7 Fekân Kŭt nipui, beramte an that ni chu a hung tlung a. 8 Chuongchun, Peter le Johan chu a tir a, “Fekân Kŭt ruoi ei kîl ding va buotsai ro” a ta. 9 Anni chun, “Khaw lai am va buotsai inlang i nuom a?” tiin an indon a. 10 Ama chun, “Khawpuiah in va lût pha leh pa pakhat, bêla tui chawiin intuokpui a ti chêu a, zui un la, a lŭtna inah zui lŭt ro 11 In neitu kuoma chun, ‘Zirtirtun, ka zirtirhai le Fekan Kût ruoi kan kǐlna ding mikhuol pindan chu a khaw hi’m a na?’ a tih va ti ro. 12 Ama chun pindan chunghnung lien tak, hmangruo iengkim umna chu kawkhmung a ti chêu a, chu taka chun buotsai ro” a ta. 13 Chuongchun an fe a, an kuoma Isun a hril ang ngei chun an va hmu a, Fekân Kŭt ruoi chu an buotsai tah a.

14 A fak hun a hung tlung chun, Isu le a zirtirhai chun dawkan an kîl thrap a. 15 A zirtirhai kuoma chun, “Ka tuor hmain hi Fekân Kŭt ruoi hi kìlpui chêu ka nuom takzet a nih. 16 Ka hril chêu hi, Pathien rama a tak ngeia a tlung hmâ khat chu kût ruoi hi fa nawk ta ngai naw ning” a ta. 17 Chun, no chu a lâk a, lawmthu a hril zoin, “Hi hi la unla, insem ro. 18 Ka hril chêu hi, Pathien rama a tak taka a hung tlung hmâ khat chu grep ra tui hi dawn nawk ta ngai naw ning” a ta. 19 Chun, bei khom chu a lâk a, lawmthu a hril zoin a khoi a, an kuomah a pêk a, “Hi hi ka taksa, in ta dinga pĕk chu a nih; in mi hriet zingna sikin hieng ang hin thaw hlak ro” a ta.

20 Zanbu an fak khop chun chuong ang bokin no chu a lâk a, “Hi uoiin hi ka thisen thuthlung thar, in ta dinga pĕk suok chu a nih. 21 A min mantirtu ding chun hi dawkan hi a kîl ve ta zing a nih. 22 Mihriem Naupa hi Pathien ruot angin a fe ding a na, sienkhom an mantirtu ding chung chu a rik ie!” a ta. 23 Anni lai chuong ang thaw ding chu a tu tak am ning a ta tiin an indon kuol a.

24 Anni lai tu am ropui taka ngai ning a ta ti thuah insêlna a hung suok a. 25 Isun an kuomah, “Jentel lalhai chu an insukngêng ĕm êm a, an chunga thuneituhai chun ‘Somdawltu’ ti hming dam an inpêk hiel a. 26 Nisienlakhom, nangni lai ruok chu chuong ang ding chu a ni nawh. Nangni laia ropui tak chu a chîn tak angin um sien, a hotu tak chu rongbawltu angin um lem raw se. 27 Tu am a ropui lem- buthleng kîltu am rongbawltu? Buthleng kîltu chu a ni naw am a nih? Nisienlakhom, kei ruok chu nangni laia rongbawltu angin ka um hi.

28 “Harsatna ka tuok sung po nangnin in mi umpui a. 29 Ka Pain ram a mi ruotpek ang bokin kei khomin ram ka ruotpĕk chêu a, 30 chuongchun ka rama chun ka dawkanah fain la dawn veng in ta, lalthrungphaa thrungin Israel hnam sawmpahnihai ro la rêlpêk in tih.

31 “Simon, Simon, Setanin a nuom nuoma bu rela rel ding chein a mi hni a, 32 sienkhom Simon, i ringna a’n phet nawna dingin ka trongtraipek che. Chun, keima tieng i hung ngha kîr nawk pha leh i unauhai hi suknghet rawh” a ta. 33 Peter chun, “Lalpa, lung ina intâng le thina tuok ding khom ni lang zui che ka’n huom” a ta. 34 Isun a kuomah, “Peter, ka hril che hi, voizan ar khuong hmain ‘Ama chu ka hriet nawh’ tiin nangin voi thum mi’n phat i tih” a ta.

35 Chun, “Tangka ip dam, mansa dam le pheikhok dam chawi loa ka tir suok chêu khan tlaksam in nei hrim am?” tiin an don a. “Kan nei dĕr nawh” an ta. 36 Ama chun, “Tu ruok hin chu tangka ip nei chun chawi sien la, mansa khom pâi raw se; kawlhnâm nei naw chun a puon zor sien, inchaw raw se. 37 Ka hril chêu hi. ‘Ama chu mi suolhai lai an tiem sa tah’ ti ziek kha ka chungah a tlung ngei ding a nih. A nih, ka chungthu an ziek kha a tlung kim mĕk a nih” a ta. 38 Anni chun, “Lalpa, en ta, kawlhnâm pahni chu a um hi” an ta. Ama chun, “A huntawk” a ta.

