keima ang boka Lalpa rongbawltu a ni kha. 11 Chuleiin, tu khomin lo ngainĕp naw ro. Ka kuoma a hung kîr vak theina dingin thlamuong takin hung inthla ro; unau danghai ruola a hung tlung ka beisei.
12 Unaupa Appolo ruok chu unau danghai ruola in kuoma hung dingin ka ngên rak a, sienkhom tu hri hin chu a nuom tlat naw a, hun remchăngah la hung ngĕi a tih.
Inthlăna le chibai bûkna
13 Inring zingin um ro; ringnaah ngîr nghet unla; huoi tak le hrât takin um ro. 14 In thaw taphot chu hmangainain thaw pei ro.
15 Stefan hai sung kha Akai biela ringtu hmasa an ni a, mi thienghlimhai rongbawlna sinah an inpĕk zo ti in hriet a; 16 chuong ang mihai le an thawpui le rongbawlpuihai thu chu zawm pei ro.
17 Chun, Stefan hai, Forchunata hai, Akaika hai an hung hin an mi suklawm hle a; anni hin in um naw inlang lo khopin an mi siem a, 18 in lungril an sukhar ang bok khan ka thlarau khom an sukhar ve a nih. Hieng ang mihai hi ngai hlu ro.
19 Asia rama kohranhai hin chibai an bŭk cheu. Akuila le Prisilla le an ina kohran inkhawmhai hin Lalpa hmingin chibai vochuom an bŭk chêu. 20 Unau dang po po khomin chibai an bŭk chêu a; fawp thienghlimin in chibai tuo ro.
21 Hi chibai bŭkna lekha hi kei Paula hin kut ngeia ka hung ziek a ni hi.
22 Tu khom Lalpa hmangai nawtu chu trongsephurin um raw se. Lalpa chu a hung ie!a
23 Ei Lalpa Isu lunginsietna chu in kuomah um raw se.
24 Krista Isua ka hmangaina chêu chu in rênga kuomah um raw se.