Paula le tirko tehlêmhai
11
1 Ka lo invêt deuh a ni khomin in mi dom thiem ka beisei a, chu chu in thaw zing tah hrim a nih. 2 Pasal pakhat, Krista chu ka huolpĕk tah chêu a, a kuoma nunghak thienglâm anga ka’n hlăn theina ding chêuin, Pathien thîkthu a siet leiin, in lakah kei khom ka thîkthu a sie a nih. 3 Rûlin Evi hlĕma a zăwr thlŭk ang khan Krista tienga in lungril thienghlim le mawi tak kha iemani tiin sukkhawlopĕk an ti chêu ti ka’n lau a nih. 4 Kan hril hlak ni lo Isu dang chanchin hrila hung chu lawm a, Thlarau in lo chang tah ang kha ni lo chu pom a, in pom tah ang ni lo Chanchin Thra dang khom in lo pom el a ni chun in dol zor inhma taluo ning a tih. 5 ‘Tirko lien’ intihai chu ieng konga khom ka tluk tawl nawna a um ka ring nawh. 6 Thuhril thiem ve naw lang khom hrietna tienga chu ka duoi bik nawh ti in kuomah kong tinrêngin, ieng huna khom suklangin a um ta hlak kha.7 An naw leh, Pathien Chanchin Thra a thlăwna hril a, nangni chawisanga in um theina dinga ka’n phà hnuoi khan thil suol ka lo thaw am a ni? 8 Nangni laia rong ka bawl theina dingin kohran dang ka pur a, anni laka inthokin thrangpuina ka lâk hlak kha. 9 In kuoma ka um lai khan ka tlăksamna thuah tu khom ka sukkhawk ngai naw a, ka mamawhai chu Makedonia rama inthoka hung unauhaiin an mi hung phuhrŭkpĕk a ni kha. Tu laka khom phurrik ni ka tum ngai naw a, ni tum ngai bok naw ning. 10 Krista thutak chu keimaah a um leiin, hi ka thil uongpui hi Akaia ram sungah tu khomin mi khap thei naw ni hai. 11 Ieng leiin am ie? Ka hmangai naw lei chêuin maw? Ka hmangaizie chêu chu Pathienin a hriet. 12 Ka thaw ang char thaw ve anga inhril sathauhaiin uongpui ding remchang ieng khom an nei nawna dingin, ka thaw hlak ang char hin thaw zom pei ka tih. 13 Chuong mihai chu tirko tehlêm, mi hlĕm tuma ramtrang, Krista tirko anga mani insiem fawm an nih. 14 Chu chu a mak nawh, Setan meu khom var tirkoah a’n siem fawm hlak si a. 15 Chuleiin, Setan rongbawltuhai chu felna rongbawltu anga insiem fawm a harsa nawh, an tawpna ding ruok chu an thilthawin hril a tih.
Paula thil tuorhai
16 Hang hril nawk pei ka tih. Tu khomin invêtah mi lo ngai naw unla, in mi ngai a ni khomin invêt angin mi sie unla, hang uong ve met ka tih. 17 Ka thil hril hi Lalpa min hriltir a ni naw a, inring zo taka ka thil uongpui hi invêt angin ka hril a nih. 18 Mi tam takin khawvel thil an uongpui hlak a, kei khomin hang uongpui veng ka tih. 19 Nangni chu in var a, mi invêthai khom in daw thiem a. 20 A’n dik tak chun, bawia siemtuhai chêu dam, mani hlawkna ding le invor sangna dinga hmangruoa hmangtuhai chêu dam, hmusita uongkhumtuhai chêu le hmaia bentuhai chêu khom in daw thei pei hlak.
21 Chuong ang chu thaw ve dingin kan awm an nêm taluo ti hi inzakum hle sien khom ka pom a nih. Amiruokchu, invêt takin hang hril nawk pei lang, tu khomin uongpui ngam an nei chun kei khomin ka ngam ve. 22 Hebrai mi an ni maw? Kei khom ka nih. Israel mi an ni maw? Kei khom ka nih. Abraham thlahai an ni maw? Kei khom ka nih. 23 Krista rongbawltuhai an ni maw? Invêt takin hang hril lang,- kei lem hi chu ka ni nawkzuol. Ka thok inrim lem dai a, lung inah ka’n tăng rawn lem a, na taka vuok ka tuok rawn lem dai a, thi el theina ngirhmun khom ka tuok zing zing a nih. 24 Judahai thaw dan angin voi sawmli vuoka voi khat pei tling loa vuok trum nga ka tuok a, 25 trum thum hmolin an mi vuok a, trum khat lungin an mi dĕng a, trum thum long siet ka tuok a, ni khat le zan khat tuifinrietah ka’n lâng a. 26 Sienkhom inzin ka thrul chuong nawh. Lampuiah trium tam tak vadunga dam, suomhmang laka dam, ka chipuihai laka dam, Jentelhai laka dam, khawpuia dam, ram hnuoia dam, tuinfinrieta dam le unau tehlĕmhai laka dam ka tuok rop a. 27 Imu hmu lo khopa thokin, sin inrimin ka buoi a; fak ding tlasamin phingtrâm le dangchârin ka um a; sil ding nei loin, saruokin khaw dei ka tuor a. 28 Hieng băka hin Kohranhai po po ka ngaituona chun a mi hnâw zing a nih. 29 Mi hrât nawhai ka tuorpui naw hlak am a ni? Suola tlu mi ka hmuin ka’n voi ngai naw hlak am a ni?
30 Uong ding ka ni rau rau chun ka hrat nawzie suklangtu thilhai hi a nih ka uongpui lem ding. 31 Ei Lalpa Isu Pa le Pathien chun khêl ka hril nawzie a hriet. Ama chu chatuonin inpâkin um raw se.