39 Chun, Isu chu a suok a, a thaw dan pangngaiin Oliv tlanga chun a fe a, a zirtirhai chun an zui. 40 A hmun a va tlung chun an kuomah, “Thlĕmnaa in lŭt nawna dingin trongtrai ro” a ta. 41 Hla rak loah a va fe a, dingthrathruonin a trongtrai a. 42 “Pa, rem i ti chun hi no hi mi la sonpek rawh, sienkhom keima thu ni loin nangma thu ni lem raw se” a ta. 43 Vana inthokin vantirko pakhat a hung inlang a, ama chu a sukhrăt a. 44 A thla a phâng leiin thrahnem ngai nawk zuolin a trongtrai a, a thlan chu hnuoia thisen far thluk thluk angin a far a.^a

45 A trongtrai zo chun a zirtirhai kuomah a hung a, lungngai châua lo inlusu chu a hung hmu a, an kuomah 46 “Ieng dinga in in zing am? Tho unla, thlĕmnaa in lut nawna dingin trongtrai ro” a ta.

47 Chuonga a hril lai zing chun mipui an hung tlung a, Sawmpahnihai laia mi Juda an ti chun hma a hung thruoi a, fawp tumin Isu a hung pan a. 48 Nisienlakhom, Isun a kuomah, “Juda, Mihriem Naupa hi fawpin i’n mantir ding a ni maw?” a ta. 49 Isu zuituhaiin thil hung tlung ding an hmu chun, “Lalpa, kawlhnâm kan hmang el ta di’m a nih?” an ta. 50 Anni laia pakhat chun thiempu laltak suok chu a sât a, a chang tieng nakawr a fikpek a. 51 Isun, “Khai, khai! A huntawk” a ta, chu pa nakawr chu a them a, a sukdam tah a.

52 A man dinga hung inthok thiempu lalhai, tempul vengtu hotuhai le upa hai kuoma chun, “Hel hmang man ding ang elin kawlhnâm leh hmoltum leh in hung inthok a ni maw? 53 Ni tin tempulah nangni lai ka um hlak a, in mi man bok si nawh. Sienkhom tu hi nangni chêt hun a nih, thim lal chêt hun chu” a ta.

54 Chuongchun an man a, Thiempu laltak inah an thruoi a. Peterin hla fea inthokin a zui a. 55 Chun, in inhuon sung tuol lailunga chun mei an sĕm a, an inthrung khawm a, Peter khom chu anni lai a thrung ve a. 56 Mei awia a thrung lai chu siehlaw nunghakin a hmu a, hnai deuah a en vang vang a, “Hi pa hi a kuoma um ve kha a ni hi” a ta. 57 Peter chun, “Nuhmei, ama chu ka hriet ngai nawh” tiin a’n phat a. 58 Chu hnung ela chun mi dangin an hung hmu a, “Nang khom anni laia thrang i nih” a ta. Peter ruok chun, “Mihriem, ka ni awzawng nawh” a ta. 59 Darkar khat vel hnunga chun mi dangin, “Hi pa hi a kuoma thrang ve kha a ni chieng el, Galili mi a ni si a” a ta. 60 Peter chun, “Mihriem i thu hril umzie chu ka hriet dĕr nawh” a ta. A hril lai mĕk chun âr a hung khuong a. 61 Lalpa chu a hung ngha a, Peter chu tlûn takin a hung en a. Peter chun, ‘Voizan âr khuong hmain voi thum mi’n phat i tih” Lalpan a kuoma a ti kha a hriet suok a. 62 Tuolah a suok a, a trap ta zawi zawi a.^b

63 Isu vĕngtuhai chun nuizat siemnan an hmang a, an vuok a. 64 A mit an tuompĕk a, “Tuin am a vuok che, hril thei rawh” an ta. 65 Trong thra lo tinrêngin an biek a.

66 Zing khuo a hung var chun vantlang upahai, thiempu lalhai le Dan zirtirtuhai chu an inrawn khawm a, Sanhedrina chun Isu chu an thruoi a. 67 “Krista chu i ni le ni naw mi hril rawh” an ta. Ama chun, “Hril lang cheu khom, awi chuong naw ti niu; 68 thu indon cheu lang khom mi hril naw ti niu.^c 69 Nisienlakhom, tuta inthok chun Mihriem Naupa hi Pathien ropui chang tieng inthrung tang a tih” a ta. 70 An rêngin, “Chu, nang hi Pathien Naupa i ni maw?” an ta. Ama chun “Ka ni thu in hril hi in hril indik hrim a nih” a ta 71 Anni chun “Hrepuitu dang tu am ei la ngai rop a? Eini ngeiin a bau suok ei hriet tah annawm” an ta.