Malsawmna le trongsie
30
1 “In hmaah thlang ding malsawmna le trongsie ka sie tah a. LALPA in Pathienin hnam danghai laia a hnot dar phâ chĕu, tuta dit thlangna ka pĕk chêu hi in hriet suok hun la um a tih. 2 Nangni le in thlahaiin LALPA in Pathien kuom tieng hung kir nawk a, voisuna thupêk ka pêkhai hi lungril po po le thlarau po poa in zawm chun, 3 LALPA in Pathien chun in vangneinaa hung tungding nawk a ta, lunginsiet a ti chêu a, hnam tin laia a hnot darna chĕua inthokin hung thruoi khawm nawk a ti chêu. 4 Hnuoi kilkhawra a hnot suok in um khomin, chu taka inthok chun LALPA in Pathien chun rût khawmin hung thruoi kîr nawk a ti chêu. 5 LALPA in Pathien chun in pi le puhai hluo ram ngeia chun thruoi lût a ti chêu a, chu ram chu hluo nawk in ta, in pi le puhai nêka hmuingil lem le tam lemin siem a ti chêu. 6 Chun, in khawsak theina ding le in lungril po po le in thlarau po poa in hmangai theina dingin, LALPA in Pathien chun in lungril le in thlahai lungril ser chu tanpèk a ti chêu. 7 Hieng trongsie po po hi LALPA in Pathien chun a theidàtu le suknomnatu chĕu in hmĕlmahai chungah bun lêt a tih. 8 Chuongchun, LALPA chu pom nawkin, voisuna ka pĕk chêu thupêkhai hi hung hraw nawk in tih. 9,10 LALPA in Pathien chun in kut sinthaw tinrênga hai, in rìla raa hai, in ran vai chunga hai le in lo thlai suok tinrêngah a tontawin sukpung a ti chêu. Hi Dan bua chuong a thupêkhai le a dànhai zawm dinga LALPA in Pathien kuom tieng lungril po po le thlarau po poa in kìr chun in pi le puhai chunga a lawm ang bok khan in chungah LALPA lawm nawk a ta, sukhnienghnâr a ti chêu.Damna le thina
11 “Voisuna thu ka pêkhai cheu hi in ta dinga thil harsa taluo amani le in tlin phak lo thil a um nawh. 12 ‘Kan hrieta kan zawm theina dingin tu am vànah hang lawnin mi hang lapèk a ta?’ ti dingin vàna um a ni si nawh. 13 ‘Kan hrieta kan zawm theina dingin tu am tuifinriet ràla fein mi va lapêk a ta?’ ti dingin tuifinriet ràla um khom a ni bok nawh. 14 Chuong nêk hmanin, thu chun a hnai hle che a, i zawm dingin i bău le i lungrilah a um.
15 “Ngai ta u, tuhin in hmaah hringna le hmuingilna le thina le sietna ka sie a ni hi. 16 LALPA in Pathien hmangai ding dam, a lampui hraw ding dam le a rorêlhai pom ding dama thu ka pêk chêu hi in zăwm chun hring le damin um in ta, hung pung in ta, in va hluo ding rama chun LALPA in Pathienin malsawm a ti chêu. 17,18 Amiruokchu, in lungril naw tieng ngha a, thu awi lo a, thruoi hmanga um a, pathien danghai bea an rong in bawl chun, bohmang ngèi ngéi in tih ti tuhin ka hril chêu a nih. Jordan vadung kân a, hluo dinga in lŭtna rama chun dam sawt naw ti niu. 19 In hmaa hringna le thina, malsawmna le trongsie ka sie hi tuhin in chungchang thua hrepuitu dingin hnuoi le van ka ko a nih. Tuhin, hringna chu thlang ro, nangni le in thlahai khom an hring theina ding le 20 LALPA in Pathien chu hmangai a, a rawl ngaithla a, in chel nghet tlat theina dingin. LALPA chu in hringna a ni leiin, in pu Abraham hai, Isaak hai, Jakob hai kuoma inkhâm meua pĕk a tiem rama chun kum sawt tak indamtir a ti chêu” a ta.