3 Bethani khuoa phâr pakhat Simon an ti pa inah dawkana Isun thlaithleng a ot laiin alabasta bŭra nard hriek rimtui hlîr hlak, to tak el chawiin nuhmei pakhat a hung a, a bûr chu a tetkoi a, a luah a buok khum a. 4 Chu taka mi threnkhat chun an ngai thei naw a, “Ieng dinga hriek rimtui hi a sukral mei mei am a na? 5 Hi hriek hi puitling kum khat hlaw^a nêka tam hiela zor a, mi retheihai kuoma pek lem awm annawm” an ta, chu nu chu na takin an hal a.

6 Isu ruok chun, “Tosan ro. Ieng dinga in sukbuoi am a na? Ka chungah thil ditum tak a thaw a ni hi. 7 Mi retheihai chu nangni lai an um zing a, in nuom hun hunah in somdawl thei annawm; kei ruok chu nangni lai um zing naw ning. 8 A thaw thei ang ang chu thawin, ka taksa hi phŭm dingin hriek a lo năl lawk a ni hi. 9 Thu dik ka hril chêu hi, khawvel pumpuia Chanchin Thra an hrilna taphotah, hi nu thilthaw hi ama hriet zingna dingin hril ve pei an tih” a ta.

10 Sawmpahnihai laia mi pakhat, Juda Iskariot chu Isu inmantir tumin thiempu lalhai kuomah a fe a. 11 Chu thu an lo hriet chun an lawm hle a, sum khom pek an tiem a. Chuongchun, an mantir dan remchang a zong tah a.

12 Cholthranglo Bei Kŭt ni hmasa tak, Fekan Kŭt beramte an that hlak nia chun a zirtirhaiin Isu kuomah, “Fekan Kŭt ruoi i kîl theina dingin khawlai am buotsai inlang i nuom a?” tiin an indon a. 13 Chuongchun, zirtirhai laia mi pahni a tir a, an kuomah, “Khawpuiah va lut unla, pil bêla tui chawi pa pakhat intuokpui in ta, ama chu zui ro. 14 A lŭtna in neitu kuoma chun, ‘Zirtirtuin, ka zirtirhai le Fekan Kŭt ruoi kan kǐlna ding pindan chu a khaw hi’m a na? a tih’ va ti ro. 15 Ama ngei chun pindan chunghnung lien tak, hmangruo iengkim, inpei sa diem umna chu inentir a ti chêu a, chu taka chun ei ta dingin ruoi va buotsai ro” a ta. 16 Chuongchun, zirtirhai chu an suok a, khawpuia chun an fe a, an kuoma a hril ang ngei khan an va hmu a, Fekan Kŭt ruoi chu an buotsai tah a.

17 Zan tieng a hung ni chun Isu chu zirtir sawmpahnihai leh a hung tlung a. 18 Thlaithleng an kîl lai chun Isun, “Thu dik ka hril chêu hi, nangni laia pakhat, mi kilpuitu ngei hin mi’n mantir a tih” a ta. 19 An lungzing ta hle a, a mal malin a kuomah, “Kei chu ni awm lo tak maw?” an ti seng a. 20 Ama chun, “Sawmpahnihai laia pakhat, kei le thlengkûma bei inchietu^b chu ni’ng a tih. 21 Mihriem Naupa chu a chungthu hrila a um tah angin a fé ngei ding a nih. Nisienlakhom, Mihriem Naupa inmantirtu mihriem chung chu a rik ie. Chu mihriem chu pieng naw sien a ta dingin thra lem a tih” a ta.

22 Chuonga an fak lai chun Isun bei a lâk a, lawmthu a hril a, a khoi a, a zirtirhai chu a pêk a, “La ro, hi hi ka taksa a nih” a ta. 23 No khom chu a lâk a, lawmthu a hril zoin anni chu a pêk a, an dawn seng a. 24 Ama chun an kuomah, “Hi hi ka thisen, thuthlungna,^c mi tam tak ta dinga suok ding chu a nih. 25 Thu dik ka hril chêu hi, Pathien rama a thara ka dawn hun a tlung hmâ khat chu grep ra tui hi dawn nawk ta ngai naw ning” a ta. 26 Hla an sak zo chun Oliv tlang panin an suok tah a.

27 Isun an kuomah, “In rêngin mi zamsan vong in tih. ‘Berampu chu vuong ka ta, beramhai chu indar an tih’ ti ziek a ni kha. 28 Nisienlakhom, kei thoa ka um nawk hnungin Galili ramah lo fe hmasang ka tih” a ta. 29 Peter ruok chun, “An rêngin nghatsan vong hai sienla che khom kei chun nghatsan naw top ka ti che” a ta. 30 Isun a kuomah, “Thu dik ka hril che hi, voi zan lá là hin, ar voi hnih a khuong hmain nangin voi thum mi’n phat i tih” a ta. 31 Ama ruok chun rorum takin, “I thinaa chun thi ve ding ni lang khom, inphat naw top ka ti che” a ta. Mi dang khomin a ti ang chun an hung ti ve tlier tlier a.

32 Hmun pakhat, Gethsemani an ti chu an tlung a, Isun a zirtirhai kuomah, “Ka trongtrai sung hi taka hin lo inthrung ro” a ta. 33 Peter hai, Jakob hai, Johan hai a thruoi a, nasa taka beidongin a lungzing a. 34 An kuomah, “Lungngaina thipui khop hielin ka thlarau hi a tlâkbuok a nih. Hi taka hin um inla, mi mengpui zing ro” a ta. 35 Hma tieng a va fe hret a, hnuoiah a bokkhup a, thei ni sien, chu darkar chun a fe khel theina dingin a trongtrai a. 36 “Abba, Pa, iengkim i thaw thei a, hi no hi mi la sonpek rawh, sienkhom keima thu ni loin nangma thú thù ni lem raw se” a ta.

