Mosie hla
32
1 Aw vànhai, na lo sit ro,Thu ka hril ding a ni hi;
Ka trongkam suok thuhai hi,
Leilungin ngaithla raw se.
2 Ka thu inchuktirhai chu,
Khuongruo angin sûr sien la,
Ka thu hril dinghai khom chu,
Van daidaw angin tla raw se,
Hlobet le thlai hring chawm dinga,
Ruo phisî sûr seng seng ang hin.
3 LALPA hming chu puong ka tih,
Ropuina chu Pathien pe ro!
4 Ama chu Lungpui a na,
A kutsuok a thra famkim a,
A lampui tin a’n dik vong.
Ama chu Pathien ringum,
Thil thra naw hrim thaw ngai lo,
Mi ngîl le indik a nih.
5 Sienkhom a mihai ni tlâk loin,
A lakah in ringum naw a,
In lungril lûtinlè le kâwiin,
Suon bengtla lo in inchang si.
6 Aw, mi invêt le ngolhai,
Hieng hin maw LALPA in rŭl?
A hringtu le siemtu chĕu,
In Pa ngei kha a ni naw maw?
7 Tienthu hluihai kha suiin,
In pi le puhai kha ngaituo ro;
In pahai le upahai kuomah,
Thil chinchăng indon unla,
Iengkim hril chieng an ti chêu:
8 Chunghnungtakin hringmihai,
A thrĕ dar hun lai dam le,
Israel hnam tam zăt ang peia,
An ramri a khampek lai kha.
9 LALPAN a chanpuol dingin,
Jakob thlahai a thlang a nih.
10 Thlalĕr thli sie hrăngnaah,
An văkvăi lai a hmu a,
Hliekhuin a enkol a,
Mit naulêng angin a vĕng;
11 Muvanlaiin a buzawl a,
A têhai vuong inchûktir a,
An chungah a thla zăr a,
A tehai chu zuk la a,
A thla zăr chungah sie a,
A vuongpui hlak ang elin;
12 LALPA chauh an thruoitu a nih,
Hnam dang pathien an thrang nawh.
13 Tlângramah inchĕngtirin,
A ram tharsuokin a chăwm a:
Lungpui kara khuoizu hningin,
Lungthrǐla tro oliv hriek damin,
14 An ran ruola inthoka suok,
Bawngnene le a khal damin,
Beram tuoi le kèl tuoi sa,
Basan beramchal sa inhnik,
Bei phit inhnik tak damin,
Anni chu a chawmlien a,
Uoiin sen phul ser ser dam,
An dăwntir chêu a ni kha.
15 Jesuruna chu a hung thău a,
Thâ inthakin a hung inper a,
A thâu inmût tul el a,
A siemtu Pathien a nghatsan a,
A Sandamtu, a Lungpui chu,
A hung hnăwl el tah a nih.
16 Hnam dang pathien an biek chun,
A thîkthu an chok tho a,
An thil tirdakum thaw chun,
A lungsen an cho suok a.
17 Pathien kuomah ni loin,
An hriet ngai dĕr lo pathien,
Vâi hnunga an hriet ve chauh,
An pi le puhai trì ngai lo,
Ramhuoi kuomah an inthawi a.
18 Anni hringtu Lungpui chu,
An hung ngaisak ta naw a,
Anni siemtu Pathien chu,
An hung theinghil tah a nih.
19 LALPAN chu chu a hmu a,
Thîkin a lung a na hle a,
A naunu le naupahai chu,
Lungsenin a hnăwl tawl a.
20 “Ka hmêl inhmutir naw ning,
Iem an chang hrim en ka tih;
Suon bengtla lo tak an na,
Ringumna hrim an păi nawh.
21 Pathien ni lo hrim hrimhai,
Annin an mi’n thǐktir a,
An siem fawm milimhai chun,
Ka lungsen an chok tho a;
Chuleiin keima khomin,
Thìk khop tling lo hnamhai chu,
Anni inthîktir ka ta,
Hnam invĕthai chu hmangin,
Anni chu cho phâwk ka tih.
22 Ka lungsenna chu chokin,
Seol mong chen kăng a ta,
Hnuoi le a tharsuokhai khom,
Meichokin lem hmang a ta,
Tlâng thrut chen kăng ral a tih.
23 Sietnain vur tawl ka ta,
Ka thalin kâp zing ka tih.
24 Trămpui mitsǐm tir ka ta,
Khawsik le hripui triumin,
Anni chu lem zo a ta,
Anni sê hlumtu dingin,
Ramsa ha ngei tir ka ta,
Pilvuta intel intleng hlak,
Rûl tûr nei tir bok ka tih.
25 Kotthlêrah thal inlêngin,
Suon nei loin thi’ng an ta,
Insŭngah thlabârnain,
Ro la hung rĕlkhum a ta,
Nunghak, tlangval le nautê,
Tar chenin bohmang an tih.
