Thilsiemah Pathien ropuina an lang
Davida inpakna hla
19
1 Vanhai khin Pathien ropuizie,Puongin an inhriettir hlak a,
Boruok zâu tak khin a kutsuok,
A tlàng insampui hlak a nih.
2 Sŭnni tinin an puong suok a,
Zăn tin a thiemzie an suklang;
3 Trongkam hmangin an hril naw a,
An rawl hriet ding a um bok nawh.
4 Sienkhom an rawlin hnuoi a fang,
An thuin kawl kil a dĕng suok.
Chung thangvan sanga khin puonin,
Ni ta dingin a zarpek a.
5 Pindan a’nthok inhmaw tak a,
Moneitu a hung suok ang le,
Phûr taka mi hrat tlân angin,
6 Sak kawlrawnah ni a suok a,
Thlang kawlrawn panin a’n her a,
A lumna hre lo an um nawh.
7 LALPA dàn chu a famkim a,
Thlarau hringna a sukhar hlak.
LALPA thusuok chu a chieng a,
Mi mawlhai khom a sukvar hlak.
8 Lalpa zirtirna a’n dik a,
Lungrilah hlimna a pêk hlak.
Lalpa thupèk a êng mawi a,
Lungril mithai a sunvar hlak.
9 LALPA tri hi a felfai a,
A dai sawt hlak, kumtluong chenin.
LALPA thusuok chu a’n dik a,
Arêngin a fel indik hlak.
10 Rangkachak nêkin a hlu lem,
A thra inhlîr tak nêk khomin.
Khuoizu nêkin a thlum lem a,
Khuoi thlâra far thla nêk khomin.
11 Chuong chu i siehlaw i kawk hmu,
A zawmtu din lawmman a tam.
12 Sienkhom mani thaw suolhai chu,
Tuin am inman suok a ta?
Suol inthup lakah mi hum rawh.
13 Chapona lakah mi vêng la,
Ka chungah thu inneitir naw.
Chuongchun dem kai lo hung niin,
Bawsietna nasa tak lakah,
Hung fihlîm thei ve ta’ng ka tih.
14 LALPA, ka Lungpui le Tlantu,
Ka kam thu suok tinrenghai le
Lungrila ka dawnkhawlhai chu,
I hmaah pom tlâk ni raw se.