Isu a tho nawk
24
1 Chawlkar ni hmasa taka zing hmângin nuhmeihai chun rimtui an buotsaihai chu chawiin thlăna chun an va fe a. 2 Thlăn khăr lung chu inhlum sonin an hmu a, 3 an zuk lut chun Lalpa Isu ruong chu an hmu ta naw a.4 Chuonga hrilhai taka an um lai chun mi pahni, kawlphe anga tle puon vâr taka inthuom, an bulah an hung ngîr a. 5 An tri êm leiin bawka hnuoi sikin an kûn tlat a. Chuonghai chun an kuomah, “Ieng dinga mithi lai a dam lai in zong am? 6 Hi taka hin a um ta nawh, a tho nawk tah. Galili rama a um laia in kuoma a hril kha hre zing ta unla; 7 ‘Mihriem Naupa hi mi suolhai kuta inmantir ning a ta, kraws-ah hemdeng an ta, ni thumnaah a tho nawk ding a nih’ a ti hlak kha” an ta. 8 A thu hril chu an hriet suok nawk tah a.
9 Thlana inthoka an hung kir chun zirtir sawmpakhat le mi danghai kuomah chuong thu chu an hril a. 10 Chuong ang thu, tirkohai kuoma hung hriltuhai chu Mari Magdalin hai, Joana hai, Jakob nu Mari le anni le fe ve nuhmei threnkhathai an nih. 11 Nisienlakhom, an thu chu barah an lo khonpek naw a, an awipek bok nawh. 12 Peter ruok chu a tho a, thlan tieng chun a tlân a, thlan chu kûnin a zuk bi a, puon zai inhmi chauh chu a hmu a; chuongchun, thil umzie chu maktiin in tieng a kǐr nawk tah a.b
Emmau khaw lampuiah Isu an lâr
13 Chu ni tak chun anni laia mi pahni chu Emmau khuo panin an suok a, chu khuo chu Jerusalema inthoka kilometer sawmpakhat vêla hla a nih. 14 Thil hung tlung po po chanchin chu hrilin an titi malam pei a. 15 Chuonga an titi lai chun ama Isu ngei chun a hung hnai a, an intlon tah a; 16 nisienlakhom, a hmêl an hriet thei nawna dingin an mit a sukvai a. 17 An kuoma chun, “Lawn puma in hril kha ieng thu am an ta leh?” a ta. Anni chu ngui takin an ngǐr a. 18 Chun, a hming Kleopa chun a don a, “Jerusalem sir sia tu lai chanchin hre naw chu nang chauh hi ning i tih!” a ta. 19 Ama chun, “Ieng thu am ie?” a ta. Anni chun, “Nazaret Isu, Pathien le mi po po mithmua thua leh thilthawa zawlnei ropui tak chanchin, 20 thiempu lalhai le kan rorèltuhaiin sukhlum dinga an pĕk, kraws-a an hemde tah thu kha tie. 21 Keini hlakin ama chu Israel intlantu ni dinga kan lo beisei kha a na. Chu el khom chu ni loin, voisun hi chuong thil a tlunga inthoka a ni thumna a ni dĕr tah. 22 Chun, keini pawla nuhmei threnkhat khom voi tuk zingkar khan thlănah an va fe a, a ruong an va hmu naw a; 23 Pathien vantirko inlâr an hmu a, anni chun a hring nawk tah tih dam an lo hril thu an hung hril a, lung an sukthrawng rak a. 24 Keini laia threnkhat khom a thlănah an va fe a, nuhmeihai hril ang chie khan thil an va hmu a, sienkhom ama chu an hmu bik chuong nawh” an ta.
25 Ama chun an kuomah, “Mi invêt ruol, zawlneihai thuhril tinrêng awi konga chawlolhai! 26 Kristan chuong thil chu tuorin a ropuinaah a lut ding a ni hrim an nawm a nih?” a ta. 27 Chuongchun, Mosiea inthoka tranin zawlnei po poin Pathien Lekha thua a chanchin an ziekhai chu a hrilfie tawl a.
28 An fena ding khuo an tlung ding an ta a, Isu chu fe pei tum angin a um a. 29 Anni chun, “Kan kuomah riek ve el ta la, khuo khom an hnu ta a, nisa khom a tla ding an ta hi” tiin an thlo a. Chuongchun, an kuoma riek dingin a lŭt tah a. 30 Zanbu an hang ot tlang a, bei chu a lâk a, lawmthu a hril a, a khoi a, an kuomah a sem a. 31 An mit chu a hung var a, a hmêl chu an hriet tah a, ama hlak chu an hmuhoiah a bo ta dai el a. 32 Anni chun, “Lampuia a mi biek laia Pathien Lekha thuhai a mi hrilfie khan ei lungril a har huoi huoi hrim a ni kha” an ta. 33 Chuongchun an tho a, Jerusalem tieng inhmaw takin an kǐr nawk nghal a, sawmpakhathai le an ruolhai um khawm chu an hang hmu a. 34 “Lalpa chu a tho nawk ta ngei a, Simon kuoma khom a’n lâr annawm” an lo ta. 35 Ani khom chun lampuia thil tlung le bei a khoi a, a hmêl an hung hriet takzie thu chu an hril ve a.
Zirtirhai kuomah Isu an lâr
36 Chuong thu chu an hril laiin Isu ngei chu anni lai a hung ngǐr a, an kuomah “Thlamuongna in chungah um raw se” a ta. 37 An tri a, an mit a âr intrà zâk el a, thlarau hmuah an inngai hiel a. 38 Ama chun, “Iem a ta chuong lawma in tri le? Iem a ta in lungril a buoi? 39 Ka kuthai, ka kephahai hi en ro, keima ngei kha ka ni annawm. Mi them unla, en ro; kei in mi hmu ang hin thlarauin ru le châng le taksa a nei nawh” a ta. 40 Chu chu a hril zoin a kuthai a kephahai chu a’n entir tawl a. 41 Lawm taluo, sienkhom makti le hang awi el harsa an ti zing lai chun aman, “Hi taka hin fâk ding in nei am?” a ta. 42 Nga em hmin tlin khat an pêk a, 43 a lâk a, an hmaa chun a fâk tah a.
44 Chun, an kuomah, “Nangni kuoma ka chêng lai khan, Mosie Danbua hai, Zawlnei lekhabua hai le Sam bua hai ka chanchin an ziek taphot chu a hung tlung kim ding thu ka hril hlak chêu kha” a ta. 45 Pathien lekha thu hre thiem thei dingin an lungril a hongpèk a. 46 An kuomah, “Hieng hi a nih zieka um chu: Krista chun a tuor ngei ding a na, ni thum niin mithi laia inthokin tho nawk a ta, 47 simna le suol ngaidamna thu chu Jerusalema inthoka intranin hnam tin kuomah ama hminga hril dar ning a tih, ti hi. 48 Hieng thilhai hi a hrepuituhai in nih. 49 Ngai ta u, Pa thil tiem chu in chungah ka hung tir ding a nih. 50 Chung tienga inthoka thilthawtheinaa inthuom in ni hmâ khat chu khawpuia hin um zing ro” a ta.
Vanah Isu lâkin a um