26 Anni chu hnot dar vong a,
Mihriemhai hriet ta lo di’n,
Nuoi bo ding ka tia chu,
27 Hmêlmahai nuizatbŭr a,
An um ding ka’n lâu bok si:
Hmêlmahan hre thiem lo a,
“Kan kuta kan hnĕ a nih,
LALPA thaw vong a ni nawh”
An ti pal ding ka vêng si.
28 Hnam intlaw tak chu an nih,
Hrietthiemna hrim an nei nawh.
29 Varin hre thiemhai sien chu,
An la tawp dàn ding hai khom,
Dawn thiem el ding an ni bah!
30 An Lungpuiin zor naw sien,
LALPAN hnâwl naw chu ni sien,
Ieng tin am mi pakhatin,
Sâng khat hnot zâm thei a ta?
Ieng tin am mi pahniin,
Tiem seng lo hnot zâm an ta?
31 An lungpui chu hmêlmahan,
Ei Lungpui ang a ni nawzie,
An hriet chieng ĕm êm a nih.
32 An grep chu Sodom khaw suok,
Gomora grep huona mi a nih.
Tûra sip an grep bawr chu,
Khâkna ngota sip a nih.
33 An uoiin khom rûl tûr ang,
Chongkor tûr hrât ang a nih.
34 LALPAN an thilthaw a hriet a,
Remchang huna hrem dingin,
A bâwmah a khum zing a nih.
35 “Phuba lâk hi ka chan a na,
Anni chu thungrul ka ta,
A hun a hung tlung phâ chun,
An sir la’n phet vong a tih.
An sietna ni a hnâi ta a,
Sietnan hung nang vak a tih.”
36 A mihai ro chu LALPAN,
A la hung rĕlpĕk ding a nih.
A siehlawhai chan hung chău a,
Bawi le bawi naw tu el khom,
Thi bâng an tlawmzie hmuin,
A bawihai lunginsiet a ta,
Aman hung san suok a tih.
37 “Khaw lai am an pathienhai,
An ringsan lungpuihai chu?
38 An inthawina thău fatu,
Uoiin thilhlân an pĕkhai,
Lo dawn zo vongtuhai chu?
Nangni thrangpuitu dingin,
Tu hin hung tho hai sien la,
In bèlbul di’n hmang ro chu!
39 “Kei chu keima ngei ka nih,
Pathien dang hrim an um nawh,
Ti hi hung hre ta ro khai;
Ka that a, ka sukhlum a,
Ka’n hliem a, ka sukdam a;
Chu chu ka kuta inthoka,
Inchŭ thla thei an um nawh.
40 Chatuona hring zing ka nih,
Van tieng ka kut phar suokin,
Hi thu hi ka puong a nih:
41 Ka kawlhnâm ngei tât tlè a,
Indik taka ro ka rĕl phâ,
Hmêlmahai chungah phuba,
Ka la lâk ngei ding a na,
Mi theida hlaktuhai chu,
Ka la thungrul ding a nih.
42 Ka thalhai chu thisenin,
Ka la hrâi rui ding a na,
Ka kawlhnâm khomin taksa,
A la lem ding a ni si:
Thathai le manhai thisen,
Hmêlma sam seihai lu leh”
Tiin LALPA chun a hril.
43 Aw, nangni hnam tinrênghai,
A mipuihai leh hlim ro;
A siehlawhai thisen phuba,
A la lâk ding a ni si a;
A dotuhai chunga chun,
Phuba a lâk ding a na,
A ram le a mihai suol chu,
A ngaidam ding a ni si a.
Mosie thucha hnuhnung
44 Mosie le Nuna naupa Josua chun chuong hla thu po po chu mipui hriet ngĕiah an insam a. 45 Israelhai po po hrieta Mosien a’n sam zo hnung chun, 46 “Voisuna hla thu in kuoma khŭn taka ka’n samhai hi lungrilin vong tlat unla, hieng dànhai hi fimkhur taka zawm dingin in nauhai chu thu pe ro. 47 Thu mei mei a ni nawh, in hringna a nih. Jordan vadung kâna in va hluo ding rama chun, hieng thil lei hin dam sâwt in tih” a ta.
Nebo tlanga Mosie thi ding thu
48 Chu ni bok chun LALPAN Mosie a biek a, 49 “Moab rama Jeriko zawna Abarim tlang dunga Nebo tlanga chun hang kai la, Israel thlahai hluo dinga ka pĕk Kanan ram chu hang thlìr rawh. 50 Hor tlangah i unaupa Aron a thi a, a chipuihai kuoma thruoi a ni ang bok khan i lawn kaina tlanga chun thi’ng i ta, i chipuihai kuomah thruoi ni ta’ng i tih. 51 Zin thlalĕra Kadesh hmuna Meriba tuia khan Israel thlahai hmaah in pahniin in mi ring zo naw a, Israelhai lai ka thienghlimna in kengkaw zo naw lei khan a nih. 52 Chuleiin, Israel thlahai kuoma ka pĕk ram chu răla inthokin hmu’ng i ta, lŭt ruok chu lût ve naw ti nih” tiin.