3 Oliv tlanga Isu a thrung lai chun a zirtirhai chu a fâlin an hung a, “Chuong chu ieng tik am a hung tlung ding a na? I hung nawkna le khawvel tawp ding inchikna chu ieng am ning a ta? Mi hril rawh” an ta..

4 Isun an kuomah, “Tu khomin an hlĕm nawna ding cheuin fimkhur ro. 5 Ka hming sâlin, ‘Kei hi Krista chu ka nih’ tiin mi tam tak hung suok an ta, mi tam tak hlĕm hmang an tih. 6 Indo le indo thuthang hrieng in ta, sienkhom thlaphâng lo dingin fimkhur ro. Chuong thil chu a hung tlung ding hrim a na, hun tawp ruok chu la ni hri naw nih. 7 Hnam hrang le hnam hrang indo an ta, sorkar hrang le sorkar hrang indo bok an ta; hmun hrang hrangah trăm tlâng a ta, lir inhning bok a tih. 8 Chuong po po chu nauhase intranna a nih.

9 “Chun, soisak dingin inmantir an ti chêu a, keima leiin hnam tin theida ning in tih. 10 Chu huna chun mi tam tak ringna inphet a ta, inphatsan tuong an ta, intheida ton an tih. 11 Zawlnei tehlèm tam tak hung suok an ta, mi tam tak hlèm an tih. 12 Rîtlona a pung nasa êm leiin mi tam tak hmangaina chu la dei a tih. 13 Nisienlakhom, a tawp chena ngir nghettu chu sandamin um a tih. 14 Ram Chanchin Thra hi hnam po po hriet dingin khawvel pumpuiah hril ning a ta, chu zoa chun tawpna chu hung tlung a tih.

15 “Chuongchun, sukramtu tirdakum, zawlnei Daniel hril kha hmun thienghlima ngîr in hmu huna chun (tiemtu chun a umzie hre raw se), 16 Judai rama umhai chu tlangramah tlân raw se. 17 In chunga um chu in sunga thil inchŭ dingin trum thla naw raw se. 18 Loa fe khomin silfen inchŭ dingin inah fe naw raw se. 19 Chuong hun laia inraihai le naute pom lai neihai ta ding chun a va rapthlak awm ngei de! 20 In tlânsiet ni ding chu thlasik lai amanih le Sabat ni amania a hung tlung nawna dingin trongtrai ro 21 Chu huna chun rinumna nasa tak tlung a ta, chuong anga rinumna nasa chu khawvel hung uma inthok tu chen hin a la um ngai naw a, um nawk ta ngai bok naw nih. 22 Chuong nihai chu suktawi ni naw sien chu, tu khom dam khawsuok um naw ni hai; sienkhom, thlanghai leiin chuong nihai chu suktawi ni’ng a tih.

23 “Chu huna chun tu khomin in kuomah, ‘En ta u, Krista chu hi taka hin a um’ amanih, ‘Saw taka son a um’ amanih an ti chun awi naw ro. 24 A san chu, Krista tehlĕm le zawlnei tehlĕm hung suok an ta, thei ni sien chu thlanghai chen khom an hlĕm theina dingin inchikna thilmak ropui tak tak thawng an tih. 25 Ngai ta u, a hun a tlung hmain ka hril diem chêu a ni hi. 26 Chuongchun, in kuomah, ‘Saw, thlalĕrah a um’ an ti chun fe suok naw ro. ‘En ta u, pindan sungrilah a um’ an ti khomin awi bok naw ro. 27 Sak tienga inthoka kawl hung inlepin thlang tieng chen a dêt var angin Mihriem Naupa hung nawk ni khomin um a tih.

29 “Chun, chuong ang rinumna ni chu a liem charin nisa inthim a ta, thlain var insuo naw ni a, vana inthokin arasihai tril an ta, van thilthawtheina chu sukhning ning a tih. 30 Chu huna chun Mihriem Naupa inchikna vanah hung inlang a ta, hnuoia hnam tinin sûn an ta, Mihriem Naupa hi thilthawtheina le ropuina nasa tak leh van sûm laia hung hmu’ng an tih. 31 Vantirkohai chu tawtawrawt ri inring tak leh tir suok a ta, anni chun thlanghai chu hnuoi kil lia inthok le van tawpa inthoka van khing tieng tawp chenin lâwr khawm an tih.

32 “Chuongchun, theichang kung um dana inthokin thil inchûk ro. A zîk a hung indăwn a, a hna a hung inder chun nipui a hung intran ding ti in hriet hlak. 33 Chuong ang bokin, hieng thilhai hi in hmu pha chun ama hung chu a hnâi ta a, kotkhar bulah a um tah ti hre ro. 34 Thu dik ka hril chêu hi, chuong po po chu a tlung kim hma chun tu lai mihai^a hi bo naw top an tih. 35 Hnuoi le van bo a ta, ka thu ruok chu bo naw nih.

36 “Nisienlakhom, chuong thil hung tlung hun ding ni le dâr chu Pa chauh naw chun tu khomin an hriet nawh, vana vantirkohai khomin, Naupa khomin an hriet nawh. 37 Nova dam laia thil tlung ang bok khan Mihriem Naupa hung nawk ni chun tlung a tih. 38 Tui lĕt hma, longa Nova a lŭt ni chenin fain an dawn a, nuhmei pasal an innei a. 39 Tui a hung lĕt a, an rênga a lak hmang vong chen khan an chungah iem a hung tlung ding ti tu khomin an hriet nawh. Mihriem Naupa a hung nawk pha khom chuong ang bok chun ni’ng a tih. 40 Loah mi pahni um an ta, pakhat chu lăk ni’ng a ta, pakhat chu maksan ni’ng a tih. 41 Nuhmei pahniin bu suk an ta, pakhat chu lak ni’ng a ta, pakhat chu maksan ni’ng a tih.

42 “Chuongchun, inring zingin um ro, ieng tik ni am in Lalpa a hung ding ti in hriet si nawh. 43 Nisienlakhom, hi hi hre ro: zana rûkru hung ding hun inneituin hre lawk sien chu, lo inring a ta, a in inroktir naw nih. 44 Chuleiin, nangni khom inpei sa zingin um ro, in beisei naw lai hunah Mihriem Naupa chu hung hlauh rawi a tih.

45 “A puin a insunga siehlawhai chunga hotu le a hun taka an bu sempektu dinga siehlaw ringum le var a sie chu tu am ni tang a ta? 46 A pu a hung kir nawk phaa chuong anga thawtu siehlaw a hung hmu chu a ta dingin a thra. 47 Thu dik ka hril chêu hi, a nei po po chunga hotuah siem a tih. 48 Amiruokchu, chu siehlaw chu mi suol ni ta sien, 49 ‘Ka pu hi hung vak naw nih’ tia ngaiin a siehlawhai chu vawin, zuruihai leh fain dawn sien, 50 a pu chu a beisei naw ni le an ring naw hun darkarah hung a ta, 51 bong tam insuong^b a ta, lêmderhai chan inchangtir a ta, chu taka chun trapin ha râwt a tih.