37 A hung kir nawk a, anni chu inlusuin a hung hmu a. Peter kuomah, “Simon, i inlusù a ni maw? Darkar khat bĕk khom in mi mengpui thei naw a ni maw? 38 Thlĕmnaa in lŭt nawna dingin mengin trongtrai ro. Thlarau chun a pei a, taksa ruok chu a hrât naw a nih” a ta. 39 A fe nawk a, a hril ngai hrilin a va trongtrai nawk a. 40 A hung kir nawk chun an inlusu chu a hung hmu nawk a, an imu a suok ĕm leiin hang don ngaina khom an hriet nawh. 41 A hung kir voi thumnaa chun, “Inlusuin in la chawl zing a ni maw? A hun tah. A darkar chu a hung tlung tah. En ta u, Mihriem Naupa hi mi suolhai kuta inmantir a ni ding an ta hi. 42 Tho unla, feng ei tiu. A mi’n mantirtu ding khom a hung ta saw!” a ta.

43 A hril lai zingin Juda, Sawmpahnihai laia pakhat kha a hung tlung a, ama ruol chun thiempu lalhai, Dan zirtirtuhai le upahai tir mi tam tak, kawlhnâm le hmoltum chawiin, an hung tlung ta rup a. 44 A’n mantirtu ding khan, “Ka fawp tak chu ama ning a tih; man unla, ngun taka vengin thruoi hmang ro” tia inchikna ding a lo hril sa diem a nih. 45 A hung tlung charin Isu chu a hung pan a, “Rabi” tiin a fawp a. 46 Isu chu an chel a, an man tah a. 47 A bula ngirhai laia pakhat chun kawlhnâm a phawi a, thiempu laltak siehlaw chu a sât a, a nakawr a fikpek a. 48 Isun an kuomah, “Suomhmang man ding ang elin kawlhnâm le hmoltum chawiin in hung inthok a ni maw? 49 Nangni lai Tempulah ni tin ka zirtir hlak a, in mi man si nawh. Nisienlakhom, Pathien Lekha thu chu a hung tlung kim ngei ding a nih” a ta. 50 Chuongchun, zirtirhai chun an rêngin an tlansietsan a, an bo ta rip a.

51 Tlangval pakhat,^d puon hlap chauh sil hin Isu chu a zui ve a, ama khom chu an man a, 52 sienkhom a’n tâl suok a, a puon tlansanin saruokin a tlan hmang a.

53 Isu chu Thiempu laltak kuomah an thruoi a, thiempu lalhai, upahai le Dan zitirtuhai chu an hung pung khawm a. 54 Peter khomin an hnung hla feah Thiempu laltak in huon sung tuolzawl chen a hung zui a; vengtu hai lai chun mei lum awiin a thrung ve a.

55 Thiempu laltak le Sanhedrina thrang po po chun Isu an sukhlum theina ding san an zong a, an hmu si naw a. 56 Mi tam takin khêlin an hĕk a, sienkhom an hĕkna thuhai chu a’n mil tâwl bok si nawh. 57 Chun, mi pakhat a hung ngîr a, khêlin a hêk a, 58 “Hi tempul kuta bawl hi thriek ka ta, tempul dang, kuta bawl lo ni thum sungin indin nawk ka tih’ a ta, chu chu a ti lai ngei kan hriet” a ta. 59 Chuong thila khom chun an hĕkna thuhai chu a la’n hmu hlei thei nawh.

60 Thiempu laltak chu a lâiah a va ngîr a, “Hieng an hĕkna zozai che hi i don thei naw a ni?” tiin Isu a’n don a. 61 Ama hlak chu a to zing a, ieng khomin a don nawh. Thiempu laltak chun, “Nang hi Krista, Hamthra Naupa chu i ni?” tiin a’n don nawk a. 62 Isu chun, “Ni e. Mihriem Naupa hi Iengkimthawthei chang tieng inthrung a, van sûmhai le hung la hmung in tih” a ta. 63 Chu phing leh Thiempu laltak chun a silfen a pot thlĕr a, “Hrepuitu dang tu am ei la ngai rop? 64 Pathien poi a hril dan hlak chu in hriet tah a, ieng tin am in ngai?” a ta. An rêngin Isu chu sukhlum tlâkah an ngai a. 65 A threnin chil an sâkkhum tran a; a mit an tuompek a, kuta lokin, “Tuin am a thaw che, hril thei rawh” an ta. Vêngtuhai chun an kei a, an ben sok sok a.

66 In hnuoi tieng tuolzawla Peter a um lai chun thiempu laltak siehlawhai laia nuhmei pakhat a hung a, 67 Peter mei lum awi lai chu a hung hmu a, a hang en chieng a, “Nang khom hi Nazaret mi Isu kuoma um kha i ni hi” a ta. 68 Ama ruok chun, “I thu hril umzie chu ka hriet dĕr nawh, a ngaina tak khom ka hriet nawh” tiin a’n phat a. 69 Nunghak khan a en zui a, a bula ngirhai kuoma chun, “Anni laia mi chu a ni hi tie!” a ti nawk a, ama chun a’n phat nawk a. 70 Chu hnung ela chun Peter kawla ngirhai chun, “Anni laia mi chu a ni ngei hi, Galili mi a ni annawm” an ta. 71 Ama ruok chun trongsephur dong huoma inkhâmin, “Chu mihriem in hril chu ka hriet dĕr nawh” a ta. 72 Chu zoah ar khuon hnina chu a hung khuong ta nghal a. Isun a kuoma, “Ar voi hni a khuong hmain nangin voi thum mi’n phat i tih” a ti thu kha Peter chun a hriet suok a, insûm zo loin a trap a.