7 Chu hnung chun a zirtirhai kuomah, “Judai ramah fe nawk ei tiu” a ta. 8 Zirtirhai chun, “Zirtirtu, kha hma el khan Judahan lunga dĕng che an tum a, chuong sà khom chun i fe nawk ding maw?” an ta. 9 Isun a don a, “Sŭnah darkar sawmpahni a um naw am a ni? Sŭnah mi a lêng chun, hi khawvel var hi hmanga a hmu fie thei leiin a’n sui ngai nawh. 10 Zănah a lêng ruok chun, var a nei naw leiin a’n sui hlak” a ta.

11 Chuong thu a hril zo chun Isun, “Ei ruolpa Lazar kha a in tah a, sienkhom kei har dingin ka fe ding a nih” a ta. 12 A zirtirhai chun, “A in chun thra nawk el a tih” an ta. 13 A thi thu Isun a hrilna a nia chu a zirtirhai chun in pangngaia in a ni thu a hril an sawn a. 14 Chuongchun, Isun fie taka hrilin, “Lazar a thi a nih. 15 Nangni tieng ngaituona leiin, chu taka ka um naw chu ka lawm, in ring theina dingin. Sienkhom, a kuomah fe’ng ei tiu” a ta. 16 Thoma, Didum (Phira) an ti chun zirtir danghai kuomah, “Thi ding khomin ama leh fe ve’ng ei tiu” a ta.

17 Isu a hang tlung chun Lazar chu ni li thlànah a lo zal tah ti a hriet a. 18 Bethani chu Jerusalema inthoka kilometer thum vanga hla a nih. 19 Martha le Mari’n an tràpa an sŭn lei chun khawsawt lengpui Juda mi tam tak an hung a. 20 Martha chun Isu a hung tlung ti a hriet charin a va tuok a, Mari ruok chun in a lo nghak a. 21 Martha chun Isu kuomah, “Lalpa, hi taka um ni la chu, ka trapa hi thi lo ding a na. 22 Tu khom hin Pathien kuoma i hni taphot chu pe’ng a ti che ti ka hriet” a ta. 23 Isun a kuomah, “I trapa hi tho nawk a tih” a ta. 24 Martha chun, “Ni kin nia thonawknaa chun tho nawk a tih ti ka hriet” a ta.

25 Isun, “Kei hi thonawkna le hringna chu ka nih; tu khom a mi ring chu thi sien khom hring zing a tih. 26 Tu khom chuong anga hring, mi ringtu taphot chu kumkhuoin thi naw nih. Chu chu i ring am?” a ta. 27 Martha chun, “Ring e, Lalpa, Krista Pathien Naupa, khawvela hung ding chu i nih ti ka ring” a ta.

28 Chu chu a hril zoin Martha chu a fe a, a zuorpui Mari chu a rûkin a va ko a, “Zirtirtu hi taka hin a um a, a ko che” a ta. 29 Chu chu a hriet charin a tho vat a, Isu kuom tieng a pan ta nghal a. 30 Isu chun khuo la lut hman loin Martha-in a va tuok laia a umna ngaiah a la um zing a. 31 Insunga khawsawt lengpui Judahaiin inrang taka Mari a tho le suok an hmu phing leh, trap dinga thlăn tienga fe an sawn a, an zui a. 32 Marin Isu umna a tlung a, ama a hmu charin a ke bulah a bokkhup a, “Lalpa, hi taka um ni la chu ka trâ hi a thi naw ding bah” a ta. 33 Mari trap le a hung zuitu Judahai trap Isun a hmuin a lungril na takin a’n rûm a, 34 “Khaw lam in phŭm a?” a ta. Anni chun, “Lalpa hung la, en rawh” an ta. 35 Isu a trap a.

36 Judahai chun, “En ta u, Lazar hi a lo va hmangai ngei de aw!” an ta. 37 Anni laia threnkhat chun, “Mitdel mit sukvartu hin hi pa khom hi an thi nawtir thei naw maw?” an ti bok a. 38 Isu chu hnuk ulh treu pumin thlăn a tlung a. Chu thlân chu pûk a na, a kot chu lungin an khăr a. 39 Isun, “Lungkhăr hi dom son ro” a ta. Lazar far Martha chun, “Lalpa tuhin chu thu ta’ng a tih, a thìna ni li a ni ta si a” a ta. 40 Isun a kuomah, “I ring chun Pathien ropuizie hmu’ng i tih ka ti naw che am a ni?” a ta. 41 Chuongchun, lungkhăr chu an dom son a, Isu chun van tieng nghain, “Pa, i mi ngaithlăk leiin i chungah ka lawm. 42 I mi ngaithlâk rop hlak ti ka hriet a, chu chu hi taka ngirhai hriet dinga ka hril a nih, nangin kei hi i mi tir a nih ti an ring theina dingin” a ta. 43 Chu chu a hril zoin rawl inring takin, “Lazar, hung suok rawh” a ta. 44 Mithi chu a kut a ke thlân puona inzem pumin a hung suok a, a hmai khom puona tuom a nih. Isun an kuomah “A tuomna kha sût unla, infètir ro” a ta.

45 Mari lĕngpuitu, Isu thilthaw hmutu Judahai laia mi tam tak chun Isu an ring tah a. 46 Threnkhat ruok chu Farisaihai kuomah fein, Isu thilthaw chu an va hril a. 47 Thiempu lalhai le Farisaihai chun Sanhedrin inkhawm an ko a, “Hi mi hin inchikna thilmak tam tak a thaw ta si a, iengtin am ei thaw ta ding a na? 48 Hienga ei inthla zal chun mi po poin ama ring an ta, Roman sorkar hung inrol an ta, ei hmun thienghlim le ei hnam hi an hung suksiet vong ding a nih” an ta. 49 Anni laia pakhat, a hming Kaiafa, chu kuma thiempu laltak chun a hril ve a, “Thil ieng khom in hriet nawh. 50 Ei hnam pum ei chimit nawna dinga mipui aia mi pakhat a thi chu ei ta dingin a thra lem a nih ti dam hi in hriet phak teu nawh” a ta. 51 Chu chu ama lungril puok suoka a hril a ni nawh. Chu kum chun thiempu laltak a na, an hnam aia Isu thi ding a hril lawkna a ni lem. 52 An hnam ai chauh khom ni loin, khawvela indar tah Pathien nauhai chu thruoi khawm nawk a, pawl khata a’n din ding thu khom a hril a nih.

53 Chu nia inthok chun a sukhlum dan ding an phierruk ta a. 54 Chu chena inthok chun Isu chu Judahai lai a lêngvâk ta naw a, thlalĕr dep ram khaw pakhat Efraim an tia chun a fe a, chu khuoa chun a zirtirhai leh an inkulh ta zing a.

55 Judahai Fekăn Kŭt a hnâi tah a, thingtlanga inthokin mi tam tak Fekân Kŭt hmaa inthien dingin Jerusalemah an hang fe a. 56 Anni rawi chun Isu an zong a, Tempul tuolzawlah ngir bûmin, “Iengtin am i ngai ve? Kûtah a hung naw top el ding maw?” tiin an indon tuo a. 57 Ama an man theina dingin tu khomin a umna an hriet chun thuneituhai kuoma ripawt dingin Thiempu lalhai le Farisaihai chun thupêk an insuo ta si a.