Inchikna inentir dingin an phŭt
16
1 Farisaihai le Sadukaihai chu Isu kuomah an hung a, ama fiena dingin vana inthoka inchikna inentir dingin an phŭt a. 2 Ama ruok chun, “Zan tieng a hung niin, ‘Khuo a thra ding ning a tih, kawl a sen êm el’ in ti hlak a. 3 Chun, zing tieng leh ‘Kawl a sena chu van a’n tûr leiin voisun chu khuo a se ding ning a tih’ in ti bok hlak. Khaw umzie in hriet thiema chu hun inchiknahai in hriet dêr si nawh.a 4 Tu lai ruolthar, mi suol tak le uire hmang takhai hin inchikna thilmak an zong hlak a, sienkhom Jona inchikna chauh naw chu inchikna thilmak hrim inentir ni naw ni hai” a ta. Isun anni chu a fesan ta dai a.Farisaihai le Sadukaihai chol
5 Dil ral khing tieng an kai chun zirtirhaiin bei an lo chawi theinghil a. 6 Isun an kuomah, “Farisaihai le Sadukaihai chol laka chun invêng fimkhur ro” a ta. 7 Anni rawi chu inbe tuoin, “Bei ei chawi theinghil leia a mi ti ning a tih” an ta. 8 Isun chu chu a hrietin, “Ringna tlawmhai, ieng dinga bei in nei naw thu ringot in buoipui am a na? 9 Tu chen khom hin in la hriet thiem naw rop a ni maw? Mi sangnga ta dinga bei phek panga le an fak mahla in rŭt khawm zat kha in la hriet zing naw maw? 10 Mi sangli ta dinga bei phek pasari le fak mahla in rût khawm zat khom kha teh? 11 In kuomah bei thu ka hril nawh ti iem a ta in hriet thei naw? Nisienlakhom, Farisaihai le Sadukaihai chol laka chun fimkhur ro” a ta. 12 Chu phing leh chola siem bei lakah ni loin Farisaihai le Sadukaihai zirtirna laka fimkhur ding a nizie thu a hrilna lem a nih ti an hung hriet tah a.
Peterin Isu nina a puong
13 Isu’n Filip Kaisari biel a hung tlung chun a zirtirhai kuomah, “Mihaiin Mihriem Naupa hi tu am a nih an ti a?” tiin a’n don tawl a. 14 Anni chun, “Baptistu Johan ti che dam, Elija ti che dam, Jeremia an naw leh zawlnei tu amanih ti che dam an um” an ta. 15 Ama chun an kuomah, “An leh nangnin tu am ka nih in mi ti a? a ta. 16 Simon Peter chun, “Krista, Pathien hring Naupa chu i nih” a ta. 17 Isun a kuomah, “Peter, Jona naupa, i ham a thra, mihriem inhriettir che a ni naw a, ka Pa vana mi inhriettir che a ni lem. 18 Chun, nang hi Peterb i nih ti ka hril bok che; hi lungpui chunga hin ka kohran rem ka ta, thina thilthawtheina khomin ngam naw nih. 19 Van ram chabihai peng ka ti che a, hnuoia i phuor taphot chu vana khom phuor ning a ta, hnuoia i sût taphot chu vana khom sût ning a tih” a ta. 20 Chu zoa chun ama chu Krista chu a nih ti tu khom hril lo dingin a zirtirhai chu a ti tlat a.
Isun a thi ding a hrillawk
21 Chu chena inthok chun Isun Jerusalema a fe ding thu dam, upahai, thiempu lalhai le Dan zirtirtuhai laka thil tam tak a tuor ding thu dam, sukhluma a um ding thu le a ni thum nia kei thoa a um ding thu dam chu a zirtirhai a hril tran tah a. 22 Peterin ama chu a thruoi hrang a, “Lalpa, chuong dam chu Pathienin remti naw nih. Chuong chu i chungah hung tlung ngai naw top a tih” tiin a kâwk a. 23 Isu chu a ngha kîr a, Peter kuomah, “Setan, ka hnungah fe rawh! Ka ta dingin dàlkham i nih. Pathien tieng ngaituo loin mihriem thilah i lâk a ni hih” a ta.
24 Isun a zirtirhai kuomah, “Tu khomin mi zui a nuom chun mani insie hmangin,c mani kraws putin mi zui raw se. 25 Tu khom mani hringna hum tum chun chân a ta, tu khom keima leia hringna chân ruok chun hum a tih. 26 Miin khawvel hi nei vong sien, a thlarau inhmang si sien, a ta dingin ieng am a trangkai a? An leh, miin a hringna le inthleng dingin iem a pek thei a? 27 Mihriem Naupa hi a Pa ropuina le a vantirkohai leh a hung pha chun, mi tin an thilthaw ang peiin lawmman pe’ng a tih. 28 Thu dik ka hril cheu hi, hi taka ngir threnkhat lai hin Mihriem Naupa hi ama rama a hung an hmu hma chu thina intem lo ding an um” a ta.