Rorelna le sandamna
65
1 LALPA chun hieng hin a tih:“Mi lam ngai nawtu kuomah,
Keima chu inpuong ka ta,
Mi zong ngai nawtu khomin,
Mi hmu thei ve tang an tih.
Ka hming lam ngai lohai kuomah,
‘Hi takah ka um, hi takah ka um’
Tiin keiman ka hril tawl a.
2 Mi lululhai ta dingin,
Ni tin tinin bân ka phar a,
Lam thra naw tieng an hraw a,
An suongtuona an hnot a.
3 Chuong mihai chu chawl loa,
Hmâi sana mi cho phâwktu,
Huonah pumraw thilhlânhai,
Lung rem chungah rimtuihai,
Inhlàn hlaktuhai an nih.
4 Thlan muola hai chun thrungin,
Hmun fienrielah an riek a,
Voksa dam an fàk hlak a,
Sa thieng lo bêlah suongin,
A tuihàng dam an sie a;
5 Mi kuomah, ‘Mi hnai naw rawh,
Kei chu mi thienghlim ka nih’
Ti hlak sihai chu an nih.
Chuonghai chu ka hnâr urtu,
Thil rimsie ang char an nih.
6 Ngai ta, ka hmaah ziekin a um:
To zing loin thungrul ka ta,
A nih, a kimin thungrul ka tih-
7 Anni suolna chauh ni lo,
An pi le puhai suolna khom.
Tlâng tina hai inthawiin,
Muol tin an sukporche a,
An thil suol thaw tahai chu,
A kimin thungrul ka tih”
Tiin LALPA chun a hril.
8 Hi hi LALPA chun a hril:
Grep ra bawr luoi lai chun,
A thren a thra a la um lei a,
‘A rêng khan dehawn naw rawh,
A thren a thra a la um’
An ti hlak ang deu bok khan,
Ka siehlawhai zâr chauin,
An rêngin sukse naw ning.
9 Jakob thlaa inthokin,
Chi pakhat indin ka ta,
Juda thlaa inthokin,
Ka tlâng hung hluotu ding chu,
La hung indin suok ka ta,
Ka thlanghan rochung an ta,
Ka siehlawhai chêng an tih.
10 Ka mi, mi zongtuhai ta dingin,
Saron phai chu beram ruolhai,
Tlatna hmun hung ning a tih.
Akor ruom chu bawng ruolhai,
Chawldamna hmun ning a tih.
11 Sienkhom LALPA maksantu,
Ka tlâng thienghlim theinghiltu,
Vàngnua biekna dawkan buotsaia,
Khuorel hmaa inhlàn ding,
Uoiin chokpoltu chan chu,
12 Kawlhnâma that ning a ta,
Sukhlumtu hmaah kûn in tih;
Ka ko cheu a, in mi don nawh,
Ka biek cheu a, in ngaithlak nawh;
Ka mithmuah thil suol in thaw a,
Ka theida zawng thaw in thlang si.
13 Chuleiin, LALPA Pathien chun hieng hin a tih:
Ka siehlawhaiin fang an ta,
Nangni phingtramin um in tih;
Ka siehlawhaiin dawn an ta,
Nangni dangchârin um in tih;
Ka siehlawhai chu hlim an ta,
Nangni ruok chu inzak in tih.
14 Ka siehlawhan lungril takin,
Hlimin lawm hla sak an ta,
Nangni chu lungzinga trapin,
In thlarau beidongna leiin,
Inrûmin trap khêk in tih.
15 Ka thlanghaiin in hming chu,
Trongse inphurnan hmang an ta,
Kei, LALPA Pathien ngei hin,
Nangni sukhlum ka ti cheu a,
Ka siehlawhai kuoma ruok chu,
Hming thar ka pêk ding a nih.
16 A rama malsawmna hni photin,
Thutak Pathien kuomah hniin,
Dawvan hung kai tang an ta,
Intiemkamna nei taphotin,
Thutak Pathien hmingin nei an ta,
An buoina nihai theinghil an ta,
Tong nawk tah ngai naw ni hai.
Van thar le hnuoi thar
17 “Ngai ta u, van thar le hnuoi thar,
Ka hung inumtir ding a nih.
Thil hmasahai khan hriet zui,
Hlaw zing ta naw ni hai a,
Lungrilah inlang ta naw nih.
18 Ka thil thar inumtira chun,
Kumkhuoin lawmin hlim ro.
Jerusalem chu ditum takin,
A mi chenghai khom lawm takin,
Ka siem tawl ding a ni si a.
19 Jerusalem chungah lawm ka ta,
Ka mihai chungah hlim ka tih.
Chu hmuna chun trap ri hrim hrim,
Hriet ni nawk ta ngai naw nih.
20 Chutaka pieng nautehai chu,
Hlamzuia thi um naw ni hai a,
Tarkûnin dam ta’ng an ta,
Kum za tling chauha thihai chu,
Tleirawla thi-ah ngai an ta,
Kum za khom dam tling lo chu,
Trongsephura ngai ning an tih.
21 An in bawlah chêng tang an ta,
Grêp phunin a ra tlàn an tih.
22 Mi danghai hluopek el dingin,
A thlawnin in bawl ta nawng an ta,
Mi danghai fakpek el dingin,
Grep huon siem ta bok naw nih.
Thing dam kum zat dam an ta,
Ka mi thlanghai chun an thaw ra,
Tarkûn chenin tlàn tang an tih.
23 Sin inrim thlawn ta naw ni a,
Vangduoi ding nau nei naw nih;
An tu le tehai chen khomin,
LALPA malsawmna dong an tih,
24 An mi ko hmain don ka ta,
An hril laiin ngaithlang ka tih.
25 Satene le beram tla khawmin,
Sakeibaknei khomin bupawl,
Bawngchal angin fa ve tang a ta,
Rûlin bu-ah pilvut ring a ta,
Ka tlâng thienghlimah rêng rêng,
Insuknat le insuksiet um naw nih,
LALPA chun a ti a